IMAMAT 18 - Tanou Moonsoi Timugon

Parulugan ondo' inggalarin

¹ Nanusub Tuhan ri Musa

² mambala' ra ulun ru Israil ra bala' ragitio, “Aku noyo Tuhan i Aki Kapuuno' min.

³ Pai' tiluo' binaal ru ulun giu' ra Misir, pagun inayanan min ragili, am pai' tiluo' binaal ru ulun giu' ra Kanaan, intok pagibitan Kuno ramuyun.

⁴ Gagayaa' noyo ukum Kuno am baalo' noyo atan panusuban Kuno. Aku noyo Tuhan i Aki Kapuuno' min.

⁵ Suguto' ngaangai' ukum am susuban ondo' taakin Kuno ramuyun. Ulun ondo' mambaal raginio maayag. Aku noyo Tuhan.”

⁶ Nanaak Tuhan ra aturan ragitilo. Pai' parulug ra pabukat muno.

⁷ Pai' asabi' ama' muno ra marulug ra ina' muno. Pai' asabi' ina' muno galama'.

⁸ Pai' asabi' ama' muno ra marulug ra sangulun intor ra andu' nano.

⁹ Pai' parulug ra pabukat ruandu' muno, ondo' kia ra pongkotob kapoam pansukapu, ondo' kia ra nasukor nabaya' rirun ra rondo' baloi kapoam giu' baloi ra bokon.

¹⁰ Pai' parulug ra akupu ruandu' muno. Baal ragitio magasab rirun galama'.

¹¹ Pai' parulug ra pabukat ruandu' muno, ondo' kia rondo' ama' nansuai ra ina' kapoam rondo' ina' nansuai ra ama', sabap io pana pabukat muno.

^12-13 Pai' parulug ra kaminan muno, ondo' kia pabukat ru ama' kapoam pabukat ru ina' muno.

¹⁴ Pai' parulug ra andu' ru kamaman muno; io kaminan mu niayuk.

¹⁵ Pai' parulug ra anak mangiwan ra ruandu' muno

¹⁶ kapoam along ra ruandu' muno.

¹⁷ Pai' parulug ra anak ruandu' kapoam akupu ruandu' ru sangulun ruandu' ondo' nakarulug noyo rirun. Maaru' lair mabukat ilo rirun, am baal raginio baal ondo' makauyuyu'.

¹⁸ Pai' paguot ra pabukat ruandu' ru andu' muno buoi ru andu' muno lakat poyo maayag.

¹⁹ Pai' parulug ra ruandu' ondo' tatanga' liuran, sabap majamol ruandu' no.

²⁰ Pai' parulug ra andu' ru ulun bokon, baal raginio mampajamol rirun.

²¹ Pai' pataako' sangulun intor ra anak muno alapon ra taak koson pataakon ra Dewa Molok, sabap ra baal raginio magasab ra inggalan ri Aki Kapuuno' muno, iono Tuhan.

²² Ungkuyon kalo parulugon ra ungkuyon ra bokon. Masisang i Aki Kapuuno' ra baal raginio.

²³ Ungkuyon kapoam ruandu', kalo toojo parulugon ra bibiag. Baal raginio mapajamol ramuyun.

²⁴ Pai' jamali' inan mino ra baal raginio. Kon noyo ginio bansa' raginilo ondo' minayan ra pagun Kanaan ra kalo poyo akau, napajamol noyo ra inan nilo. Ginio sabap ra napagiru' Tuhan risilo maa' raginio makaayan kau giu' ra pagun no.

²⁵ Binaal nilono napajamol ra pagun no. Ginio sabap ra nangukum Tuhan ra pagun no sabap ra baal majamol ondo' binaal ru mamagun ru pagun no.

^26-27 Nambaal ilo ra ngaangai' baal jajajou am niayuk napajamol ra pagun no, kaa' akau inggalarin mambaal raginio. Akau ngaangai', ondo' ulun ru Israil kapoam ulun bansa' ru bokon, musiti' gumagaya' ra ukum am susuban ru Tuhan.

²⁸ Kon raginio kalo pagiruon kau intor ra pagun no koson ra bansa'-bansa' ondo' minayan ra giu' i ra pinagiru' ragili.

²⁹ Makapandai kau ra osoi ondo' mambaal ra baal jajajou no, kalo boo karaan ra ulun ri Aki Kapuuno'.

³⁰ Indagu Tuhan, “Gagayaa' noyo susuban Kuno am pai' tilu ra binaal ru ulun ondo' minayan giu' ra pagun no ragili. Pai' jamali' inan muno ra mambaal ra baal raginio. Aku noyo Tuhan i Aki Kapuuno' min.”