AYUP 35 - Tanou Moonsoi Timugon

^1-2 Ayup, kalo motopot ra okou mindagu ra kolondo' sala muno ra saang ri Aki Kapuuno',

³ kapoam mindagu ri Aki Kapuuno', ‘Atan sonor ru tula kuno Rirun? Kolondo' ampos maalap kuno kabalu' pana kolondo' tula kuno.’

⁴ Ayup, taamon tokou am rangan-rangan muno.

⁵ Pagilong ra limbowon am imansaa' mapara' kinasawat ru gaun.

⁶ Amon ru makatula kou, baal raginio kalo mantilubat ri Aki Kapuuno'. Amon ru masuang kasalaan binaal muno, baal raginio kolondo' atan-atan ri Aki Kapuuno'.

⁷ Mangindangan kou kia ri Aki Kapuuno' ra binaal moonsoi muno? Kolondo' atan-atan pakuan ri Aki Kapuuno' intor ramuyun.

⁸ Rangan-rangan rondo' guang rirun ondo' maimbolo' kinibit ru kalaatan muno, am ilo niayuk ondo' maulian sabap ra kinoonsoi muno.

⁹ Paat ra ulun imboloon, mampalaa ilo; gumolok ilo makiindangan.

¹⁰ Kaa' kalo mampiau ilo ri Aki Kapuuno', Namangun risilo, ondo' mangani' ra kalansanan paat ra ilo mangiluk guang,

¹¹ am nampasauk risilo ra mapintar poyo intor ra bibiag ra lantur kapoam susuit ra mansiab.

¹² Ulun naimbolo' no mampiau, kaa' kalo tumaam i Aki Kapuuno', sabap ra malilimbau ilo am malaat.

¹³ Kolondo' onong ilo gumolok ra makai' ikang; i Aki Kapuuno' Ondo' Maayo Kaga' Kuasa' kalo magilong kapoam mangkirongog risilo.

¹⁴ Ayup, kamu kalo makito mu Io; kaa' inaani' ra guang mokoorot – baal muno soroi giu' ra saang Nano.

¹⁵ Pangkaraan muno ra kalo mangukum i Aki Kapuuno', am kalo mampalio Io ra kaanggalan.

¹⁶ Kolondo' onong ra okou marayus mindagu; nakito toojo raino ra kalo nakapandai kou ra rinagu muno.