GOSIA 9 - Tanou Moonsoi Timugon

Nampatanou i Gosia ra ukuman tayar ru Israil

¹ Akau ulun ru Israil, longgo' kano mangiantak ra pangiantakan koson ra bansa'-bansa' ra bokon. Iniruanan min noyo i Aki Kapuuno' min am kalo giminagaya' Riso. Giu' ra moonong intok pangagikan ra gandum, tinalan min inan koson ra ulun mantalan ra inan ra Dewa Baal. Masaga' kau mangapu ra gandum ondo' karaan min koson ra gaji' ru dewa no ramuyun.

² Kaa' kalo boo mabuoi matutusan kau ra gandum am umau jaitun, am wain mino makai'.

³ Akau, ulun ru Israil kalo mayan giu' ra pagun ondo' pataakon ru Tuhan ramuyun. Musiti' kau sumaguli' ra Misir am mangakan ra akanon ondo' kalo maakan giu' ra Asyur.

⁴ Giu' ra pagun-pagun no kalo makapampataak kau ra wain kapoam taak simbalui ra bibiag koson mapabansuk ra guang ru Tuhan. Akanon mino mampajamol ra ngaangai' ulun ondo' mangakan no, koson ra akanon ondo' akanon paat ra upacara mompolobong. Akanon mino koson mongorot ra bitil ayuk; sanganu pana kalo ibiton koson ra taak giu' ra Baloi ru Tuhan.

⁵ Paat ra pangiantakan ru ugama koson mangurumat ra Tuhan, kalo makapambaal kau ra atan-atan koson mangiantak raginio.

⁶ Paat ra karaat makasaboi am mamagun nantutuliar, ulun ru Misir manimung ramuyun koson potoyon am koson lobongon giu' ra Mimpis! Rapu' mino intor ra pirok am tana' ru baloi min ragili malungkutan ru sakot am bulungkut makaruui.

⁷ Orou pangukuman nakasaboi noyo, orou koson mangapu ra pambalos. Makapandai boo Israil paat baal ragitio masauk. Kamin, “Nabi ti sasambungon. Ulun sinusub ri Aki Kapuuno' ti mantuyang.” Masisang kau kaga' raki' sabap ra tula min maayo kaga'.

⁸ Nanusub i Aki Kapuuno' raki' koson ra nabi koson mampakara' ra ulun ru Israil, kaa' ati ayuk angayan kuno, mirot kau koson mampalandak raki' koson ra mampalandak ra susuit. Giu' ra pagun longgom ri Aki Kapuuno' galama', nabi-nabi Nano tinula' ru mamagun.

⁹ Binaal mino malaat kaga', koson ondo' binaal ru ulun giu' ra Gibia. Karaan ru Tuhan tula min am mangukum ramuyun.

Tula ru Israil am kinibit nano

¹⁰ Indagu Tuhan, “Paat ra Aku kasaa' nakatuum ra Israil, naansukan Aku koson ra ulun nakatuum ra kawa' ru anggur giu' ra tana' kaagisan. Paat ra Aku kasaa' nakakito ra kinamatuaan min, naansayan guang Kuno koson ra ulun nakakito ra kawa' ru ara ondo' kasaa' naansak bulintok pangkawaan. Kaa' paat ilo nakasaboi giu' ra Gunung Pior, timinalimpuun ilo siminamba ra Baal, saboi ilo majamol koson ra sinungkalalaing ondo' tagamin nilo.

¹¹ Kinaayo ru Israil mansiab lumiot koson ra susuit. Kalo boo makaalap ilo ra anak. Ruandu' nilo pana kalo boo maapang.

¹² Kaa' kabalu' pana anak-anak inanak am pinasukor, alapon Ku anak-anak nilo am kolondo' sangulun pana maayag. Paat ra Aku mangiruan ramuyun, baal-baal makalalaa' lumumpa' ramuyun.”

¹³ Iou Tuhan, nakakito aku ra anak-anak nilo ilowon am potoyon.

¹⁴ Atan kia musiti' ku kitaakon intor Rirun tayar ru ulun ragitio? Sauko' noyo ruandu' nilo ra tabanang! Polosoon ilo kalo mampatiti' ra lalagang.

Ukuman ru Tuhan ra Israil

¹⁵ Indagu Tuhan, “Ngaangai' kalaatan nilo timinalimpuun giu' ra Gilgal. Giu' no Aku timinalimpuun masisang risilo. Pinagiru' Ku ilo intor ra pagun Kuno sabap ra kalaatan ondo' binaal nilo. Kalo boo motogom Aku risilo. Ngaangai' tingganai nilo giminuor Raki'.

¹⁶ Ulun ru Israil koson ra puun tataun ondo' kalo nangkawa' am bakat nano mapua' noyo. Kalo maganak ilo, potoyon Ku anak-anak ondo' tagamin nilo.”

Nabi Gosia minindagu intor ru Israil

¹⁷ I Aki Kapuuno' ondo' sambaan Kuno mangimpai ra ulun Nano, sabap kalo riminongog ilo Riso. Masauk ilo ra ulun tumanggau ra gino ngai' ru bansa'- bansa'.