DANIL 9 - Tanou Moonsoi Timugon

Pakiasian ri Danil tayar ru bansa' nano

¹ Raja' Darius ulun ru Midia, anak ungkuyon ru Raja' Agaswiros, nasauk ra raja' ru pamarintaan Babilonia.

² Paat ra bilor kasaa' ra pamarintaan nano, nambasa' aku ra buuk kitab. Nampaguang aku toojo ra baal ru bandar Jirusalim ondo' nasauk ra tuntur nalunsai buoi tulu' ngoopor ngambilor, koson ondo' rinagu ru Tuhan ri Nabi Jirimia.

³ Aku pana makiasi' toojo ra Tuhan, i Aki Kapuuno', nakimasi' Riso, liliwa' nampali am nambayang ra karung, am niayuk nanturung ra rasawat ru kaau.

⁴ Pakiasi' aku ra Tuhan, i Aki Kapuuno' kuno, am nangiou ra tula ru bansa' kuno ra saang Nano. Indagu aku, “Iou Tuhan, i Aki Kapuuno', Okou maayo, am mangurumat akai Rirun. Manugut Kou ra nabantuan Muno, am magail Kou motogom ra ulun ondo' motogom Rirun am ondo' gumagaya' ra susuban Muno.

⁵ “Makatula akai noyo. Nambaal akai noyo ra kalaatan. Nambaal akai noyo ra kasalaan. Minanggal akai noyo ra susuban Muno, am siminiang intor ra aturan Muno.

⁶ Kalo nangkirongog akai ra nabi-nabi, ulipon-ulipon Muno, ondo' minindagu sabap ra inggalan Muno ra raja', panguasa', am kinamatuaan mai, am niayuk ngaangai' ru bansa' mai.

⁷ Okou, iou Tuhan masalok mambaal ra motopot, liliwa' akai masalok manuyu' ramon galama'. Koon raginio niayuk ra ngaangai' ru bansa' mai ondo' minayan ra Jiuda, Jirusalim, am ngaangai' ulun ru Israil ondo' pinantutuliar Mu giu' ra pagun-pagun mamaar am maalur sabap ra kalo gumagaya' ilo Rirun.

⁸ Raja'-raja' mai, panguasa'-panguasa' mai am kinamatuaan mai nambaal noyo ra baal ondo' makauyuyu' am niayuk makatula Rirun, iou Tuhan.

⁹ Maayo guang Muno makaasi' am mangampun, kabalu' pana giminuor akai Rirun.

¹⁰ Kalo mangkirongog akai Rirun, iou Tuhan, i Aki Kapuuno' mai, paat ra Okou nanusub ramon maayag sumugut ra ukum ondo' tinaakan Muno ramon ondo' pinabala' galing ra nabi-nabi, ulipon-ulipon Muno.

¹¹ Ngaangai' ulun ru Israil minanggal ra ukum Muno am marara' rumongog Rirun. Makatula akai noyo Rirun, ginio ra nangukum Kou ramon ra pagulasan ondo' tinulisan ralalom ru Ukum ri Musa, ulipon Muno.

¹² Sinugut Mu noyo ondo' rinagu Muno ramon am panguasa'-panguasa' mai. Nangukum Kou ra Jirusalim moporos poyo intor ra bandar-bandar ra bokon ra tana' ti.

¹³ Nangukum Kou ramon siminugut ra ngaangai' ondo' natulisan ralalom ru Ukum ri Musa. Raino pana, iou Tuhan, i Aki Kapuuno' mai, kalo minirot akai koson mapabansuk ra guang Muno. Kalo timinalikur akai intor ra tula mai kapoam siminugut ra pangilaan Muno ondo' motopot.

¹⁴ Nakatampos Kono mangukum ramon, iou Tuhan, i Aki Kapuuno' mai, am nakapangukum Kono ramon. Atan ondo' baalon Muno totopot matimpok sabap ra kalo rumongog akai Rirun.

¹⁵ “Nanulu' Kou ra kuasa' Muno bulintok ra Okou nagibit ra ulun Muno miningkual intor ra Misir, iou Tuhan, i Aki Kapuuno' mai. Lakat mai poyo makara' kuasa' Muno. Makatula akai noyo am nambaal ra kasalaan.

¹⁶ Sinaung Mu akai ragili. Ginio ra pai' noyo boo sangit ra Jirusalim. Bandar ti bandar Muno, bulur Muno ondo' matulai. Ngaangai' ulun intor ra pagun-pagun paginggaar nagasab ra Jirusalim am ulun Muno, sabap ra tula mai am kalaatan ondo' binaal ru kinamatuaan mai.

¹⁷ Rongogo' noyo pakiasian am kitaakon kutu, iou Aki Kapuuno'. Tapulio' Baloi Muno ondo' pinuso no maa' raginio moonong ulun makapandai ra Okou noyo Tuhan.

¹⁸ Rongogo' akai no, iou Aki Kapuuno'; tantangi' akai no, am ilai' kapaganan mai. Ilai' kaimbalaan ru bandar ondo' sabiton ra inggalan Muno. Makiasi' akai Rirun sabap ra maayo guang Muno makaasi' am sala' ka sabap ra binaal moonsoi mai.

¹⁹ Rongogo' akai no, iou Tuhan, am ampuno' akai no. Rongogo' akai no, iou Tuhan, am imbuor no! Pai' kototoi maa' raginio moonong ulun makapandai ra Okou noyo i Aki Kapuuno'! Bandar am ulun ti longgom Muno.”

Nambala' i Gabriil ra arati' ru ragu inala'

²⁰ Rinayus ku nakiasi', am nangiou ra tula kuno am niayuk tula ru bansa' kuno Israil. Aku niayuk nakitaak ra Tuhan, i Aki Kapuuno' kuno koson mapatapuli' ra Baloi Nano ondo' matulai.

²¹ Liliwa' aku makiasi', i Gabriil ondo' nakito kuno ralalom ru pinaintalang kuno ondo' ragili, nansiab minongoi raki'. Paat raginio noyo inaru' koson mampataak ra taak simbalui ra mamai' ti.

²² Nambala' toojo i Gabriil, “Okou Danil, matong aku koson mangindangan rirun makarati' ra ragu inala' no.

²³ Paat ra okou timinalimpuun nakitaak ri Aki Kapuuno', tinaam No kinitaak muno. Minatong aku nampasaboi ra taaman no sabap ra motogom Io kaga' rirun. Ginio ra rongogo' toojo liliwa' ra aku mambala' toojo ra arati' ru pinaintalang no.

²⁴ “Intulu' tulu' ngoopor ngambilor iono buoi ondo' inaru' ri Aki Kapuuno' koson mampalabus ra bansa' muno am bandar muno ondo' matulai no intor ra tula am kalaatan. Tula ampunon am katimpakan ondo' mantilayun potolorogon, maa' raginio pinaintalang am ragu inala' no totopot masauk, am maa' raginio Baloi ru Tuhan ondo' matulai patimpokon saguli'.

²⁵ Guango' am aratio' baal ragitio: Intor ra jam ru susuban pinaingkual koson mambaal saguli' ra Jirusalim, saboi ra ratangan ru tingganai ondo' pinili' ri Aki Kapuuno', buoi nano iono intulu' tulu' ngambilor. Jirusalim baalon saguli' ra ralan-ralan maayo am pangampinan ondo' maikang, am tumaan buoi intulu' onom ngoopor am ruo ngambilor, kaa' paat raginio nososok ra kapaganan.

²⁶ Pompor ru paat raginio, tingganai ondo' pinili' ri Aki Kapuuno' no potoyon kabalu' pana kolondo' sala nano. Bandar Jirusalim am Baloi ru Tuhan pusoon ru pulalai ru saujor ru sangulun raja' ondo' makakuasa'. Pupus ru ginio sumaboi koson ra liur ondo' magibit ra pampatayan am kapusaan ondo' inaru' noyo ri Aki Kapuuno'.

²⁷ Mambaal raja' no ra nabantuan ondo' mapiot ra masuang ulun buoi tulu' ngambilor. Malintanga' paat no, langgain ru raja' ngaangai' taak simbalui am pataakon. Rondo' ondo' sabiton ra ‘Karaat Ondo' Moporos’ pabantaan boo giu' ra Baloi ru Tuhan, am magulayun ra giu' no saboi ra ulun ondo' napabanta' no makatuum ra kapusaan ondo' inaru' noyo ri Aki Kapuuno' riso.”