GOSIA 10 - Tanou Moonsoi Timugon

¹ Ulun ru Israil koson ra puun ru anggur ondo' makakawa' ra maawas. Gumaai langkaya' nilo, sumuang poyo altar baalon nilo. Sumuang-suang ampos ru tana' nilo, matuyu' poyo boo batu-batu sambaan ondo' binaal nilo.

² Guang nilo natikop ra ruung am raino ilo musiti' maimbolo' kinibit ru tula nilo. Lunsayon ri Aki Kapuuno' altar-altar nilo am mampagaba' ra batu-batu sambaan nilo.

³ Kalo boo mabuoi mindagu ilo, “Kolondo' raja' takau sabap ra kalo malaa' takau ra Tuhan. Atan onong ru sangulun raja' ritakau?”

⁴ Mindagu ilo ra ragu-ragu kolondo' toojo onong am nambaal ra bantu' magabau am niayuk nangigot ra nabantuan ondo' kolondo' onong. Katimpakan pinatimpurok saboi kolondo' katimpakan no nakasuku' ra titikop pagun koson ra tatanom makaanit giu' ra umo ondo' rinadu' noyo.

⁵ Mamagun ru bandar Samaria malaa' am nangulir sabap ra natatakan ra sapi' mas giu' ra Bitil. Ilo am imam-imam ondo' nangandoi ayuk ra sapi' mas mantangi'. Gumolok ilo paat ra katulayan ru sinungkalalaing no lumiot.

⁶ Sinungkalalaing no ibiton giu' ra Asyur koson pataakon ra raja' ondo' matulai. Israil asabin am tauyuon sabap ra bilin ondo' binaya' nano.

⁷ Raja' ru Samaria mapuso koson ra putul ru tataun ondo' naabas ru timug.

⁸ Intok-intok ru ulun ru Israil sumamba ra sinungkalalaing giu' ra tampak ru bulur giu' ra Bitil pusoon. Bulungkut makaruui am niayuk sakot mampalungkut ra altar-altar nilo. Ulun pana gumolok ra gunung-gunung, “Sibunio' akai!” am ra bulur-bulur, “Ratu' no ramon!”

Tuhan nangani' ra ukuman ra Israil

⁹ Indagu Tuhan, “Ulun ru Israil kalo poyo igondo' longgo' pambaal ra tula Raki' intor ra ilo makatula giu' ra Gibia. Ginio ra malumpa' ilo ru pangayawan giu' ra Gibia.

¹⁰ Bulunsaron Ku ulun ondo' makatula ti am mangukum risilo. Bansa'-bansa' maguguum koson manggal risilo, am ukumin ilo sabap ra tula nilo ondo' masuang no.

¹¹ “Galing i Israil koson ra sapi' mamulok ondo' inila', am magail tumampos mangagik ra gandum. Kalo pana boo paatangon Ku kuk ra impus nano ondo' moonsoi no. Kaa' raino namatas Aku noyo koson jajalin io mangandoi ra maagat. Manusub Aku ri Jiuda mamparadu' am Israil mamunduk ra radu'.

¹² Indagu Aku, ‘Ukabo' tana' bagu ra tayar min galama', tiasi' ra sampug ru katimpakan, am kumoso' barakat ondo' inampos ru kinotopot ru togom min Raki'. Nasaboi paat no ra akau sumaguli' Raki', Tuhan min; matong Aku am mampasasar ra barakat ramuyun.’

¹³ Kaa' akau boo nantanom ra kalaatan am nangkumos ra kolondo' katimpakan. Mangakan kau kalalaat ra ampos ru abau min. “Ginio sabap ra akau malansan ra kurita' kuda min, am saujor min ondo' masuang kaga',

¹⁴ am akau pana malumpa' ru pangayawan am ngaangai' kubu min pusoon. Baal nano masauk koson ra orou ru Raja' Salman namuso ra bandar Bit-Arbil ralalom pangayawan, am nampaluus ra ina'-ina' nababaya' ra anak-anak nilo.

¹⁵ Baal raginio masauk ramuyun, mamagun kau ru Bitil, sabap ra nambaal kau ra kalaatan ondo' maayo. Makatalimpuun ayuk pangayawan, matoi raja' ru Israil.”