IMAMAT 23 - Tanou Moonsoi Timugon

Pangiantakan ru ugama

¹ Nanaak Tuhan

² ri Musa ra aturan ragitilo intor ra pangiantakan ru ugama ondo' musiti' potonowon ra koson paat sumambayang.

³ Mokoondo' onom ngoorou akau mangandoi, kaa' karaa' noyo ra paat orou katulu', iono orou Sabat, iono orou tangusan. Pai' pangandoi orou raginio, kaa' pantimung no ra sumambayang. Orou Sabat no orou timpokon ra Tuhan, ra ati ayuk inayanan mino.

⁴ Sumunu' ti iono pangiantakan ondo' inaru' noyo ru Tuhan, am musiti' potonowon ra paat ondo' inaru'.

Pangiantakan Paska am Pangiantakan ra Ruti' Kalo Linatakan ra ragi

⁵ Pangiantakan Paska, ondo' iantakon koson mangurumat ra Tuhan, intor ra paat mato ru orou tumolop, paat ra orou koopor am apat sila' kasaa'.

⁶ Paat ra orou koopor am limo, tumalimpuun Pangiantakan ra Ruti' Kalo Linatakan ra Ragi. Buoi katuluan akau kalo makaakan ra ruti' latakin ra ragi.

⁷ Paat ra orou kasaa' ru pangiantakan no, musiti' kau tumimung ra sumambayang, am pai' baalo' kandoi moonong orou.

⁸ Buoi katuluan, musiti' kau mapataak ra taak akanon ra Tuhan. Paat ra orou katulu', igondo' poyo musiti' kau tumimung ra sumambayang, am pai' baalo' kandoi moonong orou.

^9-10 Paat ra akau mumpos giu' ra pagun ondo' taakin ramuyun ru Tuhan am mangkumos ra barli, musiti' kau magibit ra imam ra binangkos ru barli ondo' kasaa'.

¹¹ Pataakon boo ru imam barli no ra Tuhan koson taak lilion, maa' raginio maansayan Tuhan ramuyun. Pataakon ru imam barli no paat ra orou malupus orou Sabat.

¹² Paat ra orou akau mapataak ra barli no, musiti' kau mapataak niayuk ra sanginan domba gawayan ondo' sambilor umur no am kalo najamaran no, koson ra taak koson mapabansuk ra guang ru Tuhan.

¹³ Pabayaan ra taak no, musiti' kau mapataak ra ruo ngakilogram tapung ra moonsoi kaga' ondo' latakin ra umau jaitun tayar ru taak akanon. Owou ru taak no mapabansuk ra guang ru Tuhan. Pabayaan ra taak no, pataakon niayuk salito wain.

¹⁴ Pai' min akano' barli baguon no, ondo' makata', ondo' sininggala', kapoam sinauk ra ruti', ra kalo poyo mapataak kau ri Aki Kapuuno' ra barli baguon no. Aturan ti musiti' gagayaan ru ngaangai' papag mino ra sabuoi-buoi no.

Pangiantakan Napangaan Nanantab

¹⁵ Tumalimpuun orou ra mopongo orou Sabat, paat akau mapataak ra Tuhan binangkos ra barli ondo' kasaa', musiti' min untobon ra masisir tulu' ngaminggu'.

¹⁶ Paat orou kalimo ngoopor, iono orou ra mopongo orou Sabat ondo' katulu', pataako' noyo gandum baguon no tayar ru taak simbalui koson paringkuanangan ra Tuhan.

¹⁷ Musiti' moonong sasambaloi magibit ruo ngantaun ruti', koson ra taak lilion ra Tuhan. Musiti' moonong ruti' baalon intor ra ruo ngakilogram tapung moonsoi kaga' ondo' latakin ra ragi. Musiti' ruti' ti pataakon ra Tuhan tayar ru taak intor ra kinumos ra gandum ondo' kasaa'.

¹⁸ Pabayaan ra ruti' no, musiti' ulun ru Israil mapataak ra tulu' ngainan anak domba ondo' makaumur sambilor, sanginan sapi' gawayan, am ruo ngainan kambing gawayan. Ngaangai' bibiag no kalo najamaran. Pataako' noyo ngaangai' no ra Tuhan tayar ru taak simbalui mapabansuk ra guang ru Tuhan, pabayaan ra taak simbalui koson paringkuanangan am taak simbalui wain. Owou ru taak no mapabansuk ra guang ru Tuhan.

¹⁹ Suai raginio pataako' noyo sanginan kambing gawayan tayar ru taak simbalui koson mangampun ra tula, am ruo ngainan anak domba gawayan ondo' sambilor umur no tayar ru taak simbalui koson makibarakat ra Tuhan.

²⁰ Pataakon boo ru imam ruti' am ruo ngainan anak domba no tayar ru taak lilion ra Tuhan, am taak ti masauk ra imam-imam tatangan. Taak ragitilo matulai.

²¹ Paat ra orou raginio pai' baalo' kandoi moonong orou, kaa' timung no ra sumambayang. Musiti' aturan ti gagayaan ru papag mino ra sabubuoi no, ra ati ayuk inayanan nilono.

²² Paat akau mangkumos ra gandum giu' ra umo, pai' kumoso' gandum ondo' timinuu' ra kiing ru umo, am pai' saguli' ra umo koson mangkumos ra gandum ondo' natatang. Tatango' ngaangai' no ra ulun musikin am ulun bansa' ru bokon. Tuhan iono i Aki Kapuuno' min.

Pangiantakan ra Bilor Bagu

^23-24 Musiti' orou kasaa' ra sila' katulu' iantakon koson ra orou ondo' timpokon ra tangusan. Paat samputin bujung ra orou raginio, musiti' tumimung kau sumambayang.

²⁵ Papataak no ra taak akanon ra Tuhan, am pai' baalo' kandoi moonong orou ra orou raginio.

Orou pangampunan ra tula

^26-27 Orou koopor ra sila' katulu' iono orou mapaugar ra upacara kabilaran tayar pangampunan ra tula ru ulun ru Israil. Paat orou raginio musiti' kau mampali am tumimung ra sumambayang, am niayuk mapataak ra taak akanon ra Tuhan.

²⁸ Pai' pangandoi paat orou raginio, sabap orou raginio iono orou mapaugar ra upacara pangampunan ra tula, maa' raginio mokoowot kau ra pangampunan giu' ra saang ru Tuhan i Aki Kapuuno' min.

²⁹ Osoi ayuk ondo' mangakan paat orou raginio kalo boo karaan ra ulun ri Aki Kapuuno'.

³⁰ Osoi ayuk ondo' mangandoi paat orou raginio potoyon ru Tuhan galama'.

³¹ Musiti' aturan ragitio gagayaan ru ngaangai' papag mino, ati ayuk ayanan nilo.

³² Intor ra paat mato ru orou tumolop paat orou kasiam ra sila' raginio, saboi ra paat mato ru orou tumolop paat orou koopor ra sila' ra nogondo', musiti' min iantakon ginio koson ra orou Sabat, ondo' timpokon ra tangusan. Musiti' kau mampali buoi ru orou raginio.

Pangiantakan Mangkalukub ra Raun

^33-34 Pangiantakan Mangkalukub ra Raun tumalimpuun ra orou koopor am limo ra sila' katulu' am paugaron buoi tulu' ngoorou.

³⁵ Paat ra orou kasaa' ru pangiantakan no, musiti' kau tumimung sumambayang. Pai' baalo' kandoi moonong orou paat orou raginio.

³⁶ Moonong orou buoi tulu' ngoorou, musiti' kau mapataak ra taak akanon. Paat orou kabalu', musiti' kau tumimung poyo sumambayang am musiti' kau mapataak ra taak akanon. Orou raginio iono orou sumambayang; pai' kau pangandoi paat orou raginio.

³⁷ Gitilo noyo pangiantakan ru ugama ondo' inaru' ru Tuhan, am musiti' min iantakon. Paat ra pangiantakan no musiti' kau mangurumat ra Tuhan ra tumimung ngai' sumambayang am mapataak ra taak akanon, taak simbalui koson mapabansuk ra guang ru Tuhan, taak simbalui koson paringkuanangan, taak-taak simbalui am taak simbalui wain, koson ra inaru' noyo ra moonong orou.

³⁸ Pangiantakan raginilo iono pinaruang paat ra orou Sabat ondo' kaindalaman, am taak raginilo iono pinaruang ra taak ondo' kaindalaman min taakin koson manugut ra gogoton kapoam tayar ru taak ondo' pataakon ayuk toojo ra Tuhan.

³⁹ Paat ra orou koopor am limo ra sila' katulu', mopongo kau mangkumos, musiti' kau mangiantak ra pangiantakan raginio buoi tulu' ngoorou. Orou kasaa' am orou kaampusan no iono orou timpokon ra tangusan.

⁴⁰ Paat ra orou kasaa', alapo' kawa' ondo' moonsoi kaga' intor ra puun kinawa' mino, am alapo' niayuk raun palma, raan ru tataun ondo' maawas raun, am puun tataun magana' ra nambusak intor ra kiing ru sungoi, am talimpuunin noyo pangiantakan makaansuk koson mangurumat ra Tuhan i Aki Kapuuno' mino.

⁴¹ Iantakon noyo pangiantakan raginio buoi tulu' ngoorou. Musiti' aturan ragitio gagayaan ru ngaangai' papag mino ra sabubuoi no.

⁴² Musiti' ngaangai' ulun ru Israil mayan giu' ra kalukub ru raun buoi tulu' ngoorou,

⁴³ maa' raginio papag mino makapandai ra nanusub Tuhan ra ulun ru Israil mayan giu' ra kalukub ru raun, paat Io nagibit risilo miningkual intor ra Misir. Io noyo Tuhan i Aki Kapuuno' min.

⁴⁴ Ginii noyo nangani' i Musa ra ulun ru Israil ra aturan-aturan koson mangiantak ra pangiantakan ru ugama ra tayar mangurumat ra Tuhan.