AYUP 6 - Tanou Moonsoi Timugon

Ayup

¹ Kopongo raginio taam i Ayup,

² “Amon ru kapaganan am kangilukan kuno timbangon bagat nano,

³ maaru' maagat poyo intor ra agis ru raat. Ragu kuno ondo' loyowon kalo musiti' no mampaliang ramuyun.

⁴ I Aki Kapuuno' Ondo' Maayo Kaga' Kuasa' namanah raki', am tuwo nano siminabak ra ngaangai' ru inan kutu. Namulunsar i Aki Kapuuno' raki' koson ra pulalai ru pantula', aku pana malaa' kaga'.

⁵ Kaladai majala' paat mangakan ra sakot mamulok, am sapi' pana mongkoror paat aniin ra akanon nano.

⁶ Kaa' akanon ondo' mapalo kolondo' usi', osoi masaga'? Malimanan kia ru rila' talu' mapulak?

⁷ Kalo matiakan aku, am ngaangai' akanon makasawat ra liog.

⁸ Kua kia ri Aki Kapuuno' kalo nangiou ra kitaakon kuno? Kua kalo tinaam No ra pakiasian kuno?

⁹ Amon mangiou i Aki Kapuuno' mangumok raki', amon mimbuor Io am mamatoi raki',

¹⁰ tumindak aku maansukan, kabalu' pana marualan aku kaga'. Nakapandai aku ra matulai i Aki Kapuuno'; kalo igondo' aku anggal ra susuban Nano.

¹¹ Atan kaikangan kuno koson rumayus maayag? Kua rumayus maayag amon ru kolondo' kalansanan kuno?

¹² Maikang kia inan kuno koson ra batu? Intor kia ra gangsa' inan kuno?

¹³ Kolondo' boo ikang kuno koson mamayag ra inan kuno; kolondo' boo pangindangan raki'.

¹⁴ Paat ra kapaganan koson ragitio, mompogogot aku ra rangan ondo' motopot, tawa ru lakat aku poyo gumagaya' ri Aki Kapuuno' kapoam nangiruan noyo Riso.

¹⁵ Kaa' akau, rangan ku ngai', kalo maintopot, koson ra sungoi boborok ondo' mapua' paat kolondo' rasam.

¹⁶ Koson kau ra sungoi ondo' mororo' am mokotog, ondo' natauban ru ais am timug mokotog.

¹⁷ Paat masaboi bulintok malasu', ais am timug mokotog lumiot ra kolondo' babaya'; am lonor ru sungoi boborok nasauk mapua' am kolondo' tutuu'.

¹⁸ Kafilah nakalayau paat maguyum ra timug; timinanggau ilo am minatoi giu' ra tana' kaagisan.

¹⁹ Kafilah intor ra Syiba am Tima minatong naguyum ra timug no am malansan riso.

²⁰ Kaa' kalansanan nilo natatak giu' ra kiing ru sungoi boborok ondo' mapua'.

²¹ Koson raki', akau koson ra sungoi boborok no; malaa' kau paat makakito ra kaimbalaan kutu.

²² Nakitaak aku kia ra tangguang intor ramuyun, kapoam nanusub ramuyun mampasuu' ra ulun sabap ra kaatangan kuno?

²³ Nakibayag aku kia intor ra pantula' ondo' kalo makaasi'?

²⁴ Iou noyo, pangila' kano raki' am pakitono' kasalaan kuno. Mongkoror aku mangkirongog ramuyun.

²⁵ Ragu-ragu ondo' mabanis maintopot, kaa' raguon min no kolondo' onong.

²⁶ Indoson min ra umang ayuk raguon kuno; amon koon raginio kua pansawai kau raki' ondo' nangkaus noyo guang?

²⁷ Makatampos kano magugundi' koson mangaru' ra kinuo ru lalaing napatayan ra matuo, am rinuung min rangan toojo min koson lumangkaya'.

²⁸ Tantangi' bulos kuno. Kalo nagabau aku ramuyun.

²⁹ Pai' pambaal ra kalo matimpok, pakaliman no! Pai' pononsol raki', sabap kolondo' sala kuno.

³⁰ Kaa' lakat kau poyo mangkara' ra nagabau aku, am kalo makatanda' ra motopot am sala.”