IBRANI 9 - Tanou Moonsoi Timugon

Baal sambayang ra tana' ti am baal sambayang ra suruga'

¹ Nabantuan kasaa' i mokoondo' kaulayan sambayang am mokoondo' niayuk ra Kim Sambayangan ondo' binaal ru ulun.

² Mokoondo' ra kim ondo' lamin ra saang no ininggalanan ra Intok Matulai, am giu' no tampakan ra lampung am mija' papabantaan ra ruti' ondo' pataakon ri Aki Kapuuno'.

³ Am lamin ra ralalom ru kim no, ondo' sinilian ru tabir, ininggalanan ra Intok Matulai Kaga'.

⁴ Giu' no mokoondo' panalaban ra kaminyan ondo' binaal intor ra mas, am poyo Kaban Nabantuan ondo' inangkupan ra mas. Ralalom no mokoondo' rarapu' mas boborok makasuang ra akanon inggalanin ra manna, am poyo jujuga' ri Arun ondo' nanalantar ragili am ruo ngampila' batu ondo' tinulisan ra mopor panusuban.

⁵ Rasawat ru kaban no mokoondo' ruo sinungkalalaing binaal intor ra mas ondo' ininggalanan ra kirub. Ilo no tatandu' ra i Aki Kapuuno' soroi ra giu' no. Kawo nilai nanili ra taub ru kaban no, ondo' tinakisan ra raraa' koson mangampun ra tula ru ulun. Kaa' kalo lair makabala' ku ngaangai' ra raino ti.

⁶ Nakatampos noyo ngaangai' ti. Moonong orou mumpos imam-imam ra lamin ra saang ru kim no koson mampaugar ra kandoi nilono.

⁷ Kaa' Tingganai Maayo Imam ayuk ondo' makaumpos ra lamin ra ralalom no ra igondo' ayuk sambilor. Magibit io ra raraa' am pataakon no ri Aki Kapuuno' koson pakiampunan ru tula nano galama' am niayuk ra tula ondo' kalo natutunan ru ulun.

⁸ Intor raginio, Ambiluo ri Aki Kapuuno' mambala' ritakau ra umpasan mongoi ra Intok Matulai Kaga' ti kalo poyo maukab, paat ra lakat ayuk poyo soroi lamin ra saang ru kim no.

⁹ Ngaangai' raginio rondo' tatandu' ra atan baalon ri Kristus paat ra raino ti. Atan ayuk taak kapoam taak-taak simbalui ondo' pinataakan ri Aki Kapuuno', kalo noyo nampakatanda' ra guang ru ulun.

¹⁰ Sabap ra atan ondo' sinugut nilo intor ra akanon, inumon am nansalinut pambaguan ginio kaulayan ayuk. Ngaangai' ti sumugut ayuk ra kaulayan ru ulun am paugaron ra buoi ti saboi ngaangai' no talimbaguin ri Aki Kapuuno'.

¹¹ Kaa' i Kristus nakaratong noyo koson ra Tingganai Maayo Imam am nangindangan ra ulun ra minumpos Io ra kim giu' ra suruga', ondo' gitio matulai am moonsoi poyo intor ra ondo' binaal ru ulun ragili.

¹² Igondo' ayuk i Kristus minumpos ra Intok Matulai Kaga' ti am ginio sama' ra sabuoi-buoi no. Kalo nagibit Io ra raraa' ru kambing am raraa' ru sapi' gawayan, kaa' inibit No raraa' Nano galama' ondo' nasauk ra puun ru pamayagan mantilayun takau.

¹³ Maya' ra kaulayan ru ugama, ulun majamol impasawin ra takisin ulu nilo ra raraa' ru kambing am raraa' ru sapi' ungkuyon am poyo taukin ra kaau ru sapi' ruandu' mamulok sinimbalui.

¹⁴ Mulu' poyo raraa' ri Kristus ondo' makapamasau ra tula ru ulun. Sabap ra mansail ra Ambiluo mantilayun, i Kristus nampataak ra painawo Nano ri Aki Kapuuno' koson ra taak simbalui ondo' kolondo' sala. Am sabap ra raraa' Nano pinasasar, mampaintopot i Aki Kapuuno' ritakau ra kalo boo makasala takau intor ra binaal takau ra kolondo' onong i, maa' raginio makapangandoi takau ri Aki Kapuuno' ondo' maayag.

¹⁵ Ginio nai ra mansail ri Kristus noyo i Aki Kapuuno' nakapambaal ra nabantuan bagu, maa' raginio ulun ondo' pinili' Nano makaapu ra barakat mantilayun ondo' binantu' Nali. Ngaangai' raginio masauk sabap ri Kristus minatoi noyo koson mampakaayag ra ulun intor ra sala ondo' binaal nilono nakapaat ra nabantuan kasaa' i iniou.

¹⁶ Gitio mogondo' ra surat waris, ra musiti' aruon galing ra topot-topot minatoi noyo ulun nampawaris no.

¹⁷ Sabap ra surat waris ti kolondo' kuasa' paat ra ulun nambaal no lakat poyo maayag, suai ayuk ra amon ru minatoi io noyo.

¹⁸ Ginio nai ra nabantuan kasaa' i pana iniou mansail ra raraa' ayuk.

¹⁹ Pakapambala' i Musa ra ngaangai' ukum ri Aki Kapuuno' ra ulun ru Israil, alapo' no tutuu' Isop ondo' pinabangkos no ra bulu malia' ru domba, am pososopo' no boo ra raraa' ru sapi' am raraa' ru kambing ondo' pinaratok no ra timug, am patakiso' no galing ra Kitab ru Ukum ri Musa i am bagu no ra ngaangai' ulun ru Israil.

²⁰ Liliwa' nampatakis, minindagu i Musa: “Mansail ra raraa' ti saukon ri Aki Kapuuno' ra nabantuan ondo' pasugutin Nano ramuyun.”

²¹ Mogondo' ra raitii' ni ra patakiso' poyo ri Musa raraa' no ra Kim Sambayangan am niayuk ra ngaangai' kuliamos sambayangan.

²² Sumugut ra Ukum ri Musa, maar ngaangai' no takisin ra raraa' koson impasawin; tula ru ulun kalo ampunon amon ru kolondo' raraa' pasasaron.

Pinatayan ri Kristus mamuso ra tula

²³ Ngaangai' sinabit ku ra raitii' ni, ondo' musiti' impasawin ra raraa' ru bibiag, tumilu niayuk ra baal giu' ra suruga'. Kaa' baal giu' ra suruga' impasawin poyo ra taak simbalui ondo' moonsoi poyo ra bokon i.

²⁴ Ginio sabap ri Kristus kalo minumpos ra Intok Matulai binaal ru ulun ondo' tumilu ra Intok Matulai ra sotopot no. Kaa' minumpos Io ra suruga' am soroi Io ra giu' no raino koson makiindangan Io ri Aki Kapuuno' ritakau.

²⁵ Moonong bilor Tingganai Maayo Imam Jaudi mumpos ra Intok Matulai Kaga' magibit ra raraa' ru taak simbalui. Kaa' i Kristus kalo misasaguli' mampataak ra painawo Nano galama'.

²⁶ Sabap ra amon ru koson poyo raginio misasaguli' Io potoyon intor ra tana' ti biningkal. Kaa' sotopot no, raino mamaar noyo ra pamupusan, riminatong noyo i Kristus igondo' ayuk koson mampataak ra painawo Nano mamuso ra tula ru ulun am ginio sama' ra sabuoi-buoi no.

²⁷ Inaru' noyo ri Aki Kapuuno' ra igondo' ayuk ulun matoi am mopongo raginio akimin No.

²⁸ Koson niayuk i Kristus igondo' ayuk nampataak ra painawo Nano koson mamuso ra tula ru masuang ulun. Matong Io poyo ra kainduo, sala' ka koson mangampun ra tula, kaa' koson mampakaayag risilo ondo' maginaa Riso.