DANIL 6 - Tanou Moonsoi Timugon

Pinasubol i Danil ra ralalom luang batu ru singa'

¹ Kopongo Raja' Bilsyajar pinatoi, Raja' Darius ulun ru Midia, ondo' bulintok raginio umur no onom ngoopor am ruo ngambilor, nampagaau ra kurisi' pamarintaan ru Babilonia.

² Tinayar ru Raja' Darius pamarintaan no ra maatus am ruo ngoopor wilayah, ondo' moonong raginio pinarinta ru sangulun gabenor.

³ Suai raginio, pinili' no i Danil am ruo ngaulun ra bokon koson magalung ra gabenor-gabenor no am niayuk magalung ra kaatangan ru raja'.

⁴ Makito boo ra kandoi ri Danil moonsoi poyo intor ra ulun magalung kapoam gabenor ra bokon no. Sabap ra maturasik kaga' i Danil, moogot raja' mampasauk riso ra panguasa' ru titikop pamarintaan.

⁵ Baal raginio nangkinibit ra ulun-ulun magalung am gabenor ra bokon mirot koson maguyum ra kasalaan ri Danil ralalom ru kandoi pamarintaan no, kaa' kalo nakasugut ilo sabap ri Danil gumagaya', mabanis guang am kalo makalilian.

⁶ Ilo pana mindagu boo, “Itakau kalo lair maguyum ra kasalaan ri Danil, ondo' ak am ralalom ru baal ondo' makakulawit ra ugama nano.”

⁷ Ginio ra uma' ilo ra raja' am indagu, “Kaayag kono ra sabuoi-buoi no, Raja' Darius!

⁸ Akai ngaangai' ti mambaal ra kandoi tadbir ru pamarintaan muno – ulun-ulun magalung, gabenor, pagawai masawat, ulun magalung ra libung am pagawai ra bokon – nangiou noyo maa' raginio ingkualon mu rondo' susuban ondo' musiti' gagayaan toojo. Musiti' kou manusub maa' raginio buoi talu ngoopor ngoorou kolondo' sangulun pana makitaak ra atan ayuk intor ra dewa kapoam ulun ondo' ak am intor rirun galama'. Osoi ayuk manggal ra susuban no musiti' patirin ra ralalom ru luang batu ru singa'.

⁹ Ginio ra polosoon okou mapaingkual ra susuban no am niayuk sumain raginio. Polosoon susuban no masauk ra undang-undang ru Midia am Pirsia ondo' kalo boo kulawon.”

¹⁰ Koon raginio noyo Raja' Darius siminain ra susuban no.

¹¹ Pakapandai i Danil ra susuban no sinainan noyo, minuli' io ra baloi. Giu' ra lamin ra tampas rasawat ru baloi nano mokoondo' kukula' gigimpalan ondo' tumingkuang ra Jirusalim. Koson ra kaindalaman no, igulatur i Danil giu' ra tuma' ru gigimpalan ra naukab no, am pakiasi' ri Aki Kapuuno' intalu songorou.

¹² Paat ra pantula'-pantula' ri Danil nakakito riso nakiasi' ri Aki Kapuuno',

¹³ ilo ngaangai' minuma' ra raja' koson mambala' intor ri Danil. Konilo, “Okou raja' siminain noyo ra rondo' susuban ondo' manginggalar ra osoi ayuk buoi talu ngoopor ngoorou ra raiti' koson makitaak ra atan ayuk intor ra dewa am ulun, ondo' ak am intor rirun galama'. Osoi ayuk manggal ra susuban no patirin ra ralalom ru luang batu ru singa'.” Indagu raja', “Motopot. Susuban no nasauk ra undang-undang ru Midia am Pirsia ondo' kalo boo kulawon.”

¹⁴ Konilo boo ra raja', “I Danil, sangulun intor ra ulun pinatiran intor ra Jiuda, kalo mangurumat rirun am kalo gumagaya' ra susuban muno. Nagulayun io nakiasi' intalu songorou.”

¹⁵ Pokorongog ra baal raginio, mangiluk raja' am mirot toojo koson mamayag ri Danil. Narayus raja' minirot saboi mamai'.

¹⁶ Ulun naguguum no pana siminaguli' boo am indagu ra raja', “Nakapandai kou ra sumugut ra undang-undang ru Midia am Pirsia, susuban ondo' iningkual ru raja' kalo boo kulawon.”

¹⁷ Raja' pana nanusub maa' raginio i Danil rokopon am patirin ra ralalom ru luang batu ru singa'. Indagu raja' ri Danil, “Gama' ru i Aki Kapuuno' ondo' sambaan muno toojo no mamayag rirun.”

¹⁸ Kabang ru luang batu pana tinauban boo ra rondo' batu maayo, am sinaapan ru raja' batu no ra meterai nano galama' am meterai ru ulun-ulun mangaatang nano, maa' raginio kolondo' sangulun pana makapamayag ri Danil.

¹⁹ Kopongo raginio saguli' raja' ra istana, kaa' rondom raginio kalo nokororot io. Kalo nangakan io am kalo masaga' simoyoon.

²⁰ Paat ra maar matawang, sukal raja' am agou-agou minongoi ra luang batu ru singa' no.

²¹ Pakasaboi io ra giu' no, pampiau io ra magalabo guang, “Danil, ulipon ri Aki Kapuuno' ondo' naayag! I Aki Kapuuno' ondo' gagayaan muno toojo namayag kia rirun intor ra singa'-singa' no?”

²² Taam i Danil, “Kaayag kono raja' ra sabuoi-buoi no!

²³ Nangator i Aki Kapuuno' ra malaikat Nano koson mangimut ra kabang ru singa'-singa' no saboi kalo nampajamar raki'. Binaal No koson raginio sabap ra nakapandai Io kolondo' sala kuno, ra Io kapoam ra okou.”

²⁴ Mapara' boo bansuk ru raja'! Nanusub raja' maa' raginio paingkualon i Danil intor ra luang batu no. I Danil pana pinaingkual, am kalo najamaran io ra sanganu pana, sabap ra mangintopot io ri Aki Kapuuno'.

²⁵ Kopongo raginio nanusub raja' maa' raginio ngaangai' ulun ondo' nanguu' ri Danil, patirin ra ralalom ru luang batu ru singa' no pabayaan ra anak andu' nilo. Kalo poyo naratu' ilo intor ra lonor ru luang batu no, singa'-singa' no nansaam noyo risilo am namandak-mandak ra bungul nilo.

²⁶ Kopongo raginio nanulis Raja' Darius ra surat posoboyon ra ulun intor ra ngaangai' bansa', bansa' boborok am ragu ra tana' ti: “Kaansayan!

²⁷ Manusub aku maa' raginio ngaangai' ulun ra titikop ru pamarintaan kuno mangurumat am malaa' ri Aki Kapuuno' ondo' sambaan ri Danil. Io noyo i Aki Kapuuno' ondo' naayag, Io mamarinta ra sabuoi-buoi no. Pamarintaan Nano totopot kalo mapuso, am kuasa' Nano kolondo' pupus.

²⁸ Io mangindangan am mamayag; mambaal ra kaimuagan-kaimuagan, ra tana' ti am poyo giu' ra suruga'. Io namayag ri Danil intor ra sinaam ru singa'.”

²⁹ Koson raginio noyo i Danil nagulayun ra intok masawat bulintok ra pamarintaan ru Raja' Darius am Raja' Koris, ulun ru Pirsia no.