IMAMAT 1 - Tanou Moonsoi Timugon

Taak simbalui koson mapabansuk ra guang ru Tuhan

¹ Intor ralalom ru Kim ru Tuhan, pampiau Tuhan ri Musa am pangani' riso ra aturan.

² Aturan raginio musiti' suguton ru ulun ru Israil. Paat ra sasangulun mapataak ra bibiag koson ra taak simbalui, makapapataak io ra sapi', domba kapoam kambing. Taak simbalui no musiti' solobon saboi makai' giu' ra rasawat ru altar gangsa'.

³ Amon ru mapataak io ra sanginan intor ra sapi' nano koson taak simbalui koson mapabansuk ra guang ru Tuhan, musiti' io mapataak ra sapi' gawayan ondo' kalo najamaran. Sapi' no musiti' ibiton no ra kulobon ru Kim ru Tuhan maa' raginio maansayan Tuhan ra ulun no.

⁴ Musiti' ulun no mapabanta' ra kalindu' nano ra tampak ru ulu ru sapi' no maa' raginio taak nano apuon ru Tuhan koson taak simbalui koson mangampun ra tula nano.

⁵ Sapi' ungkuyon no musiti' simbaluyon ra giu' no niayuk, am imam-imam ra papag ri Arun musiti' mapataak ra raraa' ru sapi' no ra Tuhan, am pawason raraa' no ra kaapat-apat sapapa' ru altar ondo' pinabanta' ra kulobon ru Kim ru Tuhan.

⁶ Musiti' boo sapi' no anitin ru ulun no ra kungkung am tataan.

⁷ Makapantuum ru imam-imam luton ra rasawat ru altar am niayuk mapaangan apui,

⁸ musiti' nilo pabantaan tinata'-tinata' ra sapi' no ra rasawat ru apui, makaaya' niayuk ulu am lomok no.

⁹ Ulun no musiti' mambagu' ra kalabuat am paa ru sapi' no, am ngaangai' taak simbalui no musiti' solobon ru imam ondo' mangandoi no ra rasawat ru altar. Owou ru taak ra akanon no mapabansuk ra guang ru Tuhan.

¹⁰ Amon ru mapataak ulun no ra sanginan intor ra domba kapoam kambing nano, bibiag no musiti' ungkuyon am kalo najamaran.

¹¹ Bibiag no musiti' simbaluyon tampilon ralayo ru altar, am raraa' ru bibiag no musiti' pawason ru imam-imam ra kaapat-apat sapapa' ru altar.

¹² Matata' ru ulun no bibiag no, musiti' pabantaan ru imam-imam ra rasawat ru apui ngaangai' tinata' no, makaaya' niayuk ulu am lomok no.

¹³ Musiti' ulun no mambagu' ra kalabuat am paa ru bibiag no. Musiti' imam-imam boo mapataak ra ngaangai' taak simbalui no ra Tuhan, am niayuk ngaangai' no solobon ra rasawat ru altar. Owou ru taak ra akanon no mapabansuk ra guang ru Tuhan.

¹⁴ Amon ru mapataak ulun no ra sanginan susuit koson ra taak simbalui koson mapabansuk ra guang ru Tuhan, musiti' susuit maningkuluuk kapoam susuit asang ra mamulok.

¹⁵ Musiti' imam magibit ra susuit no ra altar, am piloson liog no am solobon ulu no ra rasawat ru altar. Raraa' ru susuit no musiti' pawason ra kiing ru altar.

¹⁶ Bambalangan am ngaangai' suang no musiti' patirin tampilon ra sirangon ru altar, intok pamatiran ra kaau.

¹⁷ Susuit no musiti' binsangon ra puun ru kawo, kaa' kalo pandakon kawo no. Musiti' boo solobon susuit no ra rasawat ru altar. Owou ru taak ra akanon no mapabansuk ra guang ru Tuhan.