GOSIA 8 - Tanou Moonsoi Timugon

Mangukum Tuhan ra Israil sabap ra sumamba ilo ra sinungkalalaing

¹ Indagu Tuhan, “Kosongowo' bolos ru tatandu' makalalaa'! Pantula' tatanga' mamulunsar ra pagun Kuno koson ra susuit kanui manumbit ra akanon nano. Ulun Kuno liminungkang ra nabantuan Kuno risilo, am minanggal ra ukum Kuno.

² Kabalu' pana mangiou ilo ra Aku ti i Aki Kapuuno', am mindagu ra ilo ulun Kuno ondo' nakaulig Raki',

³ kaa' nangimpai ilo ra baal ondo' moonsoi. Ginio ra pantula' mangilou risilo.

⁴ “Ulun Kuno nampili' ra raja'-raja' ra kalo nangkuot ra pampaguangan Kuno. Nampili' ilo ra tingganai-tingganai ra kalo nakitaak ra pangiawan Kuno. Nangalap ilo ra mas am pirok am nambaal ra sinungkalalaing ondo' nangkinibit ra kapusaan nilo.

⁵ Masisang Aku ra sapi' mas ondo' sambaan ru mamagun ru bandar Samaria. Siminangit Aku kaga' risilo. Saboi sanggilan kia ilo marayus sumamba ra sinungkalalaing?

⁶ Sangulun manukang giu' ra Israil nambaal rondo' sinungkalalaing; sinungkalalaing no sala' ka i Aki Kapuuno'! Sinungkalalaing ru sapi' mas ondo' sambaan giu' ra Samaria no tutukon.

⁷ Paat ra ulun Kuno mampatias ra angin, mangkumos ilo ra bagiu'. Umo ru gandum ondo' kalo sumilou kolondo' ampos ru akanon. Kaa' amon ru umo no sumilou niayuk, ulun bansa' ra bokon mangai' ra gandum nano.

⁸ Ulun ru Israil nasauk noyo koson ra bansa'-bansa' ra bokon ondo' kolondo' boo onong, koson ra pagangan ondo' napilang.

⁹ Ulun ru Israil mokotog guang koson ra kaladai masigo, manugut ilo ra kasagaan nilo galama'. Makiindangan ilo intor ra Asyur. Binayaran noyo ru Israil pagun-pagun ra bokon koson makiampin.

¹⁰ Kaa' raino timungon Ku ilo am mangukum risilo. Kalo boo mabuoi maimbolo' ilo paat ra raja' ru Asyur mangimbolo' risilo.

¹¹ “Sumuang-suang altar ondo' baalon ru ulun ru Israil koson mamuso ra tula, sumuang poyo boo intok nilo mambaal ra tula.

¹² Nanulis Aku noyo ra masuang pangilaan risilo, kaa' inimpayan nilo ngaangai' no sabap ra mangkara' ra pangilaan no sasala' am kalo natutunan.

¹³ Masaga' ilo mampataak ra taak simbalui Raki', am mangakan ra kual ru taak simbalui no. Kaa' Aku, Tuhan, kalo maansayan risilo. Raino mangkara' Aku ra tula nilo, am mangukum risilo sabap ra tula-tula no. Atarin Ku ilo saguli' ra Misir.

¹⁴ “Ulun ru Israil nambaal ra istana-istana, kaa' nalilianan nilo ondo' Namangun risilo. Ulun ru Jiuda nambaal ra bandar-bandar mokoondo' ra kubu, kaa' paratuon Ku apui koson monolob ra ngaangai' bandar am istana nilo.”