DANIL 5 - Tanou Moonsoi Timugon

Raja' Bilsyajar, anak ungkuyon ri Nibukadnijar nambaal ra bunsag

¹ Paat ra sangarawan, nampiau Raja' Bilsyajar ra saribu ngaulun ulun mangaatang nano mongoi ra bunsag ondo' maayo am nagiginum ilo wain.

² Paat ra nagauk noyo, nanusub Raja' Bilsyajar koson mangalap ra mangkuk-mangkuk ondo' binaal intor ra mas am pirok ondo' ginaau ru ama' nano, Raja' Nibukadnijar intor ra Baloi ru Tuhan giu' ra Jirusalim. Kinitaak ru Raja' Bilsyajar mangkuk-mangkuk no maa' raginio io, ulun-ulun mangaatang nano, am niayuk ngaangai' andu' am ruandu' parulug ru raja' makainum intor ra mangkuk-mangkuk no.

³ Pulali' ru mangkuk-mangkuk no inibit siminubol, am ilo ngaangai' nanginum ra wain intor ra mangkuk-mangkuk no.

⁴ Liliwa' nanginum, nongompor ilo ra dewa-dewa ondo' binaal intor ra mas, pirok, gangsa', basi', tataun am batu.

⁵ Pulali' nakito kalindu' ru ulun, am kalindu' no tumalimpuun manulis ra timbok ru istana, giu' ra tampilon ondo' matawang kaga' natiu' ra sinda ru lampung. Nakito ru Raja' Bilsyajar kalindu' ondo' tatanga' manulis no.

⁶ Malaa' kaga' raja' saboi mabula' bulos nano am monontol atur nano.

⁷ Golok raja' nampiau ra ulun mapandai kaga' ra sihir, ulun makakapandayan, am ulun mapandai kaga' ra nujum. Paat ra ilo muma', indagu raja' risilo, “Osoi ayuk makabasa' ra tulisan no am niayuk mambala' ra arati' no aniin ra bayang ru raja', iono sukub matanggilung am sisigot mas tatandu' maayo. Ulun no pasaukon ra panguasa' katalu ralalom ru pamarintaan ti.”

⁸ Ulun maminson ra raja' jiminalai, kaa' kolondo' sangulun pana makabasa' ra tulisan no kapoam mambala' ra arati' nano.

⁹ Sabap ra nalaa', bulos ru Raja' Bilsyajar mabula' poyo, am ulun-ulun mangaatang nano kalo makapandai atan musiti' baalon.

¹⁰ Ina' ru raja' nokorongog ra bolos nginonsol ru raja' am ulun piniau nano. Subol io ra intok ru bunsag no am indagu, “Kaayag kono raja' ra sabuoi-buoi no! Pai' kalaa' saboi mabula' kou.

¹¹ Mokoondo' sangulun ralalom ru pamarintaan muti ondo' nokoowot ra kuasa' intor ra ambiluo ru dewa-dewa ondo' mapasau. Paat ra pamarintaan ru ama' muno, ulun no nampainono' ra kaligagan, kapandayan am kapintaran koson ra kapintaran ru dewa-dewa. Ama' muno, Raja' Nibukadnijar, nampasauk riso ra tingganai ru ngaangai' ulun mangilong, ulun mapandai kaga' ra sihir, ulun makakapandayan am ulun mapandai kaga' ra nujum.

¹² Mokoondo' io ra kapintaran intor ra bokon. Mapintar io am mapandai mambala' ra arati' ru inupi, tumaam ra sunggait, am niayuk mambala' ra ondo' noopot. Inggalan ru ulun no i Danil, kaa' raja' nanginggalan riso i Biltsajar. Piawo' io. Mambala' io ra arati' ru tulisan no rirun.”

Nambala' i Danil ra arati' ru tulisan no

¹³ Nataki' i Danil inibit muma' ra raja'. Pangkuot raja' riso, “Okou kia i Danil, ulun ru Jaudi ra pinatiran ondo' inibit intor ra Jiuda minongoi ragiti ru raja', ama' kuno?

¹⁴ Nokorongog aku ra nokoowot kou ra kuasa' intor ra ambiluo ru dewa-dewa ondo' mapasau, am mokoondo' kou ra kapandayan, mapandai am niayuk mapintar.

¹⁵ Ulun maminson ra raja' am ulun mapandai kaga' ra sihir sinusub noyo mambasa' am mambala' ra arati' ru tulisan no kaa' kalo maalap nilo.

¹⁶ Nokorongog aku ra okou makapambala' ra arati' ru ondo' noopot-noopot ondo' malandom am nakasibuni. Amon ru maalap mu kabasa' am pakabala' arati' ru tulisan no, aniin kou ra bayang ru raja', iono sukub matanggilung am sisigot mas tatandu' maayo, am pasaukon kou ra panguasa' katalu ralalom ru pamarintaan ti.”

¹⁷ Taam i Danil, “Kitaakon tokou mambuli ra tangguang muno ra tayar muno galama', kapoam pataakin ra ulun bokon. Basaan ku am mambala' ra arati' ru tulisan no rirun.

¹⁸ “I Aki Kapuuno' Ondo' Masawat Kaga' nampasauk ra ama' muno, Raja' Nibukadnijar ra raja' ondo' maayo, am niayuk nangani' riso ra urumat am katulayan.

¹⁹ Nasauk io ra maayo kaga' saboi ulun intor ra ngaangai' bansa', bansa' boborok am ragu malaa' am monontol riso. Mamatoi io kapoam mompoloso ra sasangulun maayag sumugut ra kasagaan nano. Painsawaton kapoam paingganaan no osoi ayuk sumugut ra kasagaan nano.

²⁰ Kaa' sabap ra nasauk io ra malilimbau, bambalingatan am malaat, pinatuun io intor ra kurisi' nanturungan am natatakan ra katulayan nano.

²¹ Pinagiru' io intor ra ulun manampagun, am utok nano nasauk koson ra utok ru bibiag. Minayan io simpung ra kaladai, nangakan ra sakot koson ra sapi', am nombolong ra tana' malimparang saboi inan nano naasa' ru bolobou. Pupus no nangiou io ra i Aki Kapuuno' Ondo' Masawat Kaga' mokoondo' ra kuasa' ra ngaangai' pamarintaan ru ulun, am mangani' Io ra pamarintaan no ra osoi ayuk kasagaan Nano.

²² “Kaa' okou galama', anak ungkuyon nano, kalo minggana' inan, kabalu' pana makapandai kou ra ngaangai' baal raginio.

²³ Minanggal kou ra Tuhan panguasa' giu' ra suruga'. Pinakai mu mangkuk-mangkuk ondo' inalap intor ra Baloi ru Tuhan. Okou raja', ulun mangaatang muno, ngaangai' andu' am ruandu' parulug muno nanginum noyo ra wain intor ra mangkuk-mangkuk no, am niayuk nongompor ra dewa-dewa ondo' binaal intor ra mas, pirok, gangsa', basi', tataun am batu – dewa-dewa ondo' kalo makakito, kapoam mokorongog, kapoam makapandai ra atan-atan. Kalo nangurumat kou ri Aki Kapuuno' ondo' makakuasa' mangaru' ra okou no maayag kapoam matoi, am ondo' nanguasa' ra ngaangai' binaal muno.

²⁴ Ginio sabap ri Aki Kapuuno' nanusub ra kalindu' no nanulis ra tulisan ragitio.

²⁵ “Tulisan no iono ‘Untobon, untobon, timbangon am tayaron.’

²⁶ Untobon arati' no i Aki Kapuuno' nanguntob noyo ra orou ru pamarintaan muno, am pinupusan.

²⁷ Timbangon arati' no tinimbang kou noyo am napandayan ra mamaan kaga'.

²⁸ Tayaron arati' no pamarintaan muno matatayar am pataakin ra ulun ru Midia am Pirsia.”

²⁹ Paat raginio niayuk Raja' Bilsyajar nanusub ra ulipon-ulipon nano nampabayang ra bayang ru raja', iono sukub matanggilung ri Danil, am sisigot mas tatandu' maayo pinasisigot ra liog nano. Pinasauk io ru raja' ra panguasa' katalu ralalom ru pamarintaan no.

³⁰ Paat rondom raginio niayuk Raja' Bilsyajar, raja' ru Babilonia pinatoi.