IBRANI 2 - Tanou Moonsoi Timugon

Pamayagan maayo

¹ Sabap ra kuasa' ru Anak Nano maayo intor ra malaikat, mingkotog takau poyo toojo gumuut ra pangilaan ondo' norongog takau noyo, maa' raginio kalo mangiruan takau ra katapatan.

² Motopot bala' ondo' pinasaboi ru malaikat-malaikat ra kinamatuaan takali am osoi ayuk kalo giminagaya' kapoam siminugut no, binalasan maya' ra binaal nilai no.

³ Ginio ra ati kulaan makapagiru' takau intor ra pangukuman amon ru impayin takau pamayagan maayo no. Sabap ra Tuhan no galama' ondo' kasaa' nampabala' ra pamayagan no, am ulun-ulun ondo' nokorongog kasaa' napaintopot ritakau raginio.

⁴ Am i Aki Kapuuno' nampaikang poyo ra kaintutunan ru ulun-ulun pinaaya' ra nansalinut tatandu', kaimuagan am baal makakuasa' am mansail poyo pantayaran ra taak ru Ambiluo ri Aki Kapuuno' maya' ra kasagaan Nano galama'.

Io ondo' magibit ra ulun ra pamayagan

⁵ Malaikat-malaikat kalo noyo inanian ra kuasa' mamarinta ra tana' bagu ondo' matong no, ondo' sunuron takati.

⁶ Kaa' mokoondo' tinulisan noyo ra Buuk Kitab: “Aki Kapuuno', osoi kia ulun, saboi akai karaan Mu? Kapoam anak ru ulun, saboi akai alungin Mu?

⁷ Pinainggana' Mu kuasa' mai intor ra kuasa' ru malaikat, kaa' ra kukula' ayuk buoi, bagu nangani' Kou ramon ra kuasa' am urumat,

⁸ am niayuk nampasauk Kou ramon ra mangunguasa' ra ngaangai'.” Amon ru i Aki Kapuuno' nampasauk ritakau ra “mangunguasa' ra ngaangai'”, arati' no kolondo' rorondo' pana ondo' kalo makuasa' takau. Kaa' raino kalo poyo makito takau ra itakau manguasa' ra ngaangai' no.

⁹ Kaa' makito takau i Jisus, ondo' pinainggana' kuasa' Nano intor ra kuasa' ru malaikat ra kukula' ayuk buoi. Maa' boo raginio ralalom ru kataawan ri Aki Kapuuno' matoi Io ra kaatangan ru ngaangai' ulun. Raino makatutun takau ra Io inanian ra kuasa' am urumat sabap ra naimbolo' Io noyo saboi minatoi.

¹⁰ Sumugut ra inatang ri Aki Kapuuno' ondo' nambaal am niayuk magalung ra ngaangai', matimpok niayuk i Jisus saukon ra matanda' mansail ra kaimbalaan. Maa' raginio urumaton ri Aki Kapuuno' masuang anak Nano mababaya' ri Jisus ondo' magibit risilo ra pamayagan.

¹¹ I Jisus noyo namasau ra ulun intor ra tula nilono, am Io am niayuk ulun pinasau no, rondo' ayuk Ama'. Ginio ra kalo mauyu' i Jisus mangiou risilo ra pabukat Nano.

¹² Minindagu Io ri Aki Kapuuno': “Mapaintutun Aku ra pabukat Kuno ra inggalan Muno; mongompor Aku Rirun giu' ra pasimpungan nilo.”

¹³ Minindagu Io poyo, “Aku lumansan ri Aki Kapuuno'.” Am poyo, “Ilai', Aku giti mabaya' ra pabukat Kuno ondo' pinataak ri Aki Kapuuno' Raki'.”

¹⁴ Sabap ra ilo ondo' sabiton ra pabukat, ioginio ulun, ilo mapandai matoi, ginio ra i Jisus pana nasauk ra ulun toojo mogondo' risilo. Binaal No ginio, maa' raginio mansail ra pinatayan Nano mamuso Io ra kuasa' ru Tingganai ru riwato ondo' makapampatoi ra ulun.

¹⁵ Mansail raginio noyo mampalabus Io ra ulun ondo' moonong orou malaa' ra matoi.

¹⁶ Mapandayan noyo ra sala' ka malaikat indanganon Nano, kaa' itakau, papag ri Abragam.

¹⁷ Ginio noyo sabap ra musiti' Io masauk ra ulun koson ra pabukat Nano ralalom ngaangai' baal. Maa' boo raginio nasauk Io ra Tingganai Maayo Imam ondo' makaasi' toojo ritakau am masalok gumagaya' ra susuban ri Aki Kapuuno'. Intor ra kandoi Nano raginio tula ru ulun ampunon boo ri Aki Kapuuno'.

¹⁸ Am raino makapangindangan Io ra ulun ondo' kinamin, sabap ra Io galama' nakaili' noyo ra kaimbalaan am pangkinaman.