GOSIA 3 - Tanou Moonsoi Timugon

I Gosia am ruandu' ondo' kalo gumagaya'

¹ Indagu Tuhan raki', “Ongoi poyo am kasaga' no ra sangulun ruandu' ondo' masaga' mansawa'. Tagami' noyo io koson ra Aku motogom ra ulun ru Israil, kabalu' pana nangiruan ilo noyo Raki' am siminamba ra tuhan-tuhan ra bokon, am niayuk masaga' mampataak ra kuui kismis ra sinungkalalaing.”

² Aku pana nambayar mopor am limo ngampila' ruit pirok am 150 ngakilogram barli koson makaalap ra ruandu' no.

³ Minindagu aku riso ra musiti' io maginaa raki' ra mabuoi. Buoi ru ginio, kalo iowon io mantalan ra inan kapoam mansawa', am paat raginio aku pana kalo lumampit riso.

⁴ Koson niayuk ra ulun ru Israil; mabuoi kaga' ilo maayag ra kolondo' raja' kapoam tingganai, am kolondo' taak-taak simbalui, kapoam batu-batu pangkaraan ra sambayangin, kolondo' sinungkalalaing kapoam jimat-jimat ondo' pakayon koson manala' ra orou matong.

⁵ Kaa' masaboi paat ra ulun ru Israil sumaguli' ra Tuhan, i Aki Kapuuno' nilo, am ra sangulun intor ra papag ru Raja' Daut, raja' nilo. Ilo pana malaa' am mangurumat ra Tuhan, am niayuk mangapu ra pataakon-pataakon Nano ondo' moonsoi.