DANIL 7 - Tanou Moonsoi Timugon

NANTUNUNG I DANIL RA PINAINTALANG-PINAINTALANG RISO ( 7:1—12:13 ) Pinaintalang ri Danil intor ra apat ngainan bibiag

¹ Paat ra sarandaman, ra bilor kasaa' ra pamarintaan ru Raja' Bilsyajar koson ra raja' ru Babilonia, naginupi aku am nakaalap rondo' pinaintalang. Tinulisan ku inupi no am gitio noyo

² ondo' nakito ku paat ra rondom raginio: Nagangin ra mapuor intor ra ngaangai' intok am nampalamba' ra ralimbou ru raat.

³ Pulusat ru apat ngainan bibiag raksasa intor ra raat. Moonong rondo' ra bibiag no nansasala' baal no.

⁴ Kasaa' no baal nano koson ra singa', kaa' mokoondo' ra kawo koson ra kawo ru susuit kanui. Tatanga' aku magilong, kawo nano nautus intor riso. Bibiag no nakayang intor ra tana', am pinabigor ra kalayam nano koson ra ulun, am inanian ra utok ru ulun.

⁵ Bibiag karuo no baal nano koson ra baawang am minigor ra rasawat ru kalayam ra bakulung nano. Bibiag no tatanga' mongokot ra talu bungul ru tiagang. Korongog boo bolos ondo' mindagu, “Akan no ra kual maya' ra suang ru kasagaan muno!”

⁶ Tatanga' aku magilong, sanginan poyo bibiag siminalula'. Baal nano koson ra ampunguon, kaa' bakulung nano mokoondo' apat kawo koson ra kawo ru susuit. Bibiag no mokoondo' apat ulu, am ilain makakuasa'.

⁷ Tatanga' aku magilong, bibiag kaapat poyo siminalula'. Bibiag no maikang kaga', masangit am makalalaa'. Ripon basi' nano ondo' maayo, bibiag no manutuk ra ondo' akanon nano, am kikinjangin no. Nansuai ra bibiag-bibiag ra kalo poyo ginio, bibiag no mokoondo' mopor sangau.

⁸ Liliwa' ra aku magilong ra sangau-sangau no, nakito ku poyo rondo' sangau ondo' boborok siminalula' ra gino ngai' no. Sangau no nanginggi' ra talu sangau ondo' soroi ra giu' no. Sangau boborok no mokoondo' ra mato koson ra mato ru ulun, am kabang ondo' mindagu ra lumimbau.

Pinaintalang intor ru Io ondo' maayag ra mantilayun

⁹ Liliwa' ra aku magilong, kukula' kurisi' ru raja' pinaatang. Io ondo' maayag ra mantilayun nanturung giu' ra rasawat ru rondo' intor ra kurisi' ru raja' no. Bayang Nano mapulak koson ra salji, am abuk Nano mapulak koson bulu domba. Kurisi' ru raja' Nano mokoondo' ra luda' ondo' bibilak apui no,

¹⁰ am apui tumilis intor ra kurisi' ru raja' Nano. Riribu ulun soroi ra giu' no koson mangandoi ayuk Riso, am jujuta' ulun minigor ra saang Nano. Kopongo raginio makama ru pangakiman manalimpuun ra pamisaraan, am kitab-kitab inukab.

¹¹ Liliwa' ra aku magilong, lakat aku poyo mokorongog ra bolos ru sangau boborok no mindagu ra lumimbau. Tatanga' ra aku magilong, bibiag kaapat no pinatoi, am baangkai nano pinatiran ra ralalom ru apui saboi napuso.

¹² Bibiag-bibiag ra bokon, binutus kuasa' no kaa' iniou maayag saboi ra orou ondo' inaru'.

¹³ Ralalom ru pinaintalang raki' paat rondom raginio, nakito ku rondo' koson ra ulun. Minatong io linibungan ru gaun, am mininggaar Riso ondo' maayag ra mantilayun, am pinauma' Riso.

¹⁴ Inanian io ra urumat am kuasa' koson ra raja', saboi ulun-ulun intor ra ngaangai' bansa', bansa' boborok am ragu mangandoi ayuk riso. Kuasa' nano mantilayun, am pamarintaan nano kolondo' pupus.

Arati' ru pinaintalang no

¹⁵ Pinaintalang no makalalaa' raki' am magalabo aku kaga'.

¹⁶ Inggaar aku ra sangulun intor ra ondo' minigor ra giu' no am nakiarati' riso ra pinaintalang no. Io pana nambala' ra arati' nano.

¹⁷ Kon ru ulun no, “Apat bibiag ondo' maayo no iono apat pamarintaan ondo' sumalula' ra tana' ti.

¹⁸ Kaa' ulun ri Aki Kapuuno' Ondo' Masawat Kaga' mangapu ra kuasa' koson mamarinta ra sabubuoi no.”

¹⁹ Aku pana masaga' boo makapandai intor ra bibiag ondo' kaapat no, ondo' kalo nogondo' ra bokon-bokon no; bibiag ondo' makalalaa' am manutuk ra ondo' akanon nano ra salindu tambaga' am ripon basi' nano, am kikinjangin no ondo' akanon nano.

²⁰ Masaga' aku makapandai intor ra mopor sangau ra ulu nano, am intor ra sangau boborok ondo' minujak ra pupus, ondo' nangkinibit ra nabubul talu sangau ra bokon. Sangau boborok no mokoondo' ra mato am kabang ondo' mindagu ra lumimbau. Sangau boborok no makalalaa' poyo intor ra sangau-sangau ra bokon.

²¹ Tatanga' ra aku magilong, sangau boborok no nampapatoi ra ulun ri Aki Kapuuno' am nangala risilo.

²² Ratong boo Io ondo' maayag ra sabuoi-buoi no am nangani' ra pamatasan ondo' manaung ra ulun ri Aki Kapuuno' Ondo' Masawat Kaga'. Nasaboi noyo orou ra ulun ri Aki Kapuuno' mangapu ra kuasa' koson mamarinta.

²³ Gitio noyo arati' ondo' pinataak raki': “Bibiag kaapat no iono pamarintaan kaapat ondo' sumalula' ra tana' ti am nansala' ra pamarintaan ra bokon. Pamarintaan no manutuk ra titikop ru tana' am niayuk kikinjangin no.

²⁴ Mopor sangau no iono mopor ngaulun raja' ondo' mamarinta ra pamarintaan no. Kopongo raginio sangulun raja' ra bokon sumalula'. Io nansuai toojo ra raja'-raja' ondo' nakasigulu, am mampaala ra talu ngaulun raja'.

²⁵ Manggal io ri Aki Kapuuno' Ondo' Masawat Kaga' am mangimbolo' ra ulun ri Aki Kapuuno'. Mangkinam io mangulau ra ukum am pangiantakan ru ugama nilo am ulun ri Aki Kapuuno' kuasaan no buoi talu ngambilor am maintanga'.

²⁶ Makama pangakiman ru suruga' pana mansusunur am mampagaau boo ra kuasa' nano, am niayuk mamuso raginio saboi malingon kapuso.

²⁷ Kuasa' am kinaayo ru ngaangai' pamarintaan ra tana' ti pataakin ra ulun ri Aki Kapuuno' Ondo' Masawat Kaga'. Kuasa' nilo koson mamarinta kolondo' pupus, am ngaangai' panguasa' ra tana' ti mangandoi ayuk risilo am niayuk gumagaya' risilo.”

²⁸ Ginio noyo tunung ru inupi no. Malaa' aku kaga' saboi bulos kuno mabula' am binulian ku ngaangai' baal raginio ralalom ru guang kuno.