IMAMAT 27 - Tanou Moonsoi Timugon

Aturan intor ra taak ra Tuhan

¹ Nanaak Tuhan ri Musa ra

² aturan ragitilo tayar ru ulun ru Israil. Paat pataakon ru sasangulun ra Tuhan koson manugut ra gogoton, mapuli' ulun no ra suang ru logo ragitio,

^3-7 ondo' inaru' giu' ra Kim ru Tuhan: – 60 ngambilor am nakasail: ungkuyon: 15 ngampila' ruit pirok ruandu': 10 ngampila' ruit pirok – Polos ra 20-60 ngambilor: ungkuyon: 50 ngampila' ruit pirok ruandu': 30 ngampila' ruit pirok – polos ra 5-20 ngambilor: ungkuyon: 20 ngampila' ruit pirok ruandu': 10 ngampila' ruit pirok – mamulok intor ra 5 ngambilor: ungkuyon: 5 ngampila' ruit pirok ruandu': 3 ngampila' ruit pirok

⁸ Amon ru ulun ra mokoondo' gogoton no kalo makabayar ra logo ondo' inaru', musiti' io magibit ra ulun ondo' pataakon ra Tuhan no ra imam, am imam no mapatuun ra logo maya' ra mabayaran ru ulun no.

⁹ Amon ru gogoton no intor ra bibiag ondo' maapu koson ra taak ra Tuhan, am moonong taak ondo' pataakon ra Tuhan masauk ra Tuhan tatangan.

¹⁰ Ulun ondo' mokoondo' gogoton no kalo pangaligon raginio ra bibiag ra bokon. Amon ru baalon no ginio, karuruo ngainan bibiag no masauk ra Tuhan tatangan.

¹¹ Kaa' amon ru gogoton no intor ra bibiag majamol ondo' kalo maapu koson ra taak ra Tuhan, musiti' ulun mokoondo' gogoton no magibit ra bibiag no ra imam.

¹² Aruon ru imam logo no maya' ra baal ru bibiag no, am ginio noyo logo inaru' toojo.

¹³ Amon ru makaguang ulun no mamuli' ra bibiag no, musiti' io mambayar ra logo no ruangin ruo ngoopor piatus.

¹⁴ Paat ra sasangulun mapataak ra baloi nano ra Tuhan, mangaru' imam ra logo no maya' ra baal ru baloi no, am ginio noyo logo magulayun.

¹⁵ Amon ru makaguang ulun no mamuli' ra baloi nano, musiti' io mambayar ra logo no ruangin ra ruo ngoopor piatus.

¹⁶ Paat ra sasangulun mapataak ra santayaran intor ra tana' nano ra Tuhan, aruon logo no maya' ra suang ru sampug ondo' matanom giu' ra tana' no; koson moonong 20 ngakilogram barli, logo no mopor ngampila' ruit pirok.

¹⁷ Amon ru mapataak ulun no ra tana' nano ra makai' ayuk Bilor Papasagulian, musiti' bayarin ngai' logo no.

¹⁸ Kaa' amon ru pataakon tana' no ra mopongo Bilor Papasagulian, musiti' aruon ru imam logo no sumugut ra suang ru bilor ondo' lakat poyo soroi ra kalo poyo Bilor Papasagulian ra matong no; logo no pana maningka' poyo.

¹⁹ Amon ru makaguang ulun ondo' mapataak ra tana' no mamuli' raginio, musiti' io mambayar ra logo no ruangin ra ruo ngoopor piatus.

²⁰ Amon ru mantalan io ra tana' no ra ulun bokon ra kalo poyo mapuli' no intor ra Tuhan, kolondo' boo kuasa' nano mamuli' ra tana' no.

²¹ Paat ra Bilor Papasagulian ra matong no, tana' no masauk ra Tuhan tatangan ra mantilayun, am tana' no pataakon ra imam-imam.

²² Amon ru mapataak sasangulun ra Tuhan tana' ondo' binali nano,

²³ mangaru' imam ra logo no sumugut ra bilor ondo' lakat poyo soroi saboi ra Bilor Papasagulian ra matong no. Musiti' ulun no mambayar ra logo no ra orou raginio niayuk, am ruit no masauk ra Tuhan tatangan.

²⁴ Paat ra Bilor Papasagulian, musiti' tana' no pasagulion ra tatangan toojo no kapoam ra papag nano.

²⁵ Musiti' ngaangai' logo aruon sumugut ra ondo' inaru' giu' ra Kim ru Tuhan.

²⁶ Tuhan noyo tatangan ra anak kasaa' ru bibiag am kalo pataakon koson ra taak ondo' pataakon ayuk toojo. Anak sapi', anak domba kapoam anak kambing ondo' kasaa' no masauk ra Tuhan tatangan.

²⁷ Kaa' anak kasaa' ru bibiag majamol mapuli' sumugut ra logo ondo' inaru' giu' ra Kim ru Tuhan, ruangin ra ruo ngoopor piatus. Amon ru kalo pulion, matalan bibiag no ra ulun bokon sumugut ra logo ondo' inaru' giu' ra Kim ru Tuhan.

²⁸ Kolondo' sangulun pana makapantalan kapoam mamuli' ra atan ondo' patimpokon ra kolondo' syarat koson ra Tuhan, ondo' kia ulun, bibiag kapoam tana'. Ngaangai' no masauk ra Tuhan tatangan ra sabubuoi no.

²⁹ Iou pana ra ulun ondo' pinatimpok noyo ra kolondo' syarat tayar ru Tuhan, kalo maalap kapuli'; musiti' potoyon ulun no.

³⁰ Mopor piatus intor ra ngaangai' ampos ru tinanom mino, ondo' kia gandum am niayuk kikinawa' masauk ra Tuhan tatangan.

³¹ Amon ru makaguang sasangulun mamuli' ra santayaran intor ra ampos no, musiti' pulion no sumugut ra logo ondo' inaru' giu' ra Kim ru Tuhan, ruangin ra ruo ngoopor piatus.

³² Sanginan intor ra moonong mopor ngainan bibiag tinambiag masauk ra Tuhan tatangan. Paat untobon bibiag no, moonong ondo' koopor masauk ra Tuhan tatangan.

³³ Tatangan ra bibiag tinambiag no kalo makapampili' ra bibiag no ati ondo' moonsoi, ati ondo' kalo musiti'. Atan ayuk ondo' napili' noyo kalo paaligin. Amon ru aligin no, karuruo bibiag no masauk ra Tuhan tatangan, am kalo mapuli'.

³⁴ Ginilo noyo susuban ondo' pinataak ru Tuhan ri Musa giu' ra tampak ru Gunung Sinai tayar ru ulun ru Israil.