IMAMAT 4 - Tanou Moonsoi Timugon

Taak simbalui tayar ru tula ondo' kalo siningon

¹ Nanusub Tuhan ri Musa

² maa' raginio mambala' ra ulun ru Israil ra amon ru sasangulun no makatula am manggal ra rondo' ra susuban ru Tuhan ra kalo singonon, musiti' gagayaan ru ulun no aturan ragitio.

³ Amon ru makatula Tingganai Maayo Imam, saboi mangkinibit ra ngaangai' ulun ru Israil makasala, musiti' io mapataak ra Tuhan ra sanginan sapi' gawayan mamulok ondo' kalo najamaran no, maa' raginio ampunon tula nano.

⁴ Tingganai Maayo Imam no musiti' magibit ra sapi' gawayan giu' ra kulobon ru Kim ru Tuhan, pabantaan no kalindu' nano rasawat ru ulu ru sapi' no, am simbaluyon ginio ra saang ru Kim.

⁵ Tingganai Maayo Imam musiti' mangalap ra santayaran intor ra raraa' ru sapi' gawayan no am ibiton no ra ralalom ru Kim.

⁶ Musiti' io mopososop ra bubua' ru kalindu' nano ra raraa' no, patakison boo raraa' no intulu' ra saang ru tabir ondo' mapatuliar ra Lamin Matulai.

⁷ Musiti' io mapaluit boo sanganu intor ra raraa' no ra sangau ra pisuk ru altar intok ru kaminyan giu' ra ralalom Kim ru Tuhan. Musiti' io mapawas ra suwo ru raraa' no ra tampilon ragana' ru altar intok panalaban ra taak, ondo' pinabanta' giu' ra saang ru kulobon ru Kim ru Tuhan.

⁸ Tingganai Maayo Imam no musiti' mangalap ra ngaangai' lomok ru sapi' gawayan no, lomok ondo' nokolopot ra kalabuat,

⁹ angkawa' pabayaan ra lomok no, am tayar ondo' moonsoi kaga' intor ra angkayau ru sapi' no.

¹⁰ Musiti' imam monolob ra lomok no giu' ra rasawat ru altar koson ra taak simbalui koson mapabansuk ra guang ru Tuhan, nogondo' ra binaal nano ra lomok ru bibiag ondo' sinimbalui tayar ru taak simbalui koson makibarakat ra Tuhan.

¹¹ Kaa' musiti' io mangalap ra kungkung ru sapi' no, ngaangai' kual, ulu, paa, kalabuat makaaya' tinai' ru sapi' no,

¹² am ibiton boo ngaangai' no giu' ra liwar ru pangkiman. Ra giu' no ngaangai' no musiti' solobon ra rasawat ru luton giu' ra intok pamatiran ra kaau, iono intok ondo' pinatimpok raginio.

¹³ Amon ru ngaangai' ulun ru Israil makatula sabap ra minanggal rondo' ra susuban ru Tuhan ra kalo singonon,

¹⁴ paat ra mapandayan ayuk tula no, musiti' ngaangai' ulun ru Israil mapataak ra sanginan sapi' gawayan mamulok tayar ru taak simbalui koson mangampun ra tula. Sapi' no musiti' nilo ibiton ra saang ru Kim ru Tuhan.

¹⁵ Tingganai-tingganai ru ulun no musiti' mapabanta' ra kalindu' nilo ra rasawat ru ulu ru sapi' no, am simbaluyon boo ra giu' no.

¹⁶ Musiti' Tingganai Maayo Imam magibit ra santayaran intor ra raraa' ru sapi' no giu' ra ralalom ru Kim ru Tuhan.

¹⁷ Giu' no musiti' io mopososop ra bubua' ru kalindu' nano ra ralalom ru raraa' no, am patakison boo raraa' no intulu' ra saang ru tabir ondo' mapatuliar ra Lamin Matulai.

¹⁸ Musiti' io mapaluit ra sanganu intor ra raraa' no ra sangau ra pisuk ru altar intok ru kaminyan ondo' pinabanta' ra ralalom Kim ru Tuhan, am suwo ru raraa' no pawason boo ra tampilon ragana' ru altar intok panalaban ra taak simbalui, ondo' pinabanta' giu' ra saang ru kulobon ru Kim.

¹⁹ Kopongo raginio musiti' io mangalap ra ngaangai' lomok ru sapi' no am solobon ra rasawat ru altar.

²⁰ Baal pinamakuan no ra sapi' no nogondo' koson ra pinamakuan no ra sapi' gawayan tayar ru taak simbalui koson mangampun ra tula. Koson ragitio noyo Tingganai Maayo Imam no mapataak ra taak simbalui tayar ru tula ru ngaangai' ulun, am ampunon ilo boo ru Tuhan.

²¹ Kopongo raginio musiti' Tingganai Maayo Imam no magibit ra sapi' no mongoi ra liwar ru pangkiman am solobon no ginio, koson ra io monolob ra sapi' tayar ru taak simbalui koson mangampun ra tula nano galama'. Gitio noyo taak simbalui koson mangampun ra tula ru ngaangai' ulun.

²² Amon ru makatula am makasala sangulun tingganai sabap ra minanggal rondo' ra susuban ru Tuhan ra kalo singonon,

²³ mapandayan no ayuk tula nano, musiti' io mapataak ra sanginan kambing gawayan ondo' kalo najamaran no.

²⁴ Musiti' io mapabanta' ra kalindu' nano ra rasawat ru ulu ru kambing no, am simbaluyon boo ginio ra tampilon ralayo ru altar, giu' ra intok panimbaluyan ra bibiag tayar ru taak simbalui koson mapabansuk ra guang ru Tuhan. Gitio noyo taak simbalui koson mangampun ra tula.

²⁵ Imam ondo' mangandoi no musiti' mopososop ra bubua' ru kalindu' nano ra ralalom ru raraa' ru kambing no, pakupilon raraa' no ra sangau ra pisuk ru altar, am suwo ru raraa' no pawason boo ra tampilon ragana' ru altar.

²⁶ Musiti' io monolob ra ngaangai' lomok ru kambing no giu' ra rasawat ru altar, koson ra io monolob ra lomok ru bibiag ondo' simbaluyon tayar ru taak simbalui koson makibarakat ra Tuhan. Koon raginio ralan ru imam mapataak ra taak simbalui koson mangampun ra tula ru sangulun tingganai, am ampunon boo tingganai no ru Tuhan.

²⁷ Amon ru makatula am makasala sangulun ra mamagun sabap ra manggal rondo' ra susuban ru Tuhan ra kalo singonon,

²⁸ mapandayan no ayuk tula nano, musiti' mapataak io ra sanginan kambing ruandu' ondo' kalo najamaran no.

²⁹ Musiti' io mapabanta' ra kalindu' nano ra rasawat ru ulu ru kambing no, am simbaluyon boo ginio ra tampilon ralayo ru altar, intok manimbalui ra bibiag tayar ru taak simbalui koson mapabansuk ra guang ru Tuhan.

³⁰ Musiti' imam no mopososop ra bubua' ru kalindu' nano ra ralalom ru raraa' ru kambing no, pakupilon raraa' no ra sangau ra pisuk ru altar, am suwo ru raraa' no pawason boo ra tampilon ragana' ru altar.

³¹ Musiti' io boo mapasuai ra ngaangai' lomok ru kambing no, koson ra io napasuai ra lomok ru bibiag tayar ru taak simbalui koson makibarakat ra Tuhan. Kopongo raginio, musiti' io monolob ra lomok no ra giu' rasawat ru altar. Owou ru taak simbalui no mapabansuk ra guang ru Tuhan. Ginio noyo ralan ru imam mapataak ra taak simbalui koson mangampun ra tula ru ulun no, am ampunon boo ulun no ru Tuhan.

³² Amon ru mapataak sasangulun no ra sanginan domba koson mangampun ra tula nano, musiti' domba no ruandu' am kalo najamaran no.

³³ Musiti' ulun no mapabanta' ra kalindu' nano ra rasawat ru ulu ru kambing no, am simbaluyon boo ginio giu' ra tampilon ralayo ru altar, intok panimbaluyan ra bibiag tayar ru taak simbalui koson mapabansuk ra guang ru Tuhan.

³⁴ Musiti' imam no mopososop ra bubua' ru kalindu' nano ra ralalom ru raraa' ru domba no, pakupilon raraa' no ra sangau ra pisuk ru altar, am suwo ru raraa' no pawason boo ra tampilon ragana' ru altar.

³⁵ Musiti' io mapasuai boo ra ngaangai' lomok ru domba no, koson ra io napasuai ra lomok ru domba ondo' sinimbalui tayar ru taak simbalui koson makibarakat ra Tuhan. Musiti' io monolob ra lomok no ra rasawat ru altar pabayaan ra taak ra akanon ondo' pataakon ra Tuhan. Ginio noyo ralan ru imam mapataak ra taak simbalui koson mangampun ra tula ru ulun no, am ampunon boo ulun no ru Tuhan.