GOSIA 7 - Tanou Moonsoi Timugon

¹ Indagu Tuhan, “Pogonong ra Aku mamabas ra ulun Kuno Israil am mamuna' ra baal nilo, makito Ku ayuk kalaatan-kalaatan ondo' binaal nilo. Mamparuung ilo ra rondo' am bokon, sumubol ra baloi ru ulun koson mantakou, am mantakou ilo ra ulun giu' ra ralan-ralan.

² Kalo igondo' ra pangkaran nilo ra mangkara' Aku ra ngaangai' binaal malaat no. Linibungan ilo ru tula saboi makito Ku toojo.”

Atang malaat giu' ra ralalom ru istana

³ Indagu Tuhan, “Ra ruung am binaal malaat, kuminam mamagun mampabansuk ra guang ru raja' am pagawai-pagawai nano.

⁴ Ilo ngaangai' malaat am kalo gumagaya'. Sisang nilo koson ra apui giu' ra ralalom ru rapuan ondo' kalo pinaangan ru ulun mambaal ra ruti' ra kalo poyo mopongo kabaal ruti' makata' koson solobon.

⁵ Paat ra bunsag maayo ru raja', binaal nilo raja' am niayuk pagawai-pagawai nano nanginum ra wain saboi nagauk am nambaal ra baal-baal sasambungon.

⁶ Atang malaat nilo koson ra apui ondo' bibilak giu' ra ralalom ru rapuan. Sangit nilo malasu' giu' ra ralalom ru guang buoi ru rondom, am nasauk ra bilak ru apui ondo' nanimbula' ra maayo paat ra susuab ti.

⁷ Ralalom ru sangit, namatoi ilo ra tingganai-tingganai nilo. Raja'-raja' nilo pinatoi rondo' am rondo', kaa' kolondo' sangulun pana nakiasi' Raki' koson makiindangan.”

Israil am pagun-pagun ra paginggaar

⁸ Indagu Tuhan, “Ulun ru Israil koson ra ruti' naintanga' naansak. Lumansan ilo ra bansa'-bansa' ra libung nilo.

⁹ Kalo nakaliman ilo ra binaal ragitio nampalawo risilo. Pupus ru bayag nilo mamaar noyo, kaa' kalo nakapandai ilo.

¹⁰ Kinalimbau ru ulun ru Israil makito toojo am nasauk ra inono' ru kasalaan nilo. Kabalu' pana ngaangai' nasauk noyo, kalo siminaguli' ilo Raki', Tuhan i Aki Kapuuno' nilo.

¹¹ Ulun ru Israil koson ra susuit asang ondo' sasambungon. Kasaa' no makiindangan ilo ra Misir, malupus raginio Asyur!

¹² Kaa' paat ra ilo mansail, paatangon Ku jajaling am mamparakop risilo koson ra ulun mamparakop ra susuit. Ukumin Ku ilo sabap ra kalaatan ondo' binaal nilo.

¹³ “Nangiruan ilo Raki' am giminuor Raki'. Kapaganan lumumpa' risilo. Mapuso ilo. Masaga' Aku mamayag risilo, kaa' sambayang nilo Raki' kalo motopot.

¹⁴ Kalo makiasi' ilo Raki' ra mabanis guang. Kaa' mampas ilo ra intok kaalangan am manulaboi koson ra binaal ru ulun ondo' kalo makaulig Raki'. Paat ra ilo makiasi' makitaak ra gandum am wain, pilaton nilo inan koson ra binaal ru ulun ondo' sumamba ra sinungkalalaing. Minanggal ilo Raki'!

¹⁵ Kabalu' pana Aku nampasukor am nampaikang risilo, kaa' nangatang ilo ra malaat minanggal Raki'.

¹⁶ Marayus ilo maya' ra dewa ondo' kolondo' atan pana kuasa'. Koson ra busur ondo' nandikong, mailo ilo lansanin. Sabap ra tingganai-tingganai nilo mindagu ra malilimbau, potoyon ilo ra ilang, am ulun ru Misir makakurit risilo.”