ESTER 6 - Tanou Moonsoi Timugon

Mangurumat raja' ri Mordikai

¹ Paat rondom raginio niayuk raja' kalo mokororot. Ginio ra, kitaako' ru raja' maa' raginio tinulisan rasmi ru pamarintaan alapon am nanusub raja' ra ulun mambasa' raginio.

² Tayar ondo' binasa' nakaaya' tinulisan ra i Mordikai nambala' noyo ra inatangan mamatoi ra raja', ondo' inatang ri Bigtan am i Tiris, ruo ngaulun sida-sida ondo' magalung ra lamin-lamin ru raja'.

³ Pangkuot raja', “Itakau ti nangurumat noyo kia am niayuk nambalos ra binaal moonsoi ri Mordikai no?” Taam kambo-kambo ru raja', “Kalo poyo raja' mai. Kolondo' atan-atan inapu nano!”

⁴ Kopongo raginio pangkuot raja', “Osoi kia ra gino ngai' pagawai kuno ondo' soroi ra istana raino ti?” Nakainamot ra i Gaman bagu ayuk minumpos ra liliut ru istana. Minatong io koson makitaak ra raja' koson manair ri Mordikai ra lugu' panairan ondo' tinirong noyo.

⁵ Ginio ra indagu kambo-kambo ru raja', “Soroi i Gaman ragiti, raja' mai. Moogot io muma' rirun raja' mai.” Indagu raja', “Susubo' io sumubol.”

⁶ Ratong i Gaman ra muma', am indagu raja' riso, “Mokoondo' sangulun ondo' masaga' aku mangani' ra pangurumatan. Atan kia ondo' musiti' kuno baalon riso?” Nangkara' i Gaman, “Maaru' aku noyo ondo' aniin ra pangurumatan ru raja'. Kolondo' noyo lair ra bokon.”

^7-8 Ginio ra, kono ra raja', “Raja' kuno, susubo' maa' raginio bayang ru raja' galama' bayangon ra ulun no. Kuda muno raja' musiti' bungain ra tatandu'-tatandu' ru raja'.

⁹ Susubon boo maa' raginio sangulun tingganai ru pasimpungan pagun intor ra ulun bangsawan mampabayang ra bayang no ra ulun raginio, am magibit ra ulun no mangura' ra kuda muno raja' mansail ra babayaan ru bandar. Tingganai no musiti' mugar ra saang nano liliwa' gumolok, ‘Ilai', koon ragitio noyo raja' mangani' ra pangurumatan ra ulun ondo' kaansayin nano!’ ”

¹⁰ Kopongo raginio indagu raja' ri Gaman, “Ribaki' noyo! Alapo' bayang am kuda kuno, am anii' ngaangai' pangurumatan no ri Mordikai ulun ru Jaudi no. Baalo' noyo riso ngaangai' ondo' inatang muno, ra kalo mangiruru' rondo' pana. Tatanga' io manturung giu' ra saang ru kulobon garabang istana.”

¹¹ Ginio ra inalap ri Gaman bayang am kuda ru raja', am pabayango' bayang no ri Mordikai. Nangura' i Mordikai ra kuda no am i Gaman nagibit riso mansail ra babayaan ru bandar. Liliwa' mugar, pinatanou ri Gaman, “Ilai', koon ragitio noyo raja' mangani' ra pangurumatan ra ulun kaansayin nano!”

¹² I Mordikai pana turung saguli' boo giu' ra kulobon garabang istana. Kaa' i Gaman agou-agou minuli' ra baloi liliwa' nanili ra bulos nano sabap ra nauyu' kaga'.

¹³ Nambala' i Gaman ra andu' nano am rangan-rangan nano ra atan ondo' nasauk noyo. Andu' am rangan-rangan nano ondo' mangapintar no mindagu riso, “Okou tumalimpuun maala ri Mordikai. Io ulun ru Jaudi, am kalo makagula' kou riso. Maaru' makapangala io rirun.”

Inukuman i Gaman ra matoi

¹⁴ Liliwa' ra ilo lakat poyo magindagu, sida-sida intor ra istana minatong ra naagou-agou koson magibit ri Gaman mongoi ra bunsag ondo' binaal ri Ester.