IMAMAT 13 - Tanou Moonsoi Timugon

Aturan intor ra maruol ru kungkung ondo' maaja'

¹ Nanaak Tuhan ri Musa am i Arun ra aturan ragitio.

² Amon ru sasangulun no manduruko, mantalipos kapoam lumia' kungkung nano, ondo' maaru' lair masauk ra maruol ru kungkung ondo' maaja', musiti' io paumaan ra imam papag ri Arun.

³ Ilain ru imam no kagal ru ulun no, am amon ru bulu ru kungkung ra giu' no mapulak noyo am kungkung no malandom noyo intor ra kungkung ru kiing nano, ruruko no maruol ru kungkung ondo' maaja'. Mailayan ru imam ulun no, musiti' no potonowon ra majamol ulun no.

⁴ Amon ru ruruko no mapulak kaa' kalo malandom intor ra kungkung ra kiing nano am kalo mapulak bulu ru kungkung, musiti' pasuayon ru imam no ulun raginio buoi tulu' ngoorou.

⁵ Paat ra orou katulu', musiti' ilain poyo ru imam no ulun raginio, am amon ru guang ru imam no ruruko no lakat poyo koson ayuk raginio am kalo gumaai, musiti' pasuayon no ulun raginio buoi katuluan poyo.

⁶ Paat ra orou katulu', musiti' ilain poyo ru imam no ulun raginio. Amon ru mapali' galing noyo ruruko nano am kalo gumaai, musiti' imam no mapatanou ra mapasau ulun no. Musiti' ulun no mampupu' ra bayang nano am mapasau io boo. Ruruko raginio ruruko ayuk toojo.

⁷ Kaa' amon ru gumaai kagal ru ulun no ra mopongo inilayan ru imam am nakatanou ra mapasau io, musiti' ulun no muma' poyo ra imam.

⁸ Musiti' imam no magilong poyo ra ulun raginio, am amon ru totopot gumaai ruruko no, musiti' imam no mapatanou ra majamol ulun no. Ruruko no maruol ru kungkung ondo' maaja'.

⁹ Paat ra sasangulun marualan ra kungkung ondo' maaja', musiti' io paumaan ra imam.

¹⁰ Ilain io ru imam no. Amon ru mapandayan ru imam ra ruruko ra kungkung ru ulun no mapulak, mampunana' am mapulak bulu ru kungkung no,

¹¹ ruruko no maruol ru kungkung ondo' maaja'. Musiti' imam no mapatanou ra majamol ulun no. Kalo pana pasuayon ulun no sabap ra napandayan noyo ra majamol io.

¹² Amon ru gumaai maruol ru kungkung no intor ra ulu saboi ra kalayam,

¹³ musiti' ilain poyo ru imam no ulun raginio. Amon ru mapandayan ru imam ra maruol no totopot nakai' noyo titikop inan ru ulun no, musiti' imam no mapatanou ra mapasau ulun no. Amon ru mapulak noyo titikop ru kungkung nano, mapasau ulun no.

¹⁴ Kaa' makaujak ayuk ruruko ondo' makanana', majamol ulun no.

¹⁵ Musiti' ilain poyo ru imam no ulun raginio, am amon ru mapandayan ru imam ra ruruko ru ulun no makanana', musiti' imam mapatanou ra majamol ulun no. Ruruko makanana' iono maruol ru kungkung ondo' maaja', am majamol ulun no.

¹⁶ Kaa' amon ru mapali' kungkung no am mapulak saguli', musiti' ulun no muma' ra imam

¹⁷ ra ilain poyo. Amon ru mapulak noyo ruruko nano, mapasau ulun no, am musiti' potonowon ra mapasau ulun no.

¹⁸ Amon ru sasangulun makatalipos ondo' napali' noyo,

¹⁹ kaa' tauli no babaya' ru talipos no makalanit mapulak kapoam lanit mapulak ra malia'-lia', musiti' muma' ulun no ra imam.

²⁰ Ilain io ru imam, am amon ru lanit no malandom poyo intor ra kungkung ra kiing nano, am bulu ru kungkung ra giu' no mapulak noyo, potonowon ru imam ra majamol ulun no. Maruol nano maruol ru kungkung ondo' maaja' ondo' minuun ra talipos no.

²¹ Kaa' amon ru ilain ru imam no talipos no am mapandayan ra bulu ru kungkung ra giu' no kalo mapulak, am tayar raginio kalo malandom poyo intor ra kungkung ra kiing nano, kaa' mabula' poyo, musiti' pasuayon ru imam no ulun raginio buoi katuluan.

²² Amon ru lanit no gumaai, moonsoi potonowon ru imam no ra majamol ulun no. Marualan ulun no ra kungkung ondo' maaja'.

²³ Kaa' amon ru kalo makulau am kalo gumaai lanit no, babaya' intor ra talipos ayuk lanit no, am musiti' potonowon ru imam no ra mapasau ulun no.

²⁴ Paat malinsu kungkung ru sasangulun, am kungkung ra napilat no mapulak kapoam mapulak ra malia'-lia',

²⁵ musiti' io ilain ru imam. Amon ru bulu ru kungkung ra lanit no mapulak am malandom poyo intor ra kungkung ra kiing nano, maruol nano maruol ru kungkung ondo' maaja', ondo' minuun intor ra kungkung ondo' malinsu. Musiti' potonowon ru imam no ra majamol ulun no.

²⁶ Kaa' amon ru bulu ru kungkung ra lanit no kalo mapulak am lanit no kalo malandom poyo intor ra kungkung ra kiing nano, kaa' makito mabula' poyo, musiti' pasuayon ru imam no ulun raginio buoi katuluan.

²⁷ Paat orou ra katulu', musiti' ilain poyo ru imam no ulun raginio. Amon ru gumaai lanit no, marualan io ra kungkung ondo' maaja'. Musiti' potonowon ru imam no ra majamol ulun no.

²⁸ Kaa' amon ru lanit no kalo makulau am kalo gumaai, kaa' ilain ra mabula' poyo, lanit no sala' ka maruol ru kungkung ondo' maaja'. Musiti' potonowon ru imam no ra mapasau ulun no; babaya' ayuk ru nalinsu lanit no.

²⁹ Paat manduruko sangulun ungkuyon kapoam ruandu' ra ulu kapoam salura nano,

³⁰ musiti' io ilain ru imam. Amon ru ruruko no malandom poyo intor ra kungkung ra kiing nano, am bulu kapoam jangut ra ruruko no masisilou am sanganu, marualan ulun no ra kungkung ondo' maaja'. Musiti' potonowon ru imam no ra majamol ulun no.

³¹ Amon ru mapandayan ru imam ondo' nagilong riso no ra ruruko no kalo malandom poyo intor ra kungkung ra kiing nano, kaa' kolondo' poyo bulu kapoam jangut ondo' moonsoi ra giu' no, musiti' pasuayon ru imam no io buoi katuluan.

³² Paat orou ra katulu', musiti' io ilain poyo ru imam am amon ru ruruko no kalo gumaai am kolondo' bulu kapoam jangut ondo' masisilou ra giu' no, am ruruko no kalo malandom poyo intor ra kungkung ra kiing nano,

³³ musiti' kauron ru ulun no bulu kapoam jangut nano, ondo' ayuk am kiing ru ruruko no, am musiti' pasuayon ru imam no io buoi katuluan poyo.

³⁴ Paat orou ra katulu', musiti' ruruko no ilain igondo' poyo ru imam no. Amon ru kalo gumaai ruruko no, am kalo malandom poyo intor ra kungkung ra kiing nano, musiti' potonowon ru imam ra mapasau ulun no. Musiti' pupuin ru ulun no bayang nano am mapasau io boo.

³⁵ Kaa' amon ru gumaai ruruko no ra makatanou noyo ra mapasau ulun no,

³⁶ musiti' ilain igondo' poyo ru imam no io. Amon ru giminaai noyo ruruko no, kalo pana maguyum imam ra bulu kapoam jangut ondo' masisilou riso sabap napandayan noyo ra majamol ulun no.

³⁷ Kaa' amon ra guang ru imam ra kalo gumaai ruruko no, am mokoondo' ra bulu kapoam jangut ondo' moonsoi ra tayar raginio, napali' noyo ruruko no. Musiti' potonowon ru imam ra mapasau ulun no.

³⁸ Paat makalanit mapulak ra kungkung ru sangulun ungkuyon kapoam ruandu',

³⁹ musiti' ilain ru imam no ulun raginio. Amon ru mapulak ra mabula' lanit no, lanit raginio sosorom ayuk am mapasau ulun no.

^40-41 Amon ru naampakan sasangulun ungkuyon tampilon ra saang am tampilon ra bakulung ru ulu nano, kalo majamol ulun no.

⁴² Kaa' amon ru mokoondo' mamutining ondo' mapulak ra malia'-lia' giu' ra ampak no, mamutining no maruol ru kungkung ondo' maaja'.

⁴³ Musiti' ilain ru imam no ulun raginio, am amon ru makaruruko ondo' mapulak ra malia'-lia',

⁴⁴ musiti' potonowon ru imam ra majamol ulun no, sabap ra ruruko ra ulu nano maruol ru kungkung ondo' maaja'.

⁴⁵ Musiti' sasangulun ondo' marualan ra kungkung ondo' maaja' mambayang ra ondo' marilak am mopoloso ra masasung abuk nano. Musiti' siliin no ragana' ru bulos nano am gumolok, “Majamol! Majamol!”

⁴⁶ Magulayun io majamol buoi ra io marualan. Musiti' io mayan ra liwar ru pangkiman, sumuai intor ra ulun bokon.

Aturan intor ra kulapuk

⁴⁷ Amon ru mokoondo' ra kulapuk ra bayang ondo' binaal intor ra bulu domba kapoam linon,

⁴⁸ kapoam giu' ra putul ru konoon linon kapoam konoon intor ra bulu domba, kapoam giu' ra kungkung kapoam atan ayuk ondo' binaal intor ra kungkung,

⁴⁹ am amon ru batik ru kulapuk no masasansam kapoam malia'-lia', kulapuk no salinut ondo' gumaai, am musiti' pakitonon ra imam.

⁵⁰ Musiti' ilain ginio ru imam, am pasuayon kuliamos no buoi katuluan.

⁵¹ Paat orou ra katulu', musiti' ilain poyo ru imam no kuliamos no. Amon ru gumaai kulapuk no, majamol kuliamos no.

⁵² Musiti' kuliamos no solobon ru imam sabap kulapuk no salinut ondo' gumaai am musiti' solobon.

⁵³ Kaa' amon ru sumugut ra pagilayan ru imam, kalo gumaai kulapuk no ra kuliamos no,

⁵⁴ musiti' manusub imam no ra pupuin kuliamos no am pasuayon buoi katuluan.

⁵⁵ Mopongo raginio musiti' ilain ru imam no kuliamos raginio. Amon ru kalo makulau batik ru kulapuk no, kabalu' pana kalo gumaai, lakat poyo majamol kuliamos no. Musiti' solobon ngaangai' kuliamos no, kabalu' pana ondo' natiu' ra kulapuk no tampilon ayuk ra saang kapoam tampilon ra bakulung.

⁵⁶ Kaa' paat ra kulapuk no ilain poyo ru imam, am mapandayan ra nakulau noyo batik ru kulapuk no, musiti' rilakon no tampilon raginio intor ra bayang kapoam kuliamos ru kungkung no.

⁵⁷ Amon ru mujak saguli' kulapuk no, baal ragitio makaarati' ra gumaai poyo kulapuk. Musiti' solobon ru tatangan no kuliamos raginio.

⁵⁸ Amon ru malulu' kulapuk no ra mapupuan, musiti' pupuin poyo kuliamos no, am mapasau boo kuliamos no.

⁵⁹ Gitilo noyo aturan intor ra kulapuk ra bayang ondo' binaal intor ra bulu domba kapoam linon, kapoam giu' ra konoon linon kapoam konoon intor ra bulu domba, kapoam ra atan ayuk ondo' binaal intor ra kungkung. Gitio noyo ralan no koson mangaru' ru rorondo' kuliamos no mapasau kapoam majamol.