IMAMAT 10 - Tanou Moonsoi TimugonTula ri Nadab am i Abigu 1 Paat ra sangarawan, anak-anak ri Arun, i Nadab am i Abigu, nagibit ra intok ru apui nilo sigagama' am suangi' ra baa ru apui. Anii' nilo ra kaminyan rasawat ru baa no, am pataako' ginio ra Tuhan. Kaa' kalo mapasau apui no, sabap ra kalo nanusub Tuhan risilo mapataak raginio. 2 Pulali' ru Tuhan naparatong ra apui, ondo' nonolob risilo saboi minatoi ra giu' no niayuk, giu' ra ralalom ru Kim ru Tuhan. 3 Indagu boo i Musa ri Arun, “Gitio noyo ondo' koon ru Tuhan paat Io mindagu, ‘Ngaangai' ulun ondo' mangandoi ayuk Raki' musiti' mangurumat ra katulayan Kuno. Pakitonon Ku katulayan Kuno ra moonong ulun Kuno.’ ” Kaa' mongkoror ayuk i Arun. 4 Pampiau boo i Musa ri Misail am i Ilsapan, anak ilo ri Ujiil, kamaman ri Arun. Indagu i Musa risilo, “Ibok, ibito' baangkai ru pantukir minti mingkual intor ra Kim ru Tuhan, am pabantaa' min baangkai no giu' liwar ru pangkiman.” 5 Ratong ilo am kayango' baangkai no ra nampaguut ra bayang ru baangkai no, am ongoi boo ra liwar ru pangkiman, koson ra nanusuban ri Musa. 6 Kopongo raginio indagu i Musa ri Arun am anak-anak nano, i Iliajar am i Itamar, “Pai' polosoo' masasung abuk mino, am pai' rilako' bayang mino koson tatandu' ra mangulir. Amon ru baalon min ginio, matoi kau am sumangit Tuhan ra ngaangai' ulun ti. Kaa' ngaangai' ulun ru Israil ra bokon no makapangulir ra pinatayan nilo ruo; minatoi ilo sabap natiu' ra apui ondo' pinatuun ru Tuhan. 7 Pai' kau ingkual ra buoi intor ra kulobon ru Kim ru Tuhan. Amon ru mingkual kau, matoi kau sabap ra patimpokon kau noyo ra umau upacara mangandoi ayuk ra Tuhan.” Sinugut nilo nanusuban ri Musa. Aturan tayar ru imam-imam 8 Indagu Tuhan ri Arun, 9 “Pai' noyo okou am anak-anak muno umpos ralalom ru Kim ru Tuhan ra mopongo manginum ra wain kapoam inumon makagauk. Amon ru mumpos kau, matoi kau. Gitio noyo aturan ondo' musiti' gagayaan ru ngaangai' papag muno. 10 Musiti' kau makapandai mapasuai ra atan ondo' paluntukon ri Aki Kapuuno' am atan ondo' kalo, am atan ondo' kalo majamol am atan ondo' majamol. 11 Musiti' min ilaan ulun ru Israil ra ngaangai' ukum ondo' tinaakan Ku noyo ramuyun ondo' pinabala' galing ri Musa.” 12 Indagu boo i Musa ri Arun am karuo-ruo anak nano ondo' lakat poyo maayag, i Iliajar am i Itamar, “Alapo' suwo ru taak simbalui koson paringkuanangan intor ra akanon ondo' pinataak ra Tuhan, am pambaal ra ruti' ondo' kalo latakin ra ragi intor ra tapung no. Akanon boo ruti' no ra sapapa' ru altar sabap ra taak simbalui ragitio matulai kaga'. 13 Akano' ruti' no giu' ra intok ondo' matulai. Ruti' ti intor ra akanon ondo' pinataak noyo ra Tuhan; ruti' ti tayar muno am anak-anak ungkuyon muno. Gitio noyo ondo' nanusuban ru Tuhan raki'. 14 Kaa' okou am anak-anak muno, ungkuyon am ruandu' makaakan ra kubab ondo' pinataak koson ra taak lilion am niayuk paa ru bibiag ondo' pataakon koson ra taak lilion, sabap ra ngaangai' no longgom ru imam-imam. Maakan min ginio ra ati ayuk intok ondo' kalo majamol. Taak ti iono tayar intor ra taak simbalui koson makibarakat ra Tuhan, ondo' pataakon ru ulun ru Israil. Pinataak noyo taak no rirun am anak-anak muno koson ra longgom min. 15 Musiti' ulun ru Israil magibit ra paa am kubab ru bibiag no paat ra ilo mapataak ra lomok no koson ra taak akanon ra Tuhan. Tayar ragitio longgom muno am anak-anak muno ra sabuoi-buoi no, koson ra nanusuban ru Tuhan.” 16 Paat ri Musa mangkuot intor ra kambing tayar ru taak simbalui koson mangampun ra tula, binalaan io ra sinolob noyo kambing no. Gitio nangkinibit ri Musa sumangit ri Iliajar am i Itamar. Kon ri Musa, 17 “Kua kia kalo inakan min taak simbalui koson mangampun ra tula no giu' ra intok ondo' matulai? Taak simbalui raginio matulai kaga' am nanaak noyo Tuhan raginio ramuyun maa' raginio ampunon tula ru ulun ru Israil no. 18 Sabap ra kalo inibit raraa' ru kambing no giu' ralalom ru Kim ru Tuhan, musiti' kau mangakan ra taak simbalui no giu' ra intok inaru' ayuk, sumugut ra nanusuban kuli.” 19 Taam i Arun, “Amon ru inakan ku taak simbalui koson mangampun ra tula no ra orou raiti', mapabansuk kia ginio ra guang ru Tuhan? Napataak ulun ru Israil ra taak simbalui koson mangampun ra tula nilo ra Tuhan ra orou raiti', am niayuk nagibit ra taak simbalui koson mapabansuk ra guang ru Tuhan, kaa' baal ondo' makalalaa' ti nasauk raki'.” 20 Pakaining i Musa ra taam no, naansayan io. |
Hakcipta © Bible Society of Malaysia, 2013.
Bible Society of Malaysia