IJRA 6 - Tanou Moonsoi Timugon

Surat susuban ru Raja' Koris natuum ra ralalom ru arkib ru pamarintaan

¹ Kopongo raginio nangani' Raja' Darius ra susuban maa' raginio ulun manutun ra arkib ondo' binulian giu' ra bandar Babil.

² Kaa' tinulisan intor ra baal raginio natuum giu' ra bandar Amita, giu' ra libung Midia, am sala' ka giu' ra Babil. Tinulisan raginio pinatulis ra rondo' naskhah rinulun ondo' koon ragitio bolos no,

³ “Paat ra bilor kasaa' ra pamarintaan ru Raja' Koris, nangani' io ra susuban maa' raginio Baloi ru Tuhan giu' ra Jirusalim baalon saguli', koson ra intok ru ulun magibit ra taak am monolob ra taak simbalui. Sawat ru Baloi no musiti' 27 ngamito am pila' no 27 ngamito.

⁴ Timbok ru Baloi no musiti' baalon koson ragitio: giu' ra rasawat moonong talu ngalapis ru batu musiti' pakulaupon rondo' lapis ru tataun. Ngaangai' balanja' no musiti' tampilanin ru kausinan ru pamarintaan.

⁵ Kuliamos ru mas am pirok ondo' pinakai giu' ra ralalom ru Baloi ru Tuhan, ondo' inalap ru Raja' Nibukadnijar intor ra Jirusalim am inibit ra Babil, musiti' pasagulion ra intok no saguli'.”

Nangani' Raja' Darius ra susuban maa' raginio rayuson pambaalan

⁶ Kopongo raginio tinaam ru Raja' Darius koon ragitio, “Posoboyon ra Gabenor Tatnai intor ra Iprat Kalasaan, Syitar Bojnai am rangan-rangan min giu' ra Iprat Kalasaan. Kaansayan. Pai' jojowo' ulun ru Jaudi,

⁷ am pai' ingai' pambaalan no. Polosoo' gabenor ru Jiuda am tingganai-tingganai ru ulun ru Jaudi mambaal saguli' ra Baloi no.

⁸ Susubon ku niayuk poyo maa' raginio akau ngaangai' mangindangan risilo mambaal raginio. Balanja' mambaal ra Baloi ru Tuhan no musiti' bayarin ra mataki' intor ra kausinan ru pamarintaan, intor ra ampos ru cukai wilayah Iprat Kalasaan. Pai' polosoo' pambaalan no maputat!

⁹ Moonong orou, imam-imam ondo' soroi giu' ra Jirusalim musiti' aniin ra atan ayuk ondo' makapakuan ilo: koson ra sapi' gawayan mamulok, domba gawayan kapoam anak domba koson ra taak simbalui pataakon ri Aki Kapuuno' panguasa' giu' ra suruga', kapoam gandum, usi', wain am umau jaitun.

¹⁰ Ngaangai' ti musiti' paugaron maa' raginio makapampataak ilo ra taak simbalui ondo' iniou ri Aki Kapuuno' panguasa' giu' ra suruga', am maa' raginio makiasi' ilo Riso koson makibarakat ra tayar kuno am anak-anak ungkuyon kuno.

¹¹ Nanusub aku niayuk ra osoi manggal ra susuban ti, tataun ru taap ra baloi nano lunsayon, kaniuson am patujokon ra inan nano saboi mansabut. Baloi ru ulun no saukon ra intok ru ginsamol.

¹² Gama' ru i Aki Kapuuno' ondo' nampili' ra Jirusalim koson ra intok Nano sambaan, mamuso ra raja' kapoam bansa' ra atan pana ondo' manggal ra susuban ti am niayuk kuminam mamuso ra Baloi ru Tuhan. Aku, Raja' Darius nangingkual noyo ra susuban ti. Paugaro' noyo susuban ragitio ra bobonsoi.”

Baloi ru Tuhan patimpokon

¹³ Kopongo raginio, Gabenor Tatnai intor ra Iprat Kalasaan, Syitar-Bojnai am rangan-rangan nilo nambaal topot koson ondo' nanusuban ru Raja' Darius.

¹⁴ Tingganai-tingganai ru ulun ru Jaudi namparayus ra pambaalan ra Baloi ru Tuhan no ra maribok. Inunsu' ilo ru Nabi Agai am i Jakaria. Nopongo nilo pambaalan ra Baloi no sumugut ra susuban ri Aki Kapuuno' ru Israil am susuban ru Raja' Koris, Raja' Darius am Raja' Artasasta, raja'-raja' ru Pirsia.

¹⁵ Nopongo nilo pambaalan no paat ra orou katalu ra sila' Adar, paat ra bilor koonom ra pamarintaan ru Raja' Darius.

¹⁶ Kopongo raginio ulun ru Israil, imam-imam, ulun ru Liwi am ngaangai' ulun ondo' minuli' noyo intor ra pamatiran, nampaugar ilo patimpokon Baloi ru Tuhan no mabaya' ra kaansukan.

¹⁷ Koson ra patimpokon no nampataak ilo ra 100 ngainan sapi' gawayan, 200 ngainan domba gawayan am 400 ngainan anak domba ra Tuhan. Koson ra taak simbalui pangampunan ra tula, nampataak ilo mopor am ruo ngainan kambing gawayan, sanginan ra tayar ru moonong bansa' ru Israil.

¹⁸ Ilo niayuk nanampos ra kandoi ru imam-imam am ulun ru Liwi giu' ra Baloi ru Tuhan giu' ra Jirusalim, sumugut ra aturan ondo' tinulisan ralalom ru Kitab ri Musa.

Pangiantakan Paska

¹⁹ Ilo ondo' minuli' noyo intor ra pamatiran no nangiantak ra Paska paat ra orou koopor am apat ra sila' kasaa' ru bilor ra siminunu' no.

²⁰ Ngaangai' imam am ulun ru Liwi nambaal ra upacara pamasawan ra inan saboi karaan ra mapasau kaga'. Nanimbalui ulun ru Liwi ra bibiag koson ra taak simbalui ru Paska tayar ru imam-imam, am ngaangai' ulun ondo' minuli' intor ra pamatiran am niayuk ra tayar nilo galama'.

²¹ Taak simbalui no inakan ru ngaangai' ulun ru Israil ondo' minuli' intor ra pamatiran, am mamagun ru pagun no ondo' nangiruan ra baal ru kaayagan ra makatula, am minatong koson sumamba ra Tuhan, i Aki Kapuuno' ru Israil.

²² Buoi tulu' ngoorou, naansukan ilo nangiantak ra Pangiantakan Ruti' Kalo Linatakan ra Ragi. Naansukan ilo sabap ra Tuhan nangkinibit ra raja' ru pagun ru Asyur mataau guang risilo, saboi io nangindangan risilo nambaal saguli' ra Baloi ru Tuhan, i Aki Kapuuno' ru Israil.