IJRA 7 - Tanou Moonsoi Timugon

I Ijra nakasaboi giu' ra Jirusalim

¹ Bibilor boo buoi raiti, paat ra Raja' Artasasta nasauk ra raja' ru Pirsia, mokoondo' sangulun ungkuyon inggalan no i Ijra. Io sangulun intor ra papag ri Arun, Tingganai Maayo Imam no, am inggalan ru papag nano koson ragitilo: Ijra anak ri Siraya, anak ri Ajaria, anak ri Ilkia,

² anak ri Salum, anak ri Jadok, anak ri Agitub,

³ anak ri Amarya, anak ri Ajaria, anak ri Mirayot,

⁴ anak ri Jiragya, anak ri Uji, anak ri Buki,

⁵ anak ri Abisua, anak ri Pinigas, anak ri Iliajar, anak ri Arun.

^6-7 I Ijra sangulun ondo' nakaigigila' am mapandai am makatutun toojo ra Ukum ondo' tinaakan ru Tuhan, i Aki Kapuuno' ru Israil ri Musa. Nangani' Raja' ri Ijra ra atan ayuk kinitaak no sabap ra binarakat i Ijra ru Tuhan, i Aki Kapuuno' nano. Paat ra bilor katulu' ra pamarintaan ru Raja' Artasasta, minugar i Ijra intor ra pagun ru Babilonia minongoi ra Jirusalim nababaya' ra santimungan ulun ru Israil, nakaaya' kukula' ngaulun imam, ulun ru Liwi, ulun maririmbai, am niayuk ulun magalung ra kulobon ru Baloi ru Tuhan am ulun-ulun mangngandoi.

^8-9 Nangiruan ilo ra pagun ru Babilonia paat ra orou kasaa' ra sila' kasaa', am nabaya' ra indangan ri Aki Kapuuno', nakasaboi ilo giu' ra Jirusalim paat ra orou kasaa' ra sila' kalimo.

¹⁰ Pinataak ri Ijra kaayagan nano koson mintutun ra Ukum ru Tuhan, nambaal raginio am niayuk nangila' ra ngaangai' inaru' am ukum nano ra bansa' ru Israil.

Dokumin ondo' pinataak ru Raja' Artasasta ri Ijra

¹¹ Raja' Artasasta nangani' ri Ijra, imam am ondo' mapandai kaga' ra Ukum no, ra dokumin ragitio:

¹² “Intor ra Raja' Artasasta posoboyon ra Imam Ijra, ondo' mapandai kaga' ra Ukum ri Aki Kapuuno' panguasa' giu' ra suruga'.

¹³ “Mindagu aku ra ngaangai' imam, ulun ru Liwi am ulun ru Israil ra bokon giti ra titikop ru pamarintaan kutu, ondo' moogot mongoi ra Jirusalim, iowon mongoi mabaya' ramuyun.

¹⁴ Aku, mabaya' ra tulu' ngaulun maminson raki' no, mangator ramuyun koson manutun ra baal giu' ra Jirusalim am Jiuda. Tutuno' min ru Ukum ri Aki Kapuuno' ondo' pinalansanan ramuyun no topot-topot ginagaya'.

¹⁵ Ibito' mababaya' ramuyun mas am pirok ondo' masaga' kuno am ilo maminson raki' no pataakon ri Aki Kapuuno' ru Israil, i Aki Kapuuno' ondo' minayan giu' ra Jirusalim.

¹⁶ Ibito' niayuk pirok am niayuk mas ondo' tinimung min giu' ra titikop ru wilayah Babilonia, am niayuk pataakon ru ulun ru Israil am niayuk imam-imam nilo ra tayar ru Baloi ru Tuhan, i Aki Kapuuno' nilo ondo' binaal giu' ra Jirusalim.

¹⁷ “Pakayo' ruit no ra matanda' koson mambali ra sapi' gawayan, domba gawayan, anak domba, gandum am wain. Pataako' noyo ngaangai' taak raginio giu' ra altar ra Baloi ru Tuhan giu' ra Jirusalim.

¹⁸ Pakayo' pirok am mas ondo' suwo no koson ra pakuan ra atan ayuk rirun am rangan-rangan muno, sumugut ra kasagaan ri Aki Kapuuno' muno.

¹⁹ Ngaangai' kuliamos ondo' pinataak rirun koson pakuan ra sambayang giu' ra Baloi ru Tuhan no musiti' mu pataakon ri Aki Kapuuno'.

²⁰ Ngaangai' pakuan ra bokon ondo' akau makapakuan koson ra Baloi ru Tuhan, pakitaak kau intor ra kausinan ru pamarintaan.

²¹ “Manusub aku maa' raginio atan ayuk ondo' kinitaak ru Imam Ijra, ondo' mapandai kaga' ra Ukum ri Aki Kapuuno' panguasa' giu' ra suruga', musiti' pataakin ra mataki' ru ngaangai' pagawai kausinan giu' ra wilayah Iprat Kalasaan.

²² Suang nano makasaboi ra kinasuang ragitio: 3,400 ngakilogram pirok, 10,000 ngakilogram gandum, 2,000 ngalito wain, 2,000 ngalito umau jaitun am usi' ra suang ondo' pakayon.

²³ Ilalain ra mampaugar ra ngaangai' ondo' musiti' pinabaalan ri Aki Kapuuno' giu' ra suruga' ra tayar ru Baloi Nano, maa' raginio kalo sumangit Io raki' kapoam ra ulun ondo' mamarinta malupus aku.

²⁴ Pai' kitaaki' ra cukai intor ra imam-imam, ulun-ulun ru Liwi, ulun-ulun maririmbai, ulun-ulun magalung ra kulobon garabang, ulun-ulun mangngandoi, kapoam osoi ayuk ondo' makakulawit ra Baloi ru Tuhan.

²⁵ “Musiti' okou, Ijra, manampakuan ra kapintaran ondo' pinataak ri Aki Kapuuno' rirun. Lantiko' tingganai-tingganai am akim-akim maa' raginio maningganai ra mamagun giu' ra Iprat Kalasaan, ondo' maayag sumugut ra Ukum ri Aki Kapuuno' muno. Musiti' okou mangila' ra Ukum no ra ngaangai' ulun ondo' kalo poyo nakapandai raginio.

²⁶ Osoi ayuk ondo' kalo gumagaya' ra ukum ri Aki Kapuuno' muno kapoam undang-undang ru pamarintaan, musiti' ukumin ra pulaliin ra ukuman matoi, kapoam patirin, kapoam gaawon rapu' kapoam ukumin ra aputon.”

Nongompor i Ijra ri Aki Kapuuno'

²⁷ Kopongo raginio indagu i Ijra, “Koompor noyo Tuhan, i Aki Kapuuno' ru kinamatuaan takau! Binuir no guang ru raja' saboi kinara' no timpokon Baloi ru Tuhan giu' ra Jirusalim.

²⁸ Mabaya' ra indangan ri Aki Kapuuno', kasagain aku ru raja', ulun-ulun maminson nano am niayuk ngaangai' pagawai mangaatang nano. Tuhan i Aki Kapuuno' kuno nangani' raki' ra kabaanian saboi makimaitan ku masuang tingganai ru bansa' ru Israil muli' ra Jirusalim mabaya' raki'.”