IJRA 8 - Tanou Moonsoi Timugon

Ulun pinatiran ondo' siminaguli' nabaya' ri Ijra

¹ Gitio no suang ru tingganai ru bansa' ondo' pinatiran ra pagun Babilonia, am ondo' siminaguli' nababaya' raki', i Ijra, giu' ra Jirusalim paat ra pamarintaan ru Raja' Artasasta:

^2-14 I Girsom, intor ra bansa' ru Pinigas, i Danil, intor ra bansa' ru Itamar, i Gatus anak ri Sikania, intor ra bansa' ri Daut, i Jakaria, intor ra bansa' ri Paros, nababaya' ra 150 ngaulun ungkuyon intor ra bansa' nano (mokoondo' tinulisan intor ra inggalan ru kinamatuaan nilo), i Ilyoinai anak ri Jiragya, intor ra bansa' ru Pagat-Moab, mabaya' ra 200 ngaulun ungkuyon, i Sikania anak ri Jagajiil, intor ra bansa' ru Jatu, mabaya' ra 300 ngaulun ungkuyon, i Ibid anak ri Jonatan, intor ra bansa' ru Adin, mabaya' ra 50 ngaulun ungkuyon, i Jisaya anak ri Atalia, intor ra bansa' ru Ilam, mabaya' ra 70 ngaulun ungkuyon, i Jibadia anak ri Maikol, intor ra bansa' ru Sipatia, mabaya' ra 80 ngaulun ungkuyon, i Obaja anak ri Jiwil, intor ra bansa' ru Joab, mabaya' ra 218 ngaulun ungkuyon, i Silomit anak ri Josipia, intor ra bansa' ru Bani, mabaya' ra 160 ngaulun ungkuyon, i Jakaria anak ri Bibai, intor ra bansa' ru Bibai, mabaya' ra 28 ngaulun ungkuyon, i Joganan anak ri Gakatan, intor ra bansa' ru Ajgad, mabaya' ra 110 ngaulun ungkuyon, i Ilipilit, Jiwil am Simaya, intor ra bansa' ru Adonikam, mabaya' ra 60 ngaulun ungkuyon, (ilo tauli minuli'), i Utai am Jakur, intor ra bansa' ru Bigwai, mabaya' ra 70 ngaulun ungkuyon.

Tinimung ri Ijra ulun ru Liwi koson mangandoi giu' ra Baloi ru Tuhan

¹⁵ Nanimung aku ra ngaangai' ulun raginio giu' ra igig ru sungoi ondo' tumilis mongoi ra bandar Agawa, am nangkim akai ra giu' no buoi talu ngoorou. Natutunan ku ra mokoondo' kukula' ngaulun imam ra gino ngai' ilo kaa' kolondo' ulun ru Liwi.

¹⁶ Ginio ra nampiau aku ra siam ngaulun intor ra tingganai-tingganai: I Iliijir, Aril, Simaya, Ilnatan, Jarib, Ilnatan, Natan, Jakaria, Misulam am ruo ngaulun mangingila', iono Joyarib am Ilnatan.

¹⁷ Aku pana nanusub boo risilo muma' ri Ido, tingganai ru ulun manampagun giu' ra Kasipia, koson makitaak riso am rangan-rangan nano, iono ulun-ulun mangngandoi ra Baloi ru Tuhan, maa' raginio mangani' ramon ra ulun koson mangandoi giu' ra Baloi ru Tuhan.

¹⁸ Sabap no ra kinoonsoi ru guang ri Aki Kapuuno', nangani' ilo ramon ri Siribia, sangulun Liwi ondo' maligag intor ra bansa' ru Magli. Nababaya' ra Siribia, minatong niayuk anak-anak nano am pabukat-pabukat nano, ra suang no mopor am balu' ngaulun.

¹⁹ Ilo niayuk nanusub ri Gasabia am i Jisaya intor ra bansa' ru Mirari, nababaya' ra 20 ngaulun pabukat nilo.

²⁰ Suai raginio, mokoondo' poyo 220 ngaulun mangngandoi ra Baloi ru Tuhan ondo' tinulisan inggalan. Ilo noyo papag ru ulun ondo' pinangandoi ru Raja' Daut am pagawai-pagawai nano koson mangindangan ra ulun ru Liwi.

Naningganai i Ijra ra ragili ulun pinatiran koson makiasi' am mampali

²¹ Kopongo raginio, giu' ra igig ru Sungoi Agawa, nampatanou aku ra musiti' akai mampali am minggana' guang ra saang ri Aki Kapuuno'. Makiasi' akai maa' raginio maningganai Io ramon ralalom pangkiralanan am manindung ramon, anak-anak maino, am ngaangai' longgom maino.

²² Manangguang aku makitaak ra pulalai mangkuda intor ra raja' koson magalung ramon intor ra pamulunsaran ru pantula' ralalom ru pangkiralanan. Binaal ku koon raginio sabap ra mambala' aku ra raja' ra i Aki Kapuuno' takau nambarakat ra moonong ulun ondo' lumansan Riso, kaa' sumangit Io am mangukum ra osoi pana ondo' kalo gumagaya' Riso.

²³ Koon raginio noyo akai nampali am nakiasi' maa' raginio i Aki Kapuuno' nanindung ramon, am Io pana nangiou ra pakiasian mai.

Taak tayar ra Baloi ru Tuhan

²⁴ Intor ra imam-imam ondo' nangauligan kaga', nampili' aku ra mopor am ruo ngaulun: I Siribia, Gasabia am mopor ngaulun poyo.

²⁵ Aku pana nanimbang ra pirok, mas am kuliamos ondo' tinaakan ru raja', ulun-ulun maminson am niayuk pagawai-pagawai nano, am niayuk bansa' ru Israil koson pakayon giu' ra ralalom Baloi ru Tuhan. Pinataak ku ngaangai' no ra imam-imam.

^26-27 Gitilo noyo suang ru tinaak raginio: pirok 22 tan 100 kuliamos pirok 70 ngakilogram mas 3,400 ngakilogram 20 mangkuk mas 8.4 ngakilogram 2 mangkuk tambaga' kopoyo, ondo' nogondo' logo ra mangkuk mas

²⁸ Indagu aku risilo, “Akau ti timpokon ayuk ra tayar ru Tuhan, i Aki Kapuuno' ru kinamatuaan takau. Koon raginio niayuk ngaangai' kuliamos intor ra pirok am mas ondo' pinataak koson ra taak lilion ayuk ra Tuhan ayuk.

²⁹ Alungi' kuliamos-kuliamos raginio ra matanda' saboi ra akau makasuku' giu' ra Baloi ru Tuhan. Giu' no ra maagu no, giu' ra lamin ru imam, timbango' noyo ngaangai' kuliamos raginio am pataako' noyo ra tingganai-tingganai ru imam, ulun ru Liwi am tingganai ru bansa' ru Israil giu' ra Jirusalim.”

³⁰ Koon raginio noyo imam-imam am ulun ru Liwi nangapu ra pirok, mas am kuliamos no am inibit ginio giu' ra Baloi ru Tuhan giu' ra Jirusalim.

Nakasaboi ra Jirusalim

³¹ Nangiruan akai ra Sungoi Agawa paat ra orou koopor am ruo ra sila' kasaa' am minongoi ra Jirusalim. Ralalom pangkiralanan, i Aki Kapuuno' mai nabaya' am nanindung ramon intor ra awangin am bulunsaron ru pantula'.

³² Pakasaboi akai giu' ra Jirusalim, timinangus akai buoi talu ngoorou.

³³ Paat ra orou kaapat, siminubol akai ra Baloi ru Tuhan, am nanimbang ra pirok, mas am kuliamos ra bokon. Kopongo raginio pinataak mai ginio ra Imam Mirimot anak ri Uria ondo' tinainuan ri Iliajar anak ri Pinigas am ruo ngaulun Liwi, ilo no i Jojabad anak ri Jisua am i Noaja anak ri Binui.

³⁴ Ngaangai' kuliamos no inuntob am tinimbang, am tinulisan ngai' ondo' binaal paat raginio niayuk.

³⁵ Paat ra orou raginio niayuk, ngaangai' ulun ondo' minuli' intor ra pamatiran, nampataak ra taak simbalui koson mapabansuk ra guang ru Tuhan, i Aki Kapuuno' ru Israil. Nampataak ilo ra 12 ngainan sapi' gawayan ra tayar ru ngaangai' ulun ru Israil, 96 ngainan domba gawayan am 77 ngainan anak domba. Nampataak ilo niayuk ra 12 ngainan kambing ra tayar ru taak simbalui koson mangampun ra tula nilo galama'. Ngaangai' bibiag no sinolob koson ra taak simbalui koson ra Tuhan.

³⁶ Kopongo raginio inalap nilo dokumin ondo' pinataak ru raja' am pinasaboi ginio ra gabenor-gabenor am pagawai-pagawai giu' ra wilayah Iprat Kalasaan. Pagawai-pagawai pana nangindangan ra mamagun maa' raginio marayusan nilo sambayang giu' ra Baloi ru Tuhan.