GOSIA 4 - Tanou Moonsoi Timugon

Panguwan ru Tuhan ra Israil

¹ Mokoondo' Tuhan ra panguwan ra ulun ondo' minayan ra pagun ti. Okou Israil, rongogo' noyo ragu ru Tuhan. Gitio noyo panguwan Nano: “Pagun ti kalo makaulig ra arati' ru gagaya' kapoam togom. Mamagun nano kalo mangiou ra Aku ti i Aki Kapuuno'.

² Nabantu' ilo, kaa' kalo nanugut ra bantu'. Nagabau ilo, namatoi, nantakou am nansawa'. Kalaatan gumaai am pamatayan nasauk mansusunu'.

³ Ginio ra tana' nilo masauk mapua' am ngaangai' ondo' maayag ra rasawat no matoi. Ngaangai' bibiag am susuit, am papait pana matoi.”

Nanguu' Tuhan ra imam-imam

⁴ Indagu Tuhan, “Pai' osoi pana manguu' kapoam mononsol ra ulun Kuno. Panguwan Kuno ramuyun, imam kau.

⁵ Orou rondom akau mambaal ra kasalaan. Nabi-nabi min pana koson raginio. Ginio ra mamuso Aku ra Israil, ina' min.

⁶ Ulun Kuno mapuso sabap ra marara' ilo mangiou Raki'. Akau, imam-imam, kalo mampalio Raki' am nangimpai ra pangilaan Kuno. Ginio ra Aku pana mangimpai ramuyun am kalo mangiou ra anak-anak mino koson ra imam Kuno.

⁷ Akau lumanja' masuang, lumanja' masuang tula min Raki', imam-imam kau. Kulawon Ku boo baal mino. Kalo boo urumaton kau, kaa' asabin.

⁸ Masauk kau ra langkaya' sabap ra tula ru ulun Kuno, am ginio ra akau masaga' risilo rumayus makatula.

⁹ Mansaan kau ra ukuman koson risilo. Mangukum Aku ramuyun nogondo' ra kalaatan ondo' binaal min.

¹⁰ Mangakan kau ra tayar intor ra taak-taak simbalui ondo' pinataak, kaa' marayus kau maitilan. Sambaan min dewa-dewa kalabungan, kaa' magulayun kau kalo makaalap ra anak. Ngaangai' no nasauk sabap ra nangiruan kano Raki' koson sumamba ra tuhan-tuhan ra bokon.”

Nagulas Tuhan sumamba ra sinungkalalaing

¹¹ Indagu Tuhan, “Wain, ondo' lairon am ondo' baguon nampajajou ra pangkaraan ru ulun Kuno.

¹² Nakitulu' ilo intor ra rondo' tataun. Rondo' jujuga' nambala' risilo ra atan ondo' gumogot ilo makapandai. Nangiruan ilo Raki'. Koson ra sangulun ruandu' ondo' nasauk ra ruandu' mantalan ra inan, timinaak ilo ra inan ra tuhan-tuhan ra bokon.

¹³ Nampataak ilo ra taak simbalui giu' ra intok-intok sambaan ra sinungkalalaing giu' ra gunung. Sinolob nilo kaminyan giu' ra bulur, giu' ra saau ru puun-puun tataun makalu ondo' maawas raun sabap ra intok raginio masindungan. Kinibit nano anak-anak ruandu' min nasauk ra ruandu' mantalan ra inan, am anak-anak mangiwan ra ruandu' min nansasawa'.

¹⁴ Kaa' kalo ukumin Ku ilo koson ra binaal raginio, sabap ra akau galama' pana nansawa' ra ruandu'-ruandu' mantalan ra inan ondo' mangandoi giu' ra baloi ru sinungkalalaing sambaan. Mababaya' risilo, nampataak kau ra taak simbalui ra dewa. Motopot ragu ragitio, ‘Bansa' ondo' kolondo' karatian intor ri Aki Kapuuno' mapuso.’

¹⁵ “Kabalu' pana akau, ulun ru Israil kalo gumagaya' Raki', akau no poyo Jiuda pai' pambaal koson raginio. Pai' ongoi sambayang giu' ra Gilgal, kapoam giu' ra Bitil. Pai' baalo' bantu'-bantu' ra giu' no ralalom inggalan ru Tuhan ondo' naayag.

¹⁶ Ulun ru Israil mokotog ulu koson ra baghal. Ati kulaan Aku makapagalung risilo koson ra domba giu' ra padang sakot?

¹⁷ Ulun ru Israil nabunduk guang ra sinungkalalaing. Ginio ra polosoon ilo.

¹⁸ Mopongo masuang inum ra wain, mantalan ilo ra inan ra guang maansayan. Masaga' ilo poyo asabin ka urumaton.

¹⁹ Ibiton ilo mugar koson siabin ru angin. Mokoowot ilo ra uyu' sabap ra taak-taak simbalui ondo' pinataak nilo ra dewa-dewa.