IMAMAT 5 - Tanou Moonsoi Timugon

Taak simbalui koson mangampun ra tula

¹ Taak simbalui koson mangampun ra tula gogoton pataakon ra tayar ru baal ragitio: Amon ru sasangulun no napatas noyo kitaakon mangani' ra inono' giu' ra makama, kaa' kalo nangani' ra pambalaan ra ondo' nakito nano noyo kapoam naining nano, am musiti' io mansaan ra kinibit no.

² Amon ru kalo singonon ru sasangulun mangambong ra rorondo' ondo' majamol, koson ra baangkai ru bibiag, masauk io ra majamol am makasala ra natutunan no ayuk binaal nano.

³ Amon ru kalo singonon ru sasangulun mangambong ra atan ayuk majamol intor ra ulun, makasala io ra natutunan no ayuk binaal nano.

⁴ Amon ru magibot sasangulun ra bonyowon koson mambaal ra atan ayuk, makasala io ra natutunan no ayuk binaal nano.

⁵ Paat makasala sasangulun, musiti' io mangiou ra tula nano.

⁶ Koson ra ukuman ru tula nano, musiti' ulun no mapataak ra Tuhan ra sanginan domba ruandu' kapoam kambing ruandu'. Musiti' imam mapataak ra taak simbalui no koson mangampun ra tula ru ulun no.

⁷ Amon ru ulun makatula no kalo makapanaak ra sanginan domba kapoam kambing koson mamuli' ra tula nano, musiti' io mapataak ra Tuhan ra ruo ngainan susuit maningkuluuk kapoam ruo ngainan susuit asang: Sanginan tayar ra taak simbalui koson mangampun ra tula, am sanginan poyo tayar ra taak simbalui koson mapabansuk ra guang ru Tuhan.

⁸ Musiti' io mapataak ra susuit-susuit no ra imam. Musiti' imam no mapataak galing ra susuit ondo' inaru' tayar ra taak simbalui koson mangampun ra tula. Musiti' imam no mamilos ra liog ru susuit no, kaa' pai' masaboi mauntas ulu ru susuit no.

⁹ Santayaran ra raraa' ru susuit no musiti' patakison boo ra sapapa' ru altar. Suwo ru raraa' no musiti' boo pawason ra ragana' ru altar. Taak simbalui ti iono taak simbalui koson mangampun ra tula.

¹⁰ Kopongo raginio mapataak boo imam no ra sanginan poyo ra susuit no koson taak simbalui koson mapabansuk ra guang ru Tuhan, sumugut ra aturan. Koon raginio noyo mapataak imam no ra taak simbalui koson mangampun ra tula ru ulun no, maa' raginio ampunon boo ulun no ru Tuhan.

¹¹ Amon ru ulun makatula no kalo makapanaak ra ruo ngainan susuit maningkuluuk kapoam ruo ngainan susuit asang, musiti' io mapataak ra sakilogram tapung koson ra taak simbalui koson mangampun ra tula. Kalo latakin tapung no ra umau jaitun kapoam kaminyan sabap taak simbalui no iono taak simbalui koson mangampun ra tula am sala' ka taak simbalui koson paringkuanangan.

¹² Musiti' ulun no magibit ra tapung no ra imam. Mangalap boo imam no sogonggom ra tapung no am solobon no ra rasawat ru altar koson ra taak ra akanon; gitio tatandu' no ra ngaangai' ru tapung no pinataak noyo ra Tuhan. Taak raginio noyo taak simbalui koson mangampun ra tula.

¹³ Koson raginio noyo imam no mapataak ra taak simbalui koson mangampun ra tula ru ulun no, am ampunon boo ulun no ru Tuhan. Suwo ru tapung no imam noyo tatangan, koson ra taak simbalui koson paringkuanangan ra Tuhan.

Taak simbalui koson mambayar ra kalubatan

¹⁴ Nangani' Tuhan ri Musa ra aturan ragitio.

¹⁵ Amon ru kalo singonon ru sasangulun mambaal ra tula sabap ra kalo nakasugut manaak ra tayar ra taak ondo' inaru' ra tayar ru Tuhan, musiti' ulun no magibit ra taak simbalui koson mambayar ra kalubatan ra Tuhan. Taak simbalui no musiti' sanginan domba gawayan kapoam sanginan kambing gawayan ondo' kalo najamaran. Logo no musiti' maya' ayuk ra logo ondo' inaru' giu' ra Kim ru Tuhan.

¹⁶ Musiti' ulun no mambayar ra atan ondo' kalo nasugut nano ragili, ruangin poyo ra ruo ngoopor piatus. Musiti' io mapataak ra bibiag no ra imam. Pataakon boo bibiag no ru imam koson ra taak simbalui koson mangampun ra tula ru ulun no, am ampunon boo ulun no ru Tuhan.

¹⁷ Amon ru osoi ayuk pana ra kalo singonon mambaal ra tula sabap ra manggal rondo' intor ra susuban ru Tuhan, makasala ulun no am musiti' io mansaan ra kinibit no.

¹⁸ Koson ra taak simbalui koson mambayar ra kalubatan, musiti' io magibit ra imam ra sanginan domba gawayan kapoam sanginan kambing gawayan ondo' kalo najamaran. Logo no musiti' maya' ayuk ra logo ondo' inaru' noyo giu' ra Kim ru Tuhan. Musiti' imam no mapataak ra taak simbalui koson mangampun ra tula ru ulun no ondo' kalo singonon nano, am ampunon boo ulun no ru Tuhan.

¹⁹ Gitio noyo taak simbalui koson mambayar ra kalubatan ra tayar ru tula ondo' binaal nano ra Tuhan.