ESTER 8 - Tanou Moonsoi Timugon

Sinusub ulun ru Jaudi manggal ra pantula'

¹ Paat ra orou raginio niayuk, nangani' Raja' Agaswiros ra Andu' raja' Ester ra ngaangai' rapu' ri Gaman, pantula' ru ulun ru Jaudi. Nambala' i Ester ra raja' ra Mordikai iono pantukir nano. Intor raginio iniou boo i Mordikai koson muma' ra raja' ra kalo pana piawon galing.

² Pinagus ru raja' sinsing pasaapon ondo' bagu inalap no saguli' intor ri Gaman, am pataako' no ri Mordikai. Linantik poyo ri Ester i Mordikai nasauk ra panguasa' ra rapu' ri Gaman.

³ Kopongo raginio uma' poyo i Ester ra raja' liliwa' migulatur am pantangi'. Makitaak io maa' raginio langgain ru raja' paguguuman ondo' inatang ri Gaman, papag ri Agag ra ulun ru Jaudi.

⁴ Pinatutui ru raja' jujuga' mas nano ri Ester, am ingkakat i Ester am indagu,

⁵ “Amon ru mangiou kou raja', am amon ru motogom kou raki', musiti' kou mapaingkual ra surat susuban koson mopolonggo' ra surat susuban ri Gaman anak ri Gamidata papag ri Agag, ondo' makasuang ra susuban koson mamuso ra ngaangai' ulun ru Jaudi giu' ra titikop ru pamarintaan.

⁶ Ati kulaan lair ru aku tumaan magilong ra karaat ondo' masauk ra bansa' kuno, am magilong ra pabukat-pabukat kuno potoyon?”

⁷ Indagu Raja' Agaswiros ra Andu' raja' Ester am i Mordikai, ulun ru Jaudi no, “Inukuman ku noyo ra tairon i Gaman sabap ra inatangan malaat nano ra ulun ru Jaudi, am nangani' aku noyo ra ngaangai' rapu' nano ri Ester.

⁸ Kaa' kalo malanggaan ku susuban ondo' binaal ralalom ru inggalan kuno galama', am ondo' sinaapan ra saap ru raja'. Kaa' mangiou aku ramuyun manulis ra surat ra ulun ru Jaudi, atan ayuk ondo' kasagaan min. Iowon kau manulis ra surat no ralalom ru inggalan kuno am saapin ginio ra saap ru raja'.”

⁹ Baal raginio nasauk paat ra orou karuo ngoopor am talu ra sila' katalu, iono sila' Siwan. Piniau ri Mordikai ngaangai' mamamatik ru raja' am nanusub risilo manulis ra surat ra ulun ru Jaudi, gabenor-gabenor, pagawai ru pamarintaan am tingganai giu' ra titikop ru 127 wilayah ru pamarintaan no, intor ra India saboi ra Itiopia. Surat-surat no tinulisan posoboyon ra moonong wilayah ralalom ragu am tulisan ru sigagama'. Io niayuk nangator ra surat ra ulun ru Jaudi ralalom ragu am tulisan ru Jaudi.

¹⁰ Surat-surat no tinulisan ralalom ru inggalan ru Raja' Agaswiros am sinaapan ra sinsing pasaapon ru raja'. Nanusub boo i Mordikai ra ulun-ulun sinusub nangator ra surat-surat no giu' ra titikop ru wilayah ru pamarintaan ra nangura' ra kuda maribok longgom ru raja'.

¹¹ Surat-surat no mangiou ra ulun ru Jaudi giu' ra moonong bandar koson magisaung ra inan. Amon ru ilo, andu' am anak nilo bulunsaron giu' ra wilayah ra ati pana ru ulun makakinandoi intor ra bansa' ru atan pana, iniou ilo manggal am mamuso ra pantula' no. Iniou ilo mamatoi ra pantula' saboi makai' am niayuk mampagaau ra rapu' ru pantula' no.

¹² Ragu raginio pinaugar giu' ra titikop pamarintaan ru Pirsia paat ra orou ondo' inaru' koson pamatayan ra ulun ru Jaudi, iono paat ra orou koopor am talu sila' koopor am ruo, iono sila' Adar.

¹³ Surat susuban no musiti' paugaron koson ra undang-undang, am potonowon ra ngaangai' ulun giu' ra moonong wilayah, maa' raginio bansa' ru Jaudi makatampos manggal ra pantula' paat orou raginio masaboi.

¹⁴ Kopongo raginio mabaya' ra susuban ru raja', ulun-ulun sinusub no minugar ra nangura' ra kuda longgom ru raja' am minongoi ra naringkaagou. Susuban no pinatanou niayuk giu' ra Susan, pusor bandar ru pamarintaan.

¹⁵ Kopongo raginio nangiruan i Mordikai ra istana, liliwa' nambayang ra bayang ru raja' makabatik motomou am mapulak, sukub matanggilung intor ra konoon linon ondo' malumis, am karaun mas ondo' moonsoi kaga'. Ulun giu' ra ralan-ralan maayo ru bandar Susan nagilakup sabap ra naansukan.

¹⁶ Ulun ru Jaudi naansayan am nagilakup, naansukan am naantak guang.

¹⁷ Giu' ra moonong bandar am wilayah, ati ayuk ragu ru raja' no basaan, ulun ru Jaudi maansayan, naansukan am nambaal ra bunsag. Inambai poyo ra masuang ulun nasauk ra ulun ru bansa' ru Jaudi sabap ra malaa' ilo ra bansa' raginio.