IBRANI 4 - Tanou Moonsoi Timugon

¹ Raino, bantu' ri Aki Kapuuno' ni lakat poyo soroi ra tumangus takau mabaya' Riso. Intor raginio, ilalai' takau noyo ra kolondo' ra sangulun kalo makatangus mabaya' Riso.

² Sabap ra Tanou Moonsoi no pinabala' noyo ritakau mogondo' ra ulun ra galing i. Kaa' koson risilo, tanou no kolondo' onong, sabap ra paat ra ilo nakaining kalo inapu nilo mabaya' ra pangintapatan.

³ Kaa' itakau ondo' mangintopot, makatangus mabaya' Riso koson ra rinagu Nali: “Masisang saboi nagibot Aku risilo: kalo noyo makasubol ilo ra pagun nilai am tumangus mabaya' Raki'.” Minindagu Io koson raginio kabalu' pana kandoi Nali nopongo noyo intor ra tana' ti biningkal.

⁴ Sabap ra koson ra orou katulu', mokoondo' tinulisan ra Buuk Kitab, “Timinangus i Aki Kapuuno' ra orou katulu' intor ra ngaangai' kandoi Nali.”

⁵ Am tunggul no poyo; “Kalo noyo makasubol ilo ra pagun nilai am tumangus mabaya' Raki'.”

⁶ Ginio boo ilo ondo' kasaa' nakaining ra Tanou Moonsoi no, kalo tumangus mabaya' Raki', sabap ra ilo kalo nangintopot. Amon ru ginio poyo, mokoondo' boo ulun ra bokon ondo' makatangus mabaya' Raki'.

⁷ Motopot noyo ginio sabap ra mokoondo' noyo inaru' ri Aki Kapuuno' rondo' orou ra bokon poyo ondo' sabiton, “Orou Raiti'”. Ginio pinabala' Nano ondo' pinabala' galing ra raja' Daut ra kukula' ngaatus ngambilor kalupus raginio, ralalom tayar Buuk Kitab ni: “Amon ru orou raiti' makaining kau ra bolos ri Aki Kapuuno', pai' noyo kotogo' guang mino.”

⁸ Amon ru galing i maningganai raan i Josua risilo tumangus, kalo pana boo i Aki Kapuuno' mambala' poyo ra rondo' orou ra bokon.

⁹ Kaa' mokoondo' poyo tangusan ra ulun-ulun ri Aki Kapuuno', mogondo' ra Io timinangus ra orou katulu' i.

¹⁰ Sabap ra osoi ayuk tumangus mabaya' Riso, tumangus io niayuk intor ra kandoi nano, mogondo' ri Aki Kapuuno' galama' timinangus intor ra kandoi Nali.

¹¹ Sabap raginio, piroto' noyo saboi makatangus takau mabaya' Riso. Pai' saboi sangulun pana intor ritakau kalo makatangus mabaya' Riso koson risilo ra galing i, sabap ra kalo nangintopot ri Aki Kapuuno'.

¹² Bala' ri Aki Kapuuno' makakuasa' am maayag koson Riso. Mogondo' ra ilang ondo' inasa' ruo larom manguntas saboi bungul am utok nano suayon, koson niayuk ra bala' ri Aki Kapuuno' tumunsok ra salibuor am ambiluo saboi mampatalang ra kasagaan am pamaguangan ru ulun.

¹³ Kolondo' atan-atan inangun ri Aki Kapuuno' makasibuni intor Riso, sabap ra ngaangai' maukab am makito Nano. Am ri Aki Kapuuno' niayuk musiti' takau mangakun ra ngaangai' ondo' binaal takau.

I Jisus noyo Tingganai Maayo Imam

¹⁴ Ginio sabap ra pirot takau poyo gumuut ra pangintapatan ondo' pinatanou takau. Sabap ra mokoondo' takau sangulun Tingganai Maayo Imam ondo' makakuasa' am ondo' nakasuku' noyo ra intok ri Aki Kapuuno', io no i Jisus Kristus, Anak ri Aki Kapuuno'.

¹⁵ Sabap ra Tingganai Maayo Imam takano sala' ka sangulun ondo' kalo nakaliman ra paliso takau, kaa' sotopot no kininaman Io ralalom ngaangai' baal koson ritakau, kaa' kalo makatula Io.

¹⁶ Intor raginio makakau' takau minggaar ra takhta ri Aki Kapuuno' ondo' maayo kaga' togom, koson makitaak ra asi', kataawan am indangan Nano paat ra itakau makakapaganan.