AYUP 36 - Tanou Moonsoi Timugon

^1-2 Rongogo' ra sangkinolor poyo am oroto' guang, lakat poyo mokoondo' paraguon kuno ralalom inggalan ri Aki Kapuuno'.

³ Napandayan kuno malandom; pakayon ku ginio koson manulu' ra Namangun raki' matimpok.

⁴ Raguon kuno kolondo' ondo' kalo motopot; ulun ondo' totopot mapintar soroi ra saang muno.

⁵ Maikang kaga' i Aki Kapuuno', am kalo magasab ra osoi pana; ngaangai' no naratian No.

⁶ Kalo polosoon No ulun makatula maayag ra mabuoi, am mangani' Io ra katimpakan ra ulun ondo' maimbolo'.

⁷ Sindungin No ulun ondo' mabanis guang; polosoon No ilo mamarinta koson ra raja' saboi urumaton ilo ra sabubuoi no.

⁸ Kaa' amon ru ulun bangkilon ra rantai basi', am maimbolo' sabap ra binaal nilo galama',

⁹ tula am kalimbawan nilo pana, pakitonon ri Aki Kapuuno'.

¹⁰ Binuir No ilo maa' raginio rumongog ra pampakaraan Nano, am maa' raginio mangiruan ra kalaatan nilo.

¹¹ Amon kalo gumagaya' kau ri Aki Kapuuno' am mangandoi ayuk Riso, maayag ilo ra moonsoi am langkaya' saboi ra pupus ru kaayagan nilo.

¹² Kaa' amon kalo gumagaya' ilo ri Aki Kapuuno', mapuso ilo; matoi ilo ralalom ru sambung nilo.

¹³ Ulun ondo' kalo makaulig ri Aki Kapuuno', mambuli ra sangit; kabalu' pana ukumin, kalo makiasi' ilo ra makiindangan.

¹⁴ Matoi ilo ra lakat poyo mamulok, sabap ra kaayagan nilo makauyuyu' kaga'.

¹⁵ Kaa' mangila' i Aki Kapuuno' ra ulun pabayaan ralalom ru kaimbalaan am mampaliman risilo pabayaan ralalom ru kapaganan.

¹⁶ Pinalabus kou ri Aki Kapuuno' intor ra kapaganan, am pinoloso kou makasia' ra kaansayan, am mija' muno nososok ra akanon.

¹⁷ Kaa' raino, nontopot ra kalaatan muno, mangapu kou ra ukuman muno.

¹⁸ Ilalai', pai' polosoo' rasua mamparuung rirun, am pai' polosoo' kalangkayaan mampalayau rirun.

¹⁹ Kolondo' onong okou gumolok makiindangan; ngaangai' ikang muno kalo makapangindangan.

²⁰ Pai' koondom ra rondom ondo' molondom, paat ra bansa'-bansa' mapuso am maliom.

²¹ Ilalain, pai' ongoi ra kalaatan; kaimbalaan porotongon koson mapainggalur rirun intor ra kalaatan.

²² Karaa' noyo, kuasa' ri Aki Kapuuno' totopot maayo. Io noyo mangingila' ondo' maayo kaga'.

²³ Kolondo' osoi pana makapambala' ri Aki Kapuuno' ra atan ondo' musiti' baalon, kapoam manguu' Riso mambaal ra kalaatan.

²⁴ Magail i Aki Kapuuno' omporon sabap ra binaal Nano; okou niayuk musiti' mongompor Riso.

²⁵ Ngaangai' ulun nakakito ra binaal Nano; kaa' makito takau intor ra maalur ayuk.

²⁶ Kalo makapandai takau ra katulayan ri Aki Kapuuno' ra sotopot no, kapoam manguntob ra suang ru bilor Nano.

²⁷ I Aki Kapuuno' ondo' namunduk ra timug intor ra tana' ti poongoyon ra limbowon, am nangulau raginio nasauk ra posok ru timug ru rasam.

²⁸ Nompoloso Io ra timug rumatu' intor ra gaun, nasauk ra rasam ondo' rumatu' ra ngaangai' ulun.

²⁹ Kolondo' osoi pana nakapandai ra kinaugar ru gaun, kapoam tingkalur monggolon giu' ra limbowon intok inayanan ri Aki Kapuuno'.

³⁰ Tinampulau No titikop ru limbowon ra ganit, kaa' lonor ru raat magulayun molondom kaga'.

³¹ Ginio noyo ralan Nano mangani' ra akanon ra ulun, am manampos ra akanon ondo' masuang kaga'.

³² Namparakop Io ra ganit ra kalindu', am nanusub riso tumiu' ra intok kasagaan.

³³ Bolos ru tingkalur tatandu' ra maawas rasam sumaboi, am bibiag tinambiag pana makapandai ra rasam am angin sumaboi ra mataki'.