AYUP 41 - Tanou Moonsoi Timugon

¹ Makarakop kou kia ra Liwiatan ra pamata'? Mabangkos mu kia rila' nano ra kalat?

² Makalatan mu kia jujubak nano, kapoam mampatujok ra pamata' ra bungul ru salura nano?

³ Maaru' lair Liwiatan makilabus kapoam mangambi' rirun, makimasi'?

⁴ Maaru' lair Liwiatan nakimagiou rirun, am nabantu' ra mangandoi rirun ra masalok?

⁵ Maaru' lair binangkil mu Liwiatan koson ra susuit tagamin, ondo' mapabansuk ra guang ru ulipon-ulipon ra ruandu'?

⁶ Maaru' lair ulun mangimpait mantalan riso, kapoam ulun mantatalan nantayar-tayar riso ra gino ngai' ilo?

⁷ Matujok mu kia kungkung nano ra tutura' talu mato, kapoam monobok ra ulu nano ra tanggulan?

⁸ Guut ra Liwiatan kaigondo' ayuk am kalo boo mangkinam kou; kalo malilianan mu pagugulaan raginio!

⁹ Osoi ayuk nakakito ra Liwiatan magiru' ambiluo am malausan.

¹⁰ Masangit Liwiatan paat karaton intor ra bolong nano; kolondo' sangulun pana baani migor ra saang nano.

¹¹ Osoi kia makabulunsar riso ra kalo mapilatan? Kolondo' osoi pana ra tana' ti makakau' mambaal raginio.

¹² Mambala' Aku rirun intor ra kalayam ru maayo ulun no, am intor ra kaikangan nano am babaal ru inan nano ondo' maindon no.

¹³ Kolondo' osoi pana ondo' makarilak ra bayang no ra pinaralimbou no, kapoam makatagu' ra bayang basi' ondo' binayang nano.

¹⁴ Osoi kia makaukab ra jujubak nano ondo' maikang, ondo' mokoondo' ra ripon ondo' makalalaa'?

¹⁵ Bakulung nano koson ra perisai ondo' nalulur, ondo' nonsokot ra narikit am mokotog koson ra batu.

¹⁶ Nagigintun, binangkos ra naigot saboi angin pana kalo makasisip.

¹⁷ Ngaangai' no nonsokot ra mapiot saboi kalo maalap ra lungkab.

¹⁸ Sinda ra kukuliat paat mantarisu' Liwiatan no, am mato nano mapaang koson ra mato ru orou sumirang.

¹⁹ Apui mingkual intor ra kabang nano, am rila' ru apui mansisiab.

²⁰ Lisun kukulampun mingkual intor ra arung nano, koson ra pagangan ondo' palasuon saboi suang nano rumiri'.

²¹ Paminawo nano makapaang ra baa; apui mingkual intor ra kabang nano.

²² Liog nano maikang kaga', saboi ulun makauma' riso no malaa'.

²³ Kolondo' tayar ondo' malawo ra kungkung nano; kungkung nano mokotog am kalo noyo lair mapilang.

²⁴ Guang nano mokotog koson ra batu, kalo makaulig ra malaa', am mokotog koson ra batu gilingan.

²⁵ Paat ra makarat Liwiatan, ulun ra maikang kaga' pana mairu' kinabaani no; lumami' ilo sabap ra malaa' kaga'.

²⁶ Kolondo' ilang ondo' makapilat riso; kolondo' tutura', panah kapoam tanggulan ondo' mamilat riso.

²⁷ Basi' kinara' no koson ra rami, am gangsa' koson ra tataun napasa'.

²⁸ Kolondo' panah ondo' makapampagiru' riso; batu ondo' pinobobol riso, koson ra puputul ru rami.

²⁹ Tataun pamalamba' kinara' no koson ra sakot mapua', am Liwiatan nakakurit paat ulun mopobobol ra tanggulan.

³⁰ Sisi' ra tinai' nano koson ra rarapu' ondo' makalas am malarom, koson ra kuliamos pangagik ondo' manguol ra losok.

³¹ Raat kinuyau no saboi natilu ra timug rumiri', am koson ra umau ondo' makaputa'-puta' giu' ra ralalom ru pagangan.

³² Nampatatang io ra babaya' ondo' makasinda, raat kinulau no nasauk ra puta' ondo' mapulak batik nano.

³³ Giu' ra ralimbou ru tana', kolondo' mokogondo' ra Liwiatan; ginio noyo ondo' maayag ondo' kalo malaa'.

³⁴ Bibiag ondo' malilimbau kaga' pana asabin no; ra gino ngai' ru bibiag masigo, Liwiatan noyo raja'.”