DANIL 8 - Tanou Moonsoi Timugon

Pinaintalang ri Danil intor ra domba gawayan am kambing gawayan

¹ Paat bilor katalu ra pamarintaan ru Raja' Bilsyajar, nakakito aku ra pinaintalang karuo

² Ralalom ru pinaintalang no, pulali' ku nakaliman ra inan ku giu' ra wilayah Ilam, giu' ra Susan, pusor bandar Pirsia. Minigor aku mamaar ra Sungoi Ulai.

³ Giu' ra igig ru sungoi no nakakito aku ra sanginan domba gawayan ondo' mokoondo' ruo sangau ondo' maawar: ondo' rondo' maawar poyo am baguon poyo intor ra bokon.

⁴ Nakakito aku ra domba gawayan no nanangau ra tampilon kalasaan, ralayo am rabugus. Kolondo' bibiag ondo' makainga' riso, kapoam makapagiru intor ra kuasa' nano. Domba gawayan no mambaal maya' ra kasagaan ru guang am giminaai lumimbau.

⁵ Tatanga' aku magilong, sanginan kambing gawayan nagisimbul intor ra kalasaan am nansail ra tana' ra maribok kaga' saboi kalayam nano kalo boo nokosonor ra tana'. Kambing gawayan no mokoondo' rondo' sangau ondo' minujak ra lolot ru ruo mato nano.

⁶ Kambing gawayan no minongoi ra domba gawayan ondo' nakito ku minigor giu' ra igig ru sungoi no, am pamulunsar ra domba gawayan no ra ngaangai' ru ikang nano.

⁷ Nakito ku kambing gawayan namulunsar ra domba gawayan ra masangit kaga' saboi nanangau ra karuo-ruo sangau ru domba gawayan no am pinandak no. Domba gawayan no kalo makagula' migampin ra inan, am karatu' boo ra tana' am kikinjangi'. Kolondo' osoi pana makapamayag riso.

⁸ Kambing gawayan no giminaai limbau, kaa' pakasaboi kambing gawayan no ra rasawat toojo ru kakuasaan nano, sangau nano napandak. Koson ra palit nano, salula' poyo apat sangau ondo' nakaujak am manulu' ra intok ondo' nansasala'.

⁹ Rondo' intor ra apat sangau no pulali' nampatuu' rondo' sangau ondo' boborok, am kuasa' ru sangau boborok no liminangka' minongoi ra tampilon rabugus, sirangon am tampilon ra tana' ondo' moonsoi.

¹⁰ Sangau no nasauk ra maikang kaga' saboi nakabulunsar ra saujor-saujor ru suruga'. Kukula' ra gino ngai' saujor-saujor ru suruga' am bibiag-bibiag rinatuan no ra tana' ti, am kikinjangi' no.

¹¹ Sangau boborok no baani kaga' manggal ra Panglima ru saujor-saujor ru suruga', nopolonggo' ra taak simbalui orou-orou ondo' pataakon ra Panglima no, am nampajamol ra Baloi ru Tuhan.

¹² Giu' no ulun mambaal ra tula am kalo boo mampataak ra taak simbalui orou-orou ondo' musiti' baalon. Baal ondo' motopot intor ri Aki Kapuuno' inimpayan. Sangau boborok no nakasugut ralalom ngaangai' pirot binaal nano.

¹³ Kopongo raginio nokorongog aku rondo' malaikat nangkuot ra malaikat ra bokon, “Kula' kia buoi ru baal ondo' nakito ralalom pinaintalang no mugar? Kula' kia buoi ru tula maayo malit ra taak simbalui orou-orou no? Kula' kia buoi ru saujor-saujor ru suruga' am Baloi ru Tuhan kikinjangin?”

¹⁴ Nokorongog aku ra malaikat ra bokon tumaam, “Baal raginio masauk buoi 1,150 ngoorou, am buoi ru ginio taak simbalui ra susuab ti am taak simbalui ra mamai' ti kalo pataakon. Mopongo raginio Baloi ru Tuhan punaan.”

Malaikat Gabriil nambala' ra arati' ru pinaintalang no

¹⁵ Tatanga' ra aku mirot koson mangarati' ra arati' ru pinaintalang no, pulusat ru sangulun minigor ra saang kuno.

¹⁶ Nokorongog aku ra bolos intor ra Sungoi Ulai mindagu, “Gabriil, pambala' toojo ra arati' ru pinaintalang no riso.”

¹⁷ Mininggaar i Gabriil raki' am bigor ra sapapa' kuni. Malaa' aku kaga' saboi liminaub aku. Kon ri Gabriil raki', “Okou ulun mapandai matoi, aratio' noyo arati' nano. Pinaintalang no intor ra orou pupus no.”

¹⁸ Tatanga' aku mindagu, naratu' aku ra tana' am nalausan. Kaa' ginuut no aku, am nangindangan raki' migor.

¹⁹ Kono poyo, “Mambala' aku rirun ra baal nano ra tauli no koson ra kinibit ru sangit ri Aki Kapuuno'. Pinaintalang no intor ra orou pupus no.

²⁰ Domba gawayan ondo' mokoondo' ruo sangau, ondo' nakito muno tatandu' ru pamarintaan Midia am Pirsia.

²¹ Kambing gawayan no tatandu' ru pamarintaan Junani, am sangau ondo' minujak nangkilolot ra ruo mato nano tatandu' ru raja' ondo' kasaa'.

²² Apat sangau ondo' minujak nalupus sangau ondo' kasaa' no napandak, arati' no pamarintaan ru Junani matayar ra apat pamarintaan ondo' kalo maikang koson ra pamarintaan ondo' kasaa' no.

²³ Paat ra karatuan ru kaapat-apat pamarintaan no mamaar noyo saboi musiti' ukumin, am kalaatan ra giu' no liminanja', sumalula' boo sangulun raja' ondo' bambalingatan, malaat am mamparuung.

²⁴ Masauk io ra maikang kaga', kaa' sala' ka sabap no ra kuasa' nano galama'. Mangkinibit io ra kapusaan ondo' makalalaa', am makasugut ralalom ru pirot baalon nano. Mamuso io ra ulun ondo' maikang kaga', am ulun ri Aki Kapuuno' niayuk.

²⁵ Sabap ra ruung nano, makasugut io ralalom ru pamparuungan nano. Lumimbau io ra inan nano, am mamuso ra masuang ulun ra kalo mangani' ra pampakaraan. Io no poyo ondo' baani manggal ra Raja' Ondo' Maayo Kaga'. Kaa' pusoon io ra sala' ka ra kuasa' ru ulun.

²⁶ Pinaintalang intor ra taak simbalui ra susuab ti am taak simbalui ra mamai' ti ondo' pinakito rirun no niayuk masauk. Kaa' pai' raguo' ginio ra osoi ayuk, sabap ra lakat poyo mabuoi ra kalo poyo masauk baal raginilo.”

²⁷ Malawo aku am narualan buoi kukula' ngoorou. Kopongo raginio sukal aku am saguli' nambaal ra kandoi ondo' pinataak ru raja'. Magalabo aku mangkara' ra pinaintalang no am kalo makarati' raginio.