GOSIA 5 - Tanou Moonsoi Timugon

¹ Imam kau ngaangai', rongog kano! Akau ulun ru Israil, ilai' toojo! Akau pabukat ru raja', rongog kano! Akau noyo ondo' musiti' mangakim ra matimpok, kaa' akau galama' akimin! Nasauk kano koson ra landak giu' ra Mijpa, koson ra jajaling ondo' pinaatang giu' ra Gunung Tabor,

² am koson ra luang malandom giu' ra Sitim. Ginio ra mangukum Aku ramuyun ngaangai'.

³ Makapandai Aku ramuyun, akau Israil. Kalo makapansibuni kau intor Raki', am ulun mino kalo maaya' sumamba Raki'.”

Nampakara' i Gosia intor ru sumamba ra sinungkalalaing

⁴ Kalaatan ondo' binaal ru ulun ru Israil mongompong risilo sumaguli' ri Aki Kapuuno'. Kinapit ilo kaga' ru sumamba ra sinungkalalaing, saboi kalo boo mangiou ilo ra Tuhan.

⁵ Kinalimbau ru ulun ru Israil makito kaga' am nasauk ra inono' ru kasalaan nilo. Tula nilo nangkinibit risilo nakasaru am naratu', am bansa' ru Jiuda pana naratu' nakaaya' risilo.

⁶ Maguyum ilo ra Tuhan am nagibit ra domba am sapi' koson ra taak simbalui, kaa' binaal raginio kolondo' onong. Kalo nakatuum ilo ra Tuhan, sabap ra nangiruan ilo risilo.

⁷ Kalo gumagaya' ilo ra Tuhan; anak-anak nilo sala' ka anak-anak Nano. Ginio ra, kalo boo mabuoi ilo am tana' nilo pusoon.

Pangayawan ru Jiuda am Israil

⁸ Samputi' bujung giu' ra Gibia! Kosongowo' bolos ru tatandu' mampiau mangayou giu' ra Rama! Golok no ra golok ru pangayawan giu' ra Bitil! Jalai no mangayou akau bansa' ru Binjamin!

⁹ Mapuso Israil paat ra orou ukuman ra maagu no. Rongog kano, akau ulun ru Israil, baal ragitio maaru' masauk!

¹⁰ Indagu Tuhan, “Sumangit Aku sabap ra tingganai-tingganai ru Jiuda namulunsar ra Israil am nampagaau ra tana' nano. Ginio ra palumpaan Ku ukuman risilo koson ra timug ru rosob.

¹¹ Raino Israil inimbolo'. Natatakan io ra tana' longgom nano sabap ra mokotog guang nano am nakiindangan intor ra ulun ondo' mailo mangindangan riso.

¹² Ginio ra tutukon Ku Israil, am pusoon bansa' ru Jiuda.

¹³ Paat ra Israil am Jiuda makaliman ra baal nilo ondo' kalo moonsoi, mongoi Israil ra pagun Asyur koson makiindangan intor ra raja' ondo' matulai, kaa' raja' no kalo makapangindangan kapoam mamuna' ra baal nilo.

¹⁴ Koson ra sanginan singa', mamulunsar Aku ra bansa' ru Israil am bansa' ru Jiuda. Aku galama' maminsang risilo am mangiruan risilo. Ralaaton Ku ilo, am kolondo' sangulun pana makapamayag risilo.

¹⁵ Iruanin Ku ulun Kuno saboi maimbolo' ilo kaga' sabap ra tula nilo, am matong ilo maguyum Raki'. Maaru' lair ra ralalom ru kaimbalaan, mirot ilo maguyum Raki'.”