IMAMAT 16 - Tanou Moonsoi Timugon

Orou pangampunan ra tula

¹ Kopongo minatoi ruo ngaulun anak ungkuyon ri Arun sabap ra nampataak ra apui ondo' kalo kasagaan ru Tuhan, indagu Tuhan ri Musa,

² “Balai' i Arun, maayo muno, ra paat ra ondo' inaru' ayuk, mokoongoi io ra talikuron ru tabir, mongoi ralalom ru Lamin Matulai Kaga', sabap ra giu' no mintalang Aku ralalom ru gaun rasawat ru tataub ru Kaban Nabantuan. Amon ru manggal i Arun ra susuban raginio, matoi io.

³ Makaumpos io ra ralalom ru Lamin Matulai Kaga' ra io mopongo ayuk magibit ra sanginan sapi' gawayan mamulok tayar ru taak simbalui koson mangampun ra tula am sanginan domba gawayan tayar ru taak simbalui koson mapabansuk ra guang ru Tuhan.”

⁴ Musiti' i Arun manutun ra aturan ragitilo. Kalo poyo mumpos i Arun ra Lamin Matulai Kaga', musiti' io mariu' am mambayang ra bayang ru imam; sukub, saluar mariwa', abot am serban, ondo' ngaangai' no binaal intor ra konoon linon.

⁵ Musiti' ulun ru Israil manaak ri Arun ra ruo ngainan kambing gawayan tayar ru taak simbalui koson mangampun ra tula, am sanginan domba gawayan tayar ru taak simbalui koson mapabansuk ra guang ru Tuhan.

⁶ Musiti' io mapataak ra sanginan sapi' gawayan tayar ru taak simbalui koson mamuso ra tula nano galama' am tula ru sasambaloi nano.

⁷ Musiti' io magibit boo ra ruo ngainan kambing no giu' ra kulobon ru Kim ru Tuhan.

⁸ Giu' no musiti' no undion mampakai ra ruo batu: ondo' tatanduin rondo' no ra “Tayar ru Tuhan ” am rondo' poyo tatanduin ra “Tayar ru Ajajil ”.

⁹ Simbaluyon ri Arun kambing ondo' napili' ra tayar ru Tuhan, am pataakon ginio ra tayar ru taak simbalui koson mangampun ra tula.

¹⁰ Kambing ondo' napili' ra tayar ru Ajajil, musiti' pataakon ra io biag no ra Tuhan, am palabuson giu' ra tana' kaagisan tayar ru Ajajil maa' raginio tula ru ulun ru Israil pusoon.

¹¹ Makataak ri Arun sapi' gawayan no tayar ru taak simbalui koson mangampun ra tula nano galama' am sasambaloi nano,

¹² musiti' io magibit rondo' intok ru baa ondo' nototop ra baa ru apui intor ra altar am ruo ngogonggom kaminyan malumot, ibiton boo ngaangai' no mumpos ralalom ru Lamin Matulai Kaga'.

¹³ Giu' no, giu' ra saang ru Kaban Nabantuan, musiti' io monolob ra kaminyan no am lisun ru kaminyan no manaub ra tataub ru Kaban Nabantuan maa' raginio tataub no kalo makito ri Arun; amon ru makito no tataub no, matoi io.

¹⁴ Musiti' io mangalap sanganu ra raraa' ru sapi' gawayan no, am ra bubua' ru kalindu' nano patakison raraa' no tampilon saang ru tataub ru Kaban Nabantuan am intulu' giu' ra saang ru Kaban no.

¹⁵ Musiti' i Arun manimbalui boo ra kambing no tayar ra taak simbalui koson mangampun ra tula ru ulun ru Israil. Musiti' io magibit ra raraa' ru kambing no mumpos ralalom ru Lamin Matulai Kaga', am mapatakis ra raraa' no giu' ra rasawat ru tataub ru Kaban Nabantuan am giu' ra saang ru Kaban no koson ra ondo' binaal no noyo ra raraa' ru sapi' gawayan no.

¹⁶ Kon ragitio noyo io nambaal ra upacara koson mapatulai ra Lamin Matulai Kaga' intor ra kajamalan ru ulun ru Israil am intor ra ngaangai' tula nilo. Musiti' io mambaal ra upacara ragitio tayar ru tampilon ra bokon no ra Kim ru Tuhan sabap ra Kim no soroi ra tatanga' ru pangkiman ondo' majamol.

¹⁷ Kolondo' sangulun pana posoroyon ralalom ru Kim ru Tuhan, intor ra paat umpasan ri Arun ra ralalom ru Lamin Matulai Kaga' koson mambaal ra papatulayan, saboi ra ingkualan nano saguli'. Makapambaal io ra upacara raginio tayar riso galama', tayar ru sasambaloi nano, am tayar ru ngaangai' ulun ru Israil,

¹⁸ musiti' io mongoi ra altar intok monolob ra taak simbalui koson mapabansuk ra guang ru Tuhan, maa' raginio mapapasau ra altar no. Musiti' io mangalap sanganu ra raraa' ru sapi' gawayan am sanganu raraa' ru kambing, pakupilon boo raraa' no ra sangau ra pisuk ru altar.

¹⁹ Ra bubua' ru kalindu' nano boo, musiti' io mapatakis ra raraa' no ra rasawat ru altar suang intulu'. Kon ragitio noyo io mapapasau ra altar no intor ra jamol ru ulun ru Israil, am mapasauk ra altar no mapasau.

Kambing pansaanon ra tula

²⁰ Pakapambaal i Arun ra upacara mapatulai ra Lamin Matulai Kaga', tayar ra bokon ra Kim ru Tuhan am altar, am tayar ru Tuhan, musiti' io mapataak ra kambing gawayan ra biag ondo' pinili' ra tayar ru Ajajil.

²¹ Musiti' i Arun mapabanta' ra karuo-ruo kalindu' nano ra rasawat ru ulu ru kambing no am mangiou ra ngaangai' kalaatan, tula am ginuaran ru ulun ru Israil. Ginio noyo ra ngaangai' tula ru ulun ru Israil patapikon ra rasawat ru ulu ru kambing no. Musiti' kambing no anjungon boo giu' ra tana' kaagisan ru sangulun ondo' sinusub noyo mapaugar raginio.

²² Magibit kambing no ra ngaangai' tula ru ulun ru Israil maalur giu' ra tana' kolondo' tutuu', ondo' kalo inayanan ru ulun. Palabuson boo kambing no giu' ra tana' kaagisan.

²³ Mopongo raginio musiti' i Arun mumpos ra ralalom ru Kim ru Tuhan, mangalus ra bayang ru imam ondo' binayang nano paat ra io mumpos ra Lamin Matulai Kaga', am posoroyon bayang no ra giu' no.

²⁴ Musiti' io mariu' giu' ra rondo' intok ondo' inaru' ra mapasau, bayangon no boo bayang nano galama'. Mopongo raginio musiti' io mingkual, mampataak boo ra taak simbalui koson mapabansuk ra guang ru Tuhan, tayar ru mamuso ra tula nano galama' am tula ru ulun ru Israil.

²⁵ Musiti' io monolob ra lomok ru bibiag ondo' pataakon tayar ru taak simbalui koson mangampun ra tula, giu' ra rasawat ru altar.

²⁶ Ulun ondo' mapalabus ra kambing gawayan tayar ru Ajajil giu' ra tana' kaagisan, musiti' mampupu' ra bayang nano am mariu' ra kalo poyo muli' ra pangkiman.

²⁷ Sapi' gawayan am kambing ondo' pataakon tayar ru taak simbalui koson mangampun ra tula, am ondo' raraa' no ibiton giu' ra ralalom ru Lamin Matulai Kaga' tayar mamuso ra tula, musiti' ibiton mingkual giu' ra liwar ru pangkiman am solobon. Kungkung, kual am tinai' ru karuruo bibiag no musiti' solobon ngaangai' no.

²⁸ Ulun ondo' monolob no musiti' mampupu' ra bayang nano am mariu' ra kalo poyo muli' ra pangkiman.

Ralan mangiantak ra orou pangampunan ra tula

²⁹ Aturan ragitilo musiti' gagayaan ra sabuoi-buoi no. Paat ra orou ra koopor sila' katulu', ulun ru Israil am ulun bansa' ru bokon ondo' siminimpung risilo, musiti' mampali am kalo pongondoyon.

³⁰ Paat ra orou raginio musiti' baalon upacara mamasau risilo intor ra ngaangai' tula maa' raginio mapasau ilo.

³¹ Orou raginio iono orou ondo' matulai kaga', paat ra ulun ru Israil mampali am lingon kalo mangandoi. Musiti' aturan ragitilo gagayaan ra sabuoi-buoi no.

³² Tingganai Maayo Imam ondo' patimpokon noyo koson sumuali ra ama' nano, am palilion ayuk ri Aki Kapuuno', musiti' mambaal ra upacara pamasawan. Musiti' io mambayang ra bayang ru imam,

³³ am mambaal ra upacara papatulayan ra Lamin Matulai Kaga', tampilon ra bokon ru Kim ru Tuhan, altar, imam-imam am ngaangai' ulun ru Israil.

³⁴ Aturan ragitilo musiti' gagayaan ra sabuoi-buoi no. Musiti' baalon upacara ragitio igondo' sambilor koson mapapasau ra ulun ru Israil intor ra ngaangai' tula nilo. Ginio ra, baalon ngaangai' no koson ra nanusuban ru Tuhan ri Musa.