ESTER 7 - Tanou Moonsoi Timugon

¹ Raja' am i Gaman pana minongoi boo akan nabaya' ri Ester

² koson ra kainduo. Liliwa' ilo manginum ra wain, pangkuot poyo raja', “Okou Andu' raja' Ester, atan kia gogoton muno? Raguo' noyo, am aniin tokou, kabalu' pana sampiruo intor ra pamarintaan kutu.”

³ Taam Andu' raja' Ester, “Amon ru mangiou kou raja' ra gogoton kuno, kitaakon ku maa' raginio aku am bansa' kuno maayag,

⁴ sabap ra aku am bansa' kuno tinalan noyo koson ra potoyon. Amon ru aku am bansa' kuno tinalan ayuk koson saukon ra inulipon, mongkoror aku am marara' manguliso rirun raja'. Kaa' pusoon akai am liomon intor ra tana' ti!”

⁵ Pangkuot Raja' Agaswiros ra Andu' raja' Ester, “Osoi kia ondo' baani mambaal raginio? Ati kia ulun no?”

⁶ Taam i Ester, “Pantula' am mangimbolo' ramon iono i Gaman, ulun ondo' malaat ti!” Nonontong i Gaman ra raja' am andu' raja' ra nalaa' kaga'.

⁷ Siminangit kaga' raja', am bigor am nangiruan ra mija'; narayus raja' minongoi ra liwar, giu' ra taman istana. Nakaliman i Gaman ra ginuang noyo ru raja' koson mangukum riso sabap ra binaal nano. Ginio ra soroi ayuk i Gaman ra giu' no nabaya' ra Andu' raja' Ester koson makimasi' maa' raginio bayagon.

⁸ Nabaya' ra nangkausan ratu' i Gaman ra rasawat ru intok turungan ri Ester koson makimasi'. Kaa' paat raginio niayuk siminaguli' raja' intor ra taman istana. Pakakito raja' ri Gaman koson raginio, indagu raja', “Atan? Ulun ti lakat niayuk poyo baani manawo ra andu' raja' ragiti, ra saang kutu am ralalom ru istana ku galama'!” Karagu ayuk ru raja' gini, kukula' ngaulun sida-sida nanguluput ra ulu ri Gaman.

⁹ Sangulun intor risilo ondo' ininggalanan ri Arbona mindagu, “Nambaal noyo i Gaman ra lugu' pampatairan mamaar ra baloi nano koson mampatair ri Mordikai ondo' namayag noyo rirun raja' mai. Lugu' no ra sawat 22 ngamito.” Indagu raja', “Tairo' noyo i Gaman ra lugu' no!”

¹⁰ Koon raginio noyo i Gaman tinair ra lugu' pampatairan ondo' binaal nano ra tayar ri Mordikai. Kopongo raginio bagu no sangit ru raja' no siminalui.