IJRA 5 - Tanou Moonsoi Timugon

¹ Paat raginio, ruo ngaulun nabi, i Agai am i Jakaria anak ri Ido, tumalimpuun mindagu ra ralalom inggalan ri Aki Kapuuno' ra ulun ru Jaudi ondo' minayan giu' ra Jiuda am giu' ra Jirusalim.

² Paat ri Jirubabil anak ri Sialtiil am i Jisua anak ri Jojadak nokorongog ra tanou ru nabi-nabi no, ilo tumalimpuun poyo mambaal ra Baloi ru Tuhan giu' ra Jirusalim. Karuruo ngaulun nabi no pana nangindangan risilo.

³ Paat raginio niayuk, Gabenor Tatnai, intor ra Iprat Kalasaan, i Syitar-Bojnai am niayuk rangan-rangan nilo minatong ra Jirusalim. Pangkuot ilo ra ulun ru Jaudi, “Osoi kia ondo' nanusub ramuyun mambaal am mangukop ra Baloi Sambayangan ti?”

⁴ Ilo niayuk nakitaak ra inggalan ru ulun ondo' mangindangan mambaal ra Baloi no.

⁵ Kaa' i Aki Kapuuno' nagilong am nanindung ra tingganai ru ulun ru Jaudi no, saboi pagawai-pagawai ru pamarintaan ru Pirsia namatas koson kalo mampajajou risilo ra ilo kalo poyo mangator ra surat ra Raja' Darius am mangapu ra balos intor riso.

⁶ Gitio noyo pambalaan ondo' inataran nilo ra raja',

⁷ “Posoboyon ra Raja' Darius. Gama' ru mamarinta kou ra kaansayan.

⁸ “Moogot akai mambala' rirun raja' ra minongoi akai noyo ra Jiuda am nakakito ra Baloi Sambayangan koson ri Aki Kapuuno' Ondo' Maayo, tatanga' baalon saguli' ra batu mangaayo am timbok ondo' linapisan ra tataun. Kandoi no binaal ra matuyu' kaga' am matanda'.

⁹ “Kopongo raginio nangkuot akai ra tingganai ru bansa' raginio, osoi ondo' nangani' risilo ra pangiawan koson mambaal saguli' ra Baloi Sambayangan am niayuk ukapin ginio.

¹⁰ Kinuatan mai niayuk inggalan nilo maa' raginio makapambala' rirun raja' ra ulun ondo' naningganai ra kandoi raginio.

¹¹ “Taam ilo, ‘Akai ti ulipon ri Aki Kapuuno' panguasa' ru tana' ti am limbowon. Nambaal akai saguli' ra Baloi ru Tuhan ondo' binaal am inukapan ra kaapar-aparan ra bilor ragili ru sangulun raja' ru Israil ondo' matulai.

¹² Kaa' sabap ra kinamatuaan maili napasingkual ra sangit ri Aki Kapuuno', panguasa' giu' ra suruga', nompoloso Io ra kinamatuaan maili kinala ru Raja' Nibukadnijar, papag ri Kasdim, raja' giu' ra Babilonia. Baloi ru Tuhan pinuso am bansa' mai rinakop am inibit ra Babilonia.

¹³ Kopongo raginio paat ra bilor kasaa' ru pamarintaan ru Raja' Koris, raja' ru Babilonia, nangani' Io ra susuban maa' raginio Baloi ru Tuhan baalon saguli'.

¹⁴ Pinasaguli' no poyo kuliamos mas am pirok ondo' pinakai giu' ra ralalom Baloi ru Tuhan. Kuliamos no ginaau ru Raja' Nibukadnijar intor ra Jirusalim am binulian giu' ra ralalom ru kuil nano giu' ra bandar Babil. Tinaakan ru Raja' Koris kuliamos no ra sangulun ondo' inggalan no i Sisbajar, ondo' linantik no nasauk ra gabenor ru Jiuda.

¹⁵ Nanusub Raja' ri Sisbajar mamparuli' ra kuliamos no ra Baloi ru Tuhan giu' ra Jirusalim, am mambaal saguli' ra Baloi no.

¹⁶ Ginio ra i Sisbajar minatong ra Jirusalim am nampabanta' ra batu maatang ru Baloi ru Tuhan. Intor raginio saboi raino pambaalan no matanda' kinaugar no, kaa' lakat poyo kalo nopongo.’

¹⁷ “Ginio ra amon ru iowon mu raja' mai, susubo' ulun manutun ra arkib ru pamarintaan giu' ra Babil. Koon raginio noyo makapandai ru igondo' Raja' Koris nangani' ra susuban koson mambaal saguli' ra Baloi ru Tuhan giu' ra Jirusalim kapoam kalo. Mopongo raginio kasaga' noyo mambala' ramon ra atan ragu kapatasan muno raja' intor ra baal raginio.”