GOSIA 2 - Tanou Moonsoi Timugon

I Gomir ondo' kalo giminagaya' tatandu' ru Israil

¹ Indagu Tuhan, “Akau anak-anak Kuno, pakimasi' kano ra ina' min, kabalu' pana io sala' ka boo andu' Kuno, am Aku sala' ka boo ralaki nano. Pakimasi' kano riso maa' raginio pai' boo pansawa' am mantalan ra inan.

² Amon ru rumayus io mambaal raginio, iruon Ku ngaangai' binayang nano saboi magibaang koson paat ra io inanak. Pasaukon Ku io koson ra tana' ondo' kolondo' tutuu' am mapua', am matoi io boo ra paason.

³ Kalo makaasi' Aku ramuyun, anak-anak nano; akau inanak intor ra pantalanan ra inan.

⁴ Ina' mino mantalan ra inan ondo' kalo mapandai mauyu'. Kono, ‘Mongoi aku ra ambai-ambai kuno ondo' mangani' raki' ra akanon am inumon, bulu domba am linon, umau jaitun am wain.’

⁵ Ginio ra manginsur Aku riso ra bulungkut makaruui am ampangin ralan nano ra timbok.

⁶ Ilowon no ambai nano, kaa' kalo sumunu' risilo. Maguyum io risilo, kaa' kalo makatuum risilo. Mindagu io boo, ‘Muli' aku ra ralaki kasaa' kuli; baal kuno ragili moonsoi poyo intor raino.’

⁷ Kalo mangiou io ra Aku ondo' nangani' riso ra gandum, wain, umau jaitun am ngaangai' mas am pirok ondo' pinakai koson sumamba ra Baal.

⁸ Ginio ra, bulintok ra manantab luguton Ku saguli' tinaakan Kuno riso, ioginio gandum am wain. Alapon Ku saguli' bulu domba am linon ondo' tinaakan Kuno riso koson saukon ra bayang.

⁹ Iruon Ku bayang nano giu' ra saang ru ambai-ambai nano am kolondo' sangulun pana makapamayag riso intor ra kuasa' Kuno.

¹⁰ Langgain Ku ngaangai' pangiantakan nano – ondo' kia pangiantakan kabilaran am poyo pangiantakan kasilaan am orou Sabat – ngaangai' pangiantakan ru ugama nano.

¹¹ Pusoon Ku puun-puun ru anggur am puun-puun ru ara nano ondo' sumugut riso iono gaji' ru binaal nano ra ambai-ambai nano. Kulawon Ku umo ru anggur am umo ru ara nano masauk ra kataunan, am ngaangai' no pusoon ru bibiag masigo.

¹² Ukumin Ku io sabap ra nakalilian io Raki'. Monolob io ra kaminyan tayar ru Baal, am malimpor io ra kuliamos mas koson mangilou ra ambai-ambai nano. Aku, Tuhan nakaindagu noyo.”

Togom ru Tuhan ra ulun Nano

¹³ Indagu Tuhan, “Ibiton Ku poyo io ra tana' kaagisan. Giu' no, ambion Ku io ra ragu-ragu maamis.

¹⁴ Pasagulion Ku umo ru anggur ondo' linonggom no ragili am Limayak Kapaganan pasaukon ra rondo' kulobon kalansanan. Giu' no manguma' io Raki' koson ra paat io mamulok, paat ra io bagu miningkual intor ra Misir.

¹⁵ Sabiton no boo Aku ra ralaki nano, am sala' ka boo Baal nano.

¹⁶ Kalo boo iowon Ku io manabit ra inggalan ru Baal.

¹⁷ Paat raginio mambaal Aku ra nabantuan ra ngaangai' bibiag masigo am susuit, maa' raginio kalo rualin nilo ulun Kuno. Patirin Ku ngaangai' kinandoi ru pamulunsaran intor ra pagun no, ngaangai' ilang am busur, maa' raginio ulun Kuno maayag ra kaansayan.

¹⁸ Okou Israil, saukon Tokou ra andu' Kuno; mabanis guang Kuno am gumagaya'; pakitonon Ku togom am makaasi' rirun, am niayuk saukon kou ra longgom Kuno ra sabuoi-buoi no.

¹⁹ Suguton Ku bantu' Kuno am saukon kou ra longgom Kuno, am mangiou kou ra Aku ti Tuhan.

^20-21 Paat raginio, taamon Ku pakiasian-pakiasian ru ulun Kuno Israil. Paratuon Ku rasam ra rasawat ru tana', am tana' manangampos ra gandum, anggur am jaitun.

²² Saukon Ku ulun Kuno langkaya' am lumayun giu' ra pagun no. Makaasi' Aku risilo ondo' sabiton ‘Kalo Tagamin’; am risilo ondo' sabiton ‘Sala' ka Ulun Kuno’ am raguon Kuno ‘Akau ulun Kuno’; am tumaam ilo, ‘Okou noyo i Aki Kapuuno' mai.’ ”