IMAMAT 3 - Tanou Moonsoi Timugon

Taak simbalui koson makibarakat ra Tuhan

¹ Paat ra sasangulun mapataak sanginan intor ra sapi' nano koson taak simbalui koson makibarakat ra Tuhan, sapi' no gawayan kapoam ruandu', kaa' kalo najamaran no.

² Musiti' ulun no mapabanta' ra kalindu' nano ra rasawat ru ulu ru sapi' no, simbaluyon boo ginio ra saang ru kulobon ru Kim ru Tuhan. Pawason raraa' ru sapi' no ru imam-imam ra papag ri Arun ra kaapat-apat sapapa' ru altar,

³ am mapataak boo ra tayar ragitio intor ra sapi' no koson ra taak ra akanon ra Tuhan: Ngaangai' lomok ondo' nokolopot ra kalabuat,

⁴ angkawa' pabayaan ra lomok no, am niayuk tayar moonsoi kaga' intor ra angkayau ru sapi' no.

⁵ Imam-imam musiti' monolob ra ngaangai' no pabayaan ra taak simbalui ra bokon no ra rasawat ru altar. Owou ru taak ra akanon no mapabansuk ra guang ru Tuhan.

⁶ Amon ru domba kapoam kambing ondo' pataakon ra tayar ru taak simbalui koson makibarakat ra Tuhan, bibiag no gawayan kapoam ruandu', kaa' kalo najamaran no.

⁷ Amon ru mapataak sasangulun no ra sanginan domba, musiti' io magibit ra domba no ra Kim ru Tuhan.

⁸ Musiti' io mapabanta' ra kalindu' nano ra rasawat ru ulu ru domba no am simbaluyon boo ra saang ru Kim ru Tuhan. Pawason ru imam-imam raraa' no ra kaapat-apat sapapa' ru altar,

⁹ am pataakon boo tayar ragitio intor ra domba no koson ra taak ra akanon ra Tuhan: Lomok, ngaangai' ru iku' ondo' mokolomok am pututon maar ra bungul ru bakulung, lomok ondo' nokolopot ra kalabuat,

¹⁰ angkawa' pabayaan ra lomok no, am tayar ra moonsoi kaga' intor ra angkayau ru domba no.

¹¹ Imam ondo' mangandoi monolob ra ngaangai' no ra rasawat ru altar koson taak ra akanon ra Tuhan.

¹² Amon ru mapataak sasangulun ra sanginan kambing, musiti' io magibit ra kambing no ra Kim ru Tuhan.

¹³ Musiti' io mapabanta' ra kalindu' nano ra rasawat ru ulu ru kambing no, am simbaluyon ginio ra saang ru Kim ru Tuhan. Pawason ru imam-imam raraa' no ra kaapat-apat sapapa' ru altar,

¹⁴ am pataakon tayar ragitio intor ra kambing no koson taak ra akanon ra Tuhan: Ngaangai' lomok ondo' nokolopot ra kalabuat,

¹⁵ angkawa' pabayaan ra lomok no, am tayar ondo' moonsoi kaga' intor ra angkayau ru kambing no.

¹⁶ Imam ondo' mangandoi monolob ra ngaangai' no rasawat ru altar. Owou ru taak ra akanon no mapabansuk ra guang ru Tuhan. Ngaangai' lomok ru bibiag iono tayar ru Tuhan.

¹⁷ Lomok kapoam raraa' kalo noyo toojo maakan ru ulun ru Israil. Aturan ragitio musiti' suguton ru ngaangai' ulun ru Israil ra sabuoi-buoi no, ra ati ayuk ayanan nilo.