DANIL 11 - Tanou Moonsoi Timugon

¹ Io noyo ondo' pinalansan koson mangindangan am manaung raki'.

² Ngaangai' ondo' raguon kuti motopot.” Kon ru malaikat no, “Talu ngaulun raja' poyo mamarinta ra Pirsia, sumunu' raja' kaapat ondo' langkaya' poyo intor ra ngaangai' no. Paat ra rasawat ru kuasa' am kalangkayaan nano, manggal io ra pamarintaan ru Junani.

Pamarintaan ru Misir am Siria

³ “Sangulun raja' ondo' maikang sumalula'. Mamarinta io ra rondo' pamarintaan ondo' maayo am mambaal ra kasagaan ru guang nano.

⁴ Kaa' paat ra rasawat ru kuasa' nano, pamarintaan nano maabak am matayar masauk apat. Raja'-raja' ondo' sala' ka papag nano malit riso koson ra raja', kaa' kalo maikang ilo koson riso.

⁵ “Raja' ru Misir masauk ra maikang. Kaa' sangulun intor ra panglima nano masauk ra maikang poyo, am mamarinta ra pamarintaan ondo' maayo poyo.

⁶ Kopongo ra kukula' ngambilor, raja' ru Misir mambaal ra nabantuan koson maguum ra raja' ru Siria, am paganduon anak ruandu' nano ra raja' no. Kaa' nabantuan koson maguum no kalo mantilayun. Anak ruandu' no, ralaki nano, anak nano, am ulipon-ulipon ondo' minaya' riso potoyon ngaangai'.

⁷ Kalo mabuoi raginio, sangulun intor ra sasambaloi nano masauk ra raja'. Mamulunsar io ra saujor ru raja' ru Siria, sumubol ra ralalom ru kubu nano am mangala risilo.

⁸ Paat raginio muli' io ra Misir, ibiton no sinungkalalaing-sinungkalalaing ru dewa nilo, am niayuk kuliamos-kuliamos mas am pirok ondo' patimpokon koson ra dewa-dewa no. Buoi kukula' ngambilor kalo mamulunsar io ra Siria.

⁹ Raja' ru Siria pana mamulunsar boo ra pagun ru Misir, kaa' raja' no kalaan paluguton am rumuli' ra pagun nano galama'.

¹⁰ “Anak-anak ungkuyon ru raja' ru Siria tumampos koson mamulunsar am manirong ra pulalai ru saujor ondo' maayo. Sangulun intor risilo mampajunjung koson ra liur am mamulunsar ra pangampinan ru pantula'.

¹¹ Raja' ru Misir sumangit kaga', am mamulunsar ra raja' ru Siria am mangala ra pulalai ru saujor nano ondo' maayo no.

¹² Raja' ru Misir lumimbau sabap ra kamanangan nano, am sabap ra masuang saujor ondo' pinatoi nano, kaa' kalo marayus io mamanang.

¹³ “Raja' ru Siria muli' am manirong ra pulalai ru saujor ondo' maayo poyo intor ra kasaa'. Masaboi paat no, sumaguli' io mabaya' ra pulalai ondo' maayo am ondo' naukop ra kinandoi.

¹⁴ Masuang ulun gumuor boo ra raja' ru Misir. Mulu' poyo ra kukula' ngaulun malaat intor ra bansa' muno pana gumuor, okou Danil, sabap ra pinaintalang ondo' nakito nilo, kaa' kalaan ilo.

¹⁵ Raja' ru Siria pana nagawang ra rondo' bandar ondo' mokoondo' ra kubu am kalaan no. Saujor ru Misir kalo boo mamulunsar, am poyo saujor no ondo' maikang kaga' makayaan ra ikang.

¹⁶ Pamakuan ru panguasa' ru Siria risilo maya' ra kasagaan ru guang ra kolondo' manggal. Mayan io ra tana' ondo' moonsoi am manguasa' ra ngaangai' no.

¹⁷ “Raja' ru Siria manusub ra ngaangai' pulalai ru saujor nano koson mamulunsar ra pantula'. Koson manguasa' ra pamarintaan ru pantula' nano, raja' no mambaal ra pangiawan ra pantula' nano am paganduon anak ruandu' nano ra pantula', kaa' inatangan raginio kalo masugut.

¹⁸ Mopongo raginio raja' ru Siria mamulunsar ra bansa'-bansa' ondo' minayan giu' ra igig ru raat, manguasa' ra masuang bansa'. Kaa' sangulun tingganai ru bansa' ra bokon mangala ra raja' ru Siria am mopolonggo' ra pagasaban ondo' binaal nano, am mambalos ra pagasaban no riso.

¹⁹ Raja' ru Siria muli' ra kubu-kubu ru pagun nano galama' kaa' kalaan io, am ginio noyo pupus nano.

²⁰ “Palitin io ru sangulun raja' ra bokon. Manusub raja' no ra sangulun pagawai koson mampajajal ra mamagun mambayar ra cukai ra kuayan mamparuang ra kalangkayaan ru pamarintaan nano. Sangkinolor ayuk paat ru raja' no potoyon, kaa' sala' ka makito ru ulun am sala' ka ralalom ru pampatayan.”

Raja' ru Siria ondo' malaat

²¹ Rayuso' ru malaikat no nambala', “Raja' ru Siria ondo' sumunu' no iono ulun ondo' malaat. Kalo maaya' masauk ra raja', kaa' matong io ra mamulali' am mampagaau ra kuasa' ra namparuung.

²² Saujor ondo' manggal riso, am poyo Tingganai Maayo Imam pana pusoon am luuson.

²³ Siminain ra masuang nabantuan, mamparuung io ra bansa'-bansa' am gumaai maikang, kabalu' pana mamarinta io ra rondo' pamarintaan ondo' boborok.

²⁴ Mamulunsar io ra rondo' wilayah ondo' langkaya' am malabung ra kalo mangani' ra pampakaraan am mambaal ra baal-baal ondo' kalo igondo' binaal ru kinamatuaan nano. Ra maamaya'-maamaya' nano boo tayarin no ra kuliamos ginaau am kalangkayaan ondo' noowot no ralalom ru pangayawan. Nambaal io ra inatangan koson mamulunsar ra bandar-bandar ondo' mokoondo' ra kubu, kaa' mataki' maampus jam no.

²⁵ “Baani io manirong ra pulalai ru saujor ondo' maayo koson mamulunsar ra raja' ru Misir, ondo' nakatampos tumula' ra pulalai ru pantulaan nano ondo' maayo am maikang. Kaa' raja' ru Misir maruung am kalo makasugut.

²⁶ Ulun-ulun maminson ra raja' ru Misir ondo' mamaar kaga' riso mamparatu' riso. Masuang saujor nano potoyon am saujor nano pusoon.

²⁷ Ruo ngaulun raja' no pana manturung boo am mabaya' mangakan ra rondo' mija', kaa' guangon nilo malaat. Mamparuung ilo ra rondo' am bokon, kaa' kalo makasugut ilo sabap ra kalo poyo nasaboi jam nilo.

²⁸ Raja' ru Siria muli' mabaya' ra ngaangai' kuliamos tinakou nano. Namatas io koson mamuso ra ugama ru ulun ri Aki Kapuuno'. Mambaal io maya' ra kasagaan ru guang nano, am muli' ra pagun nano.

²⁹ “Kalo mabuoi raginio, raja' ru Siria mamulunsar poyo ra Misir, kaa' ragino ti kinibit nano suai intor ra ondo' kasaa'.

³⁰ Ulun ru Roma matong ra kapal-kapal ru raat am mamulunsar ra raja' ru Siria, am raja' pana malaa'. Raja' ru Siria pana muli' ra sumangit kaga', am mirot manutuk ra ugama ru ulun ri Aki Kapuuno'. Raja' ru Siria maya' ra bilin ru ulun ondo' nangiruan noyo ra ugama no.

³¹ Kukula' ngaulun saujor ru raja' mampajamol ra Baloi ru Tuhan. Langgain nilo taak simbalui orou-orou, am manirong ra ‘Karaat Ondo' Moporos’ no.

³² Mamparuung raja' am makasugut mangambi' ra guang ru ulun ondo' nangiruan ra ugama no, kaa' ulun maamaya' ri Aki Kapuuno' manggal riso.

³³ Tingganai ru mamagun ondo' mapintar mangindangan ra masuang ulun mokoowot ra pangaratian, kaa' koson kukula' buoi raino ti kukula' ngaulun risilo matoi giu' ra intok pampatayan kapoam solobon saboi matoi. Mokoondo' poyo takawin am saukon ra ulun rinakop.

³⁴ Paat ra masauk pamatayan no, ulun ri Aki Kapuuno' mokoowot sanganu indangan, kabalu' pana ulun ondo' maya' risilo no mangkara' ayuk ra kaatangan galama'.

³⁵ Kukula' ngaulun tingganai ondo' mangapintar no potoyon, kaa' kinibit no ulun raginilo masauk ra mapasau. Baal raginio masauk saboi kaampusan ru jam ondo' inaru' ri Aki Kapuuno'.

³⁶ “Raja' ru Siria mambaal maya' ra kasagaan ru guang. Nabaya' ra kalimbawan, karaan ru raja' ra maayo io poyo intor ra dewa ru ati pana, am poyo makakuasa' poyo intor ri Aki Kapuuno' Ondo' Masawat Kaga'. Nambaal raja' no raginio saboi ra paat ri Aki Kapuuno' mangukum riso. Baalon ri Aki Kapuuno' totopot koson ra inatangan Nano.

³⁷ Raja' kalo mampalio ra dewa ondo' sambaan ru kinamatuaan nano, am niayuk dewa ondo' sambaan ru ruandu'-ruandu'. Sotopot no raja' no kalo mampalio ra ngaangai' dewa sabap ra pangkaraan nano io maayo poyo intor ra ngaangai' no.

³⁸ Kaa' sumamba raja' no ra dewa ondo' manindung ra kubu-kubu. Nampataak raja' no ra mas, pirok, intan am taak-taak ra bokon ondo' mologo ra dewa ondo' kalo igondo' sinamba ru kinamatuaan nano.

³⁹ Mamakai raja' no ra ulun ondo' sumamba ra sinungkalalaing ru bansa' ra bokon koson mamiot ra kubu-kubu nano. Aniin ru raja' ra pangkat maayo ra ulun ondo' mangapu riso koson ra panguasa'. Mangani' raja' no risilo ra intok ondo' masawat am tana' koson ra tangguang.

⁴⁰ “Paat ra maar noyo masaboi pupus ru kakuasaan raja' ru Siria, raja' ru Misir mamulunsar riso. Kaa' raja' ru Siria mambalos ra pamulunsaran no ra ngaangai' ru ikang nano. Raja' ru Siria mamakai ra kurita' kuda, kuda am masuang kapal ru timug. Koson ra rosob, raja' ru Siria mamulunsar ra masuang pagun,

⁴¹ am poyo mamulunsar ra tana' ondo' moonsoi am mamatoi ra kaaparan ribu ulun; kaa' pagun ru Idom, Moab am ulun ondo' lakat poyo soroi giu' ra Amon bayagon.

⁴² Paat ra raja' ru Siria mamulunsar ra ngaangai' pagun no, Misir pana kalo makapagiru'.

⁴³ Ibiton saguli' ru raja' ru Siria ngaangai' rapu' ru Misir, nakaaya' mas am pirok. Kalaan ru raja' ru Siria no Libia am Itiopia.

⁴⁴ Tanou intor ra sirangon am ralayo pana mambaal boo ra raja' ru Siria magalabo, mamulunsar io ra masaran am niayuk mamatoi ra masuang ulun.

⁴⁵ Raja' ru Siria mambaal ra kim ru raja' ondo' maayo giu' ra lolot ru raat am gunung intok ru Baloi ru Tuhan. Kaa' raja' ru Siria matoi, am kolondo' sangulun pana mangindangan riso.”