GOSIA 12 - Tanou Moonsoi Timugon

Israil am Jiuda inukum

¹ Indagu Tuhan, “Liminibung bansa' ru Israil Raki' ra abau am ruung, am bansa' ru Jiuda lakat poyo gumuor Raki', i Aki Kapuuno' ondo' matulai am gumagaya'.

² Ngaangai' ondo' binaal ru ulun ru Israil intor ra susuab ti saboi ra mamai' ngaangai' no kolondo' onong, kaa' niayuk paliso no mamuso koson ra angin sirangon. Abau am kalaatan gumaai-gaai ra gino po ngai' nilo. Nambaal ilo ra nabantuan ra Asyur am niayuk nagibit ra umau giu' ra Misir koson ra tatandu' ru pabukatan.”

³ Tuhan mokoondo' ra panguwan ra ulun ru Jiuda; am mangukum Io ra ulun ru Israil niayuk sabap ra paliso nilo. Mambalos Io ra binaal nilo.

⁴ Kinamatuaan nilo, i Jakub, namparuung ri Isau, pongkotob ra pongkobon nano paat ra ilo ruo lakat poyo ra ralalom ru binunakan ru ina', am paat nasukor i Jakub giminula' ri Aki Kapuuno'.

⁵ Nagabu' i Jakub ra malaikat am namanang. Nantangi' i Jakub ra nakibarakat, am minatong i Aki Kapuuno' riso giu' ra Bitil am minindagu riso.

⁶ I Aki Kapuuno' no Tuhan Ondo' Maayo Kaga' Kuasa'. Inggalan Nano Tuhan. Inggalan raginio noyo Io masaga' ra ulun sumambayang Riso.

⁷ Ginio ra, akau papag ri Jakub, pangintopot kano ri Aki Kapuuno', am saguli' kano Riso. Kaayag kano ra matikop ra togom am baalo' ondo' matimpok, am inaani' ra guang tumaan saboi i Aki Kapuuno' min mimbuor.

Ragu ra sumunu' ti intor ra ukuman ra Israil

⁸ Indagu Tuhan ra ulun ru Israil, “Malaat kau koson ra ulun ru Kanaan. Ulun mantatalan min masaga' mamparuung ra ulun mambali ra timbangan ondo' kalo motopot.

⁹ Konilo, ‘Langkaya' akai raino. Masuang rapu' mai. Kolondo' osoi pana makapanguu' ramon nambaal ra malaat.’

¹⁰ Aku noyo Tuhan, i Aki Kapuuno' min ondo' naningganai ramuyun miningkual intor ra Misir; pinaayan Ku poyo akau ra kim koson ragili, paat ra Aku minatong ramuyun giu' ra tana' kaagisan.

¹¹ “Minindagu Aku noyo ra nabi-nabi, am niayuk nangani' risilo ra masuang pinaintalang, am pinabala' galing risilo nangani' Aku ra pampakaraan ra ulun Kuno.

¹² Kaa', lakat poyo mokoondo' ondo' siminamba ra sinungkalalaing giu' ra Giliad am nampataak ra sapi' giu' ra rasawat ru altar giu' ra Gilgal. Kaa' matoi ilo ondo' siminamba ra sinungkalalaing no, am altar-altar giu' ra Gilgal masauk ra batu tinuntur giu' ra padang.”

¹³ Kinamatuaan takau, i Jakub, nagiru' ayuk kalalaat giu' ra pagun Misopotamia. Giu' no nangandoi io ra ulun bokon koson magagalung ra domba koson mokoowot ra andu'.

¹⁴ Nanusub Tuhan ra sangulun nabi koson mampalabus ra ulun ru Israil intor ra pangulipanan giu' ra Misir, am koson magalung risilo.

¹⁵ Nambaal ulun ru Israil ra Tuhan siminangit kaga'; maaya' ilo ukumin ra matoi sabap ra kalaatan nilo. Mangukum Tuhan risilo sabap ra nagasab ilo Riso.