IBRANI 3 - Tanou Moonsoi Timugon

I Jisus maayo kuasa' intor ri nabi Musa

¹ Pabukat kau ngai' ra Kristian ondo' piniau noyo ri Aki Kapuuno', pampaguang kano ri Jisus ondo' nasauk koson ra rasul am Tingganai Maayo Imam ru pangintapatan takau.

² Giminagaya' Io ri Aki Kapuuno' ondo' nampili' noyo Riso. Ginio mogondo' ri Musa ra galing i ra giminagaya' io ri Aki Kapuuno' koson mangindangan ra ulun Nano.

³ Kaa' sotopot no i Jisus noyo mauli' omporon ka i Musa, koson niayuk ra sangulun manambaloi mauli' omporon ka ondo' tinambaloi nano.

⁴ Maaru' moonong baloi mokoondo' manambaloi, kaa' sotopot no i Aki Kapuuno' galama' ondo' mampasauk ra ngaangai' no.

⁵ I Musa giminagaya' ri Aki Kapuuno' koson ra sangulun ulipon mangindangan ra ulun Nano, am nampabala' poyo ra atan ondo' raguon ri Aki Kapuuno' ra tauli no.

⁶ Kaa' i Kristus gumagaya' koson ra Anak ondo' maningganai ra ngaangai' ulun ri Aki Kapuuno'. Itakau ti noyo ulun Nano amon ru makakau' takau am mangintopot ra makaalap atan ondo' lansanin takau.

Tangusan ra ulun ri Aki Kapuuno'

⁷ Sabap raginio, koson ra bala' ru Ambiluo ri Aki Kapuuno', kon Nano: “Amon ru orou raiti' makaining kau ra bolos ri Aki Kapuuno',

⁸ pai' noyo kotogo' guang mino, koson ra kinamatuaan mini, paat ra ilo minanggal am nangkinam Raki' giu' ra tana' kaagisan.

⁹ Giu' i nangkinam ilo Raki', kon ri Aki Kapuuno', kabalu' pana nakaliman ilo atan ondo' binaal Kuli buoi apat ngoopor ngambilor.

¹⁰ Ginio nai ra Aku siminangit risilo am minindagu: ‘Masalok makalayau pamaguangan nilai am kalo noyo giminagaya' ilo ra panusuban Kuli.’

¹¹ Ginio ra nasisang Aku saboi nagibot risilo: ‘Kalo noyo makasubol ilo ra pagun nilai am tumangus mabaya' Raki'.’ ”

¹² Pabukat kau ngai' ondo' tagamin kuno, ilalai' min koson ra kolondo' sangulun intor ramuyun no makaguang ra malaat ra kalo boo mangintopot, saboi tumalikur boo ri Aki Kapuuno' ondo' mantilayun no.

¹³ Kaa' pangindangan kano ra rondo' am bokon ra moonong orou, buoi ondo' sabiton ra ‘Orou Raiti' ’ ralalom ru Buuk Kitab, lakat poyo soroi maa' raginio kolondo' sangulun pana mingkotog guang sabap ra maruung io ru tula.

¹⁴ Itakau ngai' rangan mangangandoi noyo ri Kristus amon ru mirot takau pampaguut ra pangintapatan saboi ra orou pupus, mogondo' ra talimpuun i.

¹⁵ Gitio noyo ondo' tinulisan ra Buuk Kitab: “Amon ru orou raiti' makaining kau ra bolos ri Aki Kapuuno', pai' noyo kotogo' guang mino koson ra kinamatuaan mini, paat ra ilo minanggal ri Aki Kapuuno'.”

¹⁶ Osoi kia nakaining ra bolos ri Aki Kapuuno' kaa' minanggal boo Riso? Ilo tupo ondo' inibit ri Musa miningkual intor ra pagun ru Misir.

¹⁷ Ri osoi kia sinangitan Nano buoi apat ngoopor ngambilor? Ilo tupo ondo' nambaal ra tula am minatoi giu' ra tana' kaagisan.

¹⁸ Ri osoi kia inibatan Nano ra kalo makasubol ra pagun nilai am tumangus mabaya' Riso? Ilo tupo ondo' kalo giminagaya' Riso.

¹⁹ Intor raginio maratian takau ra ilo ti kalo noyo nakasubol ra pagun, sabap ra kalo nangintopot ilo ri Aki Kapuuno'.