AYUP 4 - Tanou Moonsoi Timugon

SUNUR KASAA' ( 4:1—14:22 ) Ialipas

¹ Indagu boo i Ialipas intor ra bandar Timan,

² “Ayup, sumangit kou kia amon mindagu aku? Kalo boo mokoorot aku ra mongkoror ti.

³ Nangila' kono ra masuang ulun, am nangikang kou ra ulun malawo.

⁴ Ragu-ragu muno ondo' makaantak ra guang, mapabigor ra ulun makasaru, malawo am maagui.

⁵ Raino okou ti boo ondo' mapagon; nakatigog kou am mangkaus guang.

⁶ Sala' ka kia sumambayang kou ri Aki Kapuuno'; sala' ka kia maayag kou ra kolondo' kajamaran? Amon ru koon raginio, sotopot no mangintopot kou am kalo mangkaus guang.

⁷ Karaa' noyo, igondo' kia ulun ondo' kolondo' sala nalumpa' ru karaat am pagon?

⁸ Igondo' aku pakakito ra ulun mamparadu' ra umo ru kalaatan, am napatias ra sampug ru kalaatan, am nangkumos boo ra karaat am kapaganan.

⁹ Koson ra rasam am angin, namuso i Aki Kapuuno' risilo, am mabaya' ra sangit Nano mapuso ilo.

¹⁰ Koson ra singa' ondo' masangit, ulun malaat mansangal am mompogolon; kaa' i Aki Kapuuno' nompororo' risilo am namandak ra ripon nilo.

¹¹ Matoi ilo koson ra singa' ondo' natutusan ra akanon, saboi anak-anak nilo nantutuliar kalo naaruan.

¹² Rorondo' igondo' nakasaboi raki' koson ra konoson ra talingo kutu.

¹³ Bolong kutu najajou am napularatan koson nakaupi ra malaat.

¹⁴ Monontol aku am manulitik, ngaangai' ru inan kuno monontol sabap ra malaa'.

¹⁵ Malimanan ku siob ru angin ra bulos kuno, bulu ru inan kutu pana migor.

¹⁶ Rorondo' migor ra saang kuno. Mangurio aku riso kaa' kalo makaulig riso. Kopongo raginio morongog ku bolos mampagia' ra kasilukan ru orou.

¹⁷ ‘Maaru' lair ulun kalo majamaran ra saang ri Aki Kapuuno'? Maaru' lair ulun matulai ra saang ru Namangun risilo?

¹⁸ Kalo mangintopot i Aki Kapuuno' ra ulipon-ulipon Nano giu' ra suruga'; Io no poyo boo ondo' naguyum ra kasalaan ru malaikat-malaikat Nano.

¹⁹ Nangkara' kou kia ra mangintopot Io ondo' maminawo intor ra tana', ondo' maminawo intor ra kaau ondo' maumok koson ra sakuliambang?

²⁰ Ulun no maayag paat ra susuab ti, am matoi ra kalo malimanan ru ulun ra kalo poyo mapupusan orou.

²¹ Ngaangai' ondo' soroi risilo kalio; minatoi ilo ra kolondo' noowot ra kapintaran.’