GOSIA 6 - Tanou Moonsoi Timugon

Ulun ru Israil kalo mingkotog tumalikur intor ra tula

¹ Indagu ulun ru Israil, “Ibok saguli' takano ra Tuhan. Namparuol Io ritakau, kaa' maaru' mamabas Io poyo ritakau. Namilat Io ritakau, kaa' maaru' bongkoson No pilat-pilat takau.

² Mopongo ruo kapoam talu ngoorou babason No itakau am maayag takau giu' ra saang Nano.

³ Ibok pirot takano koson mulig ra Tuhan. Maaru' matong Io ritakau koson ra orou tumawang, am koson ra rasam ondo' mamasa' ra tana' ti bulintok ra mambusak.”

⁴ Kaa' indagu Tuhan, “Akau Israil am Jiuda, atan kia ondo' musiti' Kuno baalon ramuyun? Togom min Raki' mataki' lumiot koson ra makagaun kapoam bolobou bulintok ra mokorondom ra susuab ti.

⁵ Ginio ra manusub Aku ra nabi-nabi Kuno koson mampasaboi ra tanou Kuno ramuyun ra akau musiti' ukumin am pusoon. Ondo' gogoton Kuno intor ramuyun nakatalang am makito toojo.

⁶ Masaga' Aku poyo ra akau motogom Raki' ka mampataak ra taak simbalui Raki'. Masaga' Aku poyo ra akau makaulig Raki' ka monolob ra taak simbalui Raki'.

⁷ Kaa' pakaayan kau ayuk ra tana' giu' ra Adam, liminungkang kau ra nabantuan Kuli ramuyun.

⁸ Giliad rondo' bandar ondo' nososok ra ulun malaat am ulun mamatoi.

⁹ Imam-imam giu' ra bandar raginio koson ra santimungan ulun mantakou ondo' nambaal ra pamulunsaran sininok ra ulun ondo' mangkiralan. Giu' pana ra ralan ondo' sumuku' ra intok mapasau giu' ra Sikgim pana namatoi ilo. Sumingon ilo mambaal ra ngaangai' baal ra malaat no.

¹⁰ Nakakito Aku ra rondo' ondo' makalalaa' giu' ra Israil: ulun Kuno nampajamol ra inan ra sumamba ra sinungkalalaing.

¹¹ Koson ramuyun, akau ulun ru Jiuda, inaru' Ku noyo orou koson mangukum ramuyun niayuk sabap ra binaal min.”