ESTER 5 - Tanou Moonsoi Timugon

Nampiau i Ester ra raja' am i Gaman mongoi ra bunsag nano

¹ Paat ra orou katalu ru nampalian nano, nambayang i Ester ra bayang ru andu' raja', am ongoi ra liliut tampilon ralalom giu' ra istana am minigor giu' ra saang ru kulobon balairung. Tatanga' raja' nanturung giu' ra rasawat ru panturungan ru raja' ondo' nakatingkuang ra kulobon no.

² Pakakito raja' ri Andu' Raja' Ester minigor giu' ra liwar, motogom raja' riso, am patutuyo' jujuga' mas riso. Ginio ra jalai i Ester am kombongo' pompor ru jujuga' no.

³ Raja' pana pangkuot boo, “Atan kuayan mutu, Andu' Raja' Ester? Raguo'! Mangani' aku inda' pana ru sampiruo intor ra pamarintaan kutu.”

⁴ Taam i Ester, “Amon ru mangiou kou raja', moogot aku mampiau rirun am i Gaman mongoi ra bunsag ondo' baalon ku koson rirun ra rondom no.”

⁵ Ginio ra nanusub raja' ri Gaman muma' ra mataki' maa' raginio makasugut ilo maninong ra piau ri Ester. Minatong raja' am i Gaman ra bunsag ondo' binaal ri Ester.

⁶ Paat ra ilo nagiginum ra wain, pangkuot raja' ri Ester, “Raino raguo' gogoton muno, am iowon ku. Atan pana kitaakon muno aniin ku, kabalu' pana sampiruo intor ra pamarintaan kutu!”

⁷ Taam i Ester,

⁸ “Amon ru iowon mu koson mangani' ra kitaakon kuno, moogot aku mampiau rirun raja' am i Gaman igondo' poyo mongoi ra bunsag ondo' baalon kuno ra susuab. Paat raginio bagu no mambala' aku ra kitaakon kuno rirun raja'.”

Inatang malaat ri Gaman koson mamatoi ri Mordikai

⁹ Paat i Gaman minuli' intor ra bunsag no, guang nano naansukan am maantak. Kaa' pakakito i Gaman ri Mordikai giu' ra kulobon garabang ru istana, am kalo miningor i Mordikai kapoam nampakito ra tatandu' mangurumat paat io nansail, siminangit kaga' i Gaman.

¹⁰ Kaa' inorot no guang nano am narampus uli' ra baloi nano. Nampiau io ra rangan-rangan nano ra baloi nano am nampiau ra andu' nano i Jiris nanturung nababaya' risilo.

¹¹ Liminimbau i Gaman ra saang nilo – mapara' boo langkaya' nano, mapara' boo suang ru anak ungkuyon nano, mapara' boo kinaatang ru intok ondo' inapu no intor ra raja', am sawat ru pangkat nano intor ra pagawai ra bokon.

¹² “Naruangan poyo,” rinayus poyo ri Gaman, “Andu' Raja' Ester nangkimait ayuk ra raja' am aku galama' minongoi ra bunsag ondo' binaal nano, am susuab piniau akai poyo koson sumaang ra bunsag.

¹³ Kaa' ngaangai' no kolondo' onong raki' ra buoi kuno magilong ri Mordikai ulun ru Jaudi no manturung giu' ra kulobon garabang ru istana.”

¹⁴ Pokorongog ra baal raginio, andu' nano am ngaangai' rangan nano mindagu, “Tirongo' rondo' lugu' panairan ra sawat no 22 ngamito, am rumondom ra susuab no kitaakon maa' raginio mangukum raja' ra tairon i Mordikai. Akau pana makasaang boo ra bunsag no ra guang maansukan.” Nampaguang i Gaman ra inatangan no moonsoi. Ginio ra nanusub io ra ulun mambaal ra lugu' pampatairan no.