AYUP 34 - Tanou Moonsoi Timugon

^1-2 Akau ngaangai' totopot mapintar, totopot mapandai; raino rongogo' ragu kutu.

³ Nakapandai ulun ra akanon ondo' maamis paat mangkinam; am ragu-ragu ondo' mapintar paat mokorongog.

⁴ Guangon raino ti musiti' takau intutunon, am itakau ngaangai' mamatas.

⁵ Indagu i Ayup, ‘Kolondo' sala kuno, kaa' kalo nangani' i Aki Kapuuno' raki' ra katimpakan.

⁶ Kinara' aku ra magabau, sabap ra mindagu aku ra motopot. Malandom pilat kuno, kaa' kolondo' sala kuno.’

⁷ Igondo' kau kia pakakito ra ulun koson ri Ayup ti? Ruruli' io magasab ri Aki Kapuuno'.

⁸ Masaga' io rumangan ra ulun malaat, am magibaya' ra ulun jajajou.

⁹ Mindagu io ra kolondo' onong mambaal ra kasagaan ri Aki Kapuuno'.

¹⁰ Akau ulun mapandai, rongog kano! Nambaal kia i Aki Kapuuno' Ondo' Maayo Kaga' Kuasa' ra baal ondo' nasala?

¹¹ Balasin No ulun mogondo' ra binaal nilo am pamakuan no risilo matanda'.

¹² I Aki Kapuuno' Ondo' Maayo Kaga' Kuasa' kalo nambaal ra kalaatan; ngaangai' ulun aniin No ra katimpakan.

¹³ Nakaalap kia i Aki Kapuuno' ra kuasa' Nano intor ra osoi pana? Mokoondo' kia osoi pana ondo' nangani' ra kandoi Riso koson manguasa' ra tana' ti?

¹⁴ Amon ru bunduson ri Aki Kapuuno' painawo ru ulun, am pasagulion paminawo nilo,

¹⁵ matoi boo ngaangai' ulun ondo' maminawo, am ulun masauk saguli' ra kaau.

¹⁶ Amon ru mapintar kou, pangkirongog no, pangintalingo am talinaasi'.

¹⁷ Amon masisang i Aki Kapuuno' ra katimpakan, kalo maaya' Io mamarinta. Sonsolon min kia i Aki Kapuuno' ondo' matimpok am maikang kaga'?

¹⁸ Sonsolon ri Aki Kapuuno' ulun mamarinta am raja', paat ra ilo lumaat am manggal.

¹⁹ Namangun i Aki Kapuuno' ra moonong ulun; kalo saungon No raja', kapoam kaansayin ondo' langkaya' intor ra musikin.

²⁰ Maaru' lair ulun matoi paat ra rondom ra mamulali'. Ukumin ri Aki Kapuuno' ulun am ilo pana mapuso; Potoyon No ondo' maikang kaga' ra maluoi ayuk.

²¹ Mangimansa' Io ra paliso ru ulun, am urioon toojo ngaangai' tumpang nilo.

²² Kolondo' kalandaman ondo' totopot molondom koson mambuni ra ulun makatula.

²³ Kalo pana aruon ri Aki Kapuuno' orou koson mangakim ra ulun.

²⁴ Io kalo pana manutun am mangimumui ra ulun manguasa' ra kalo poyo mopolonggo' risilo, am mampatalison ra ulun malit risilo.

²⁵ Sabap ra makapandai Io ra atan ondo' baalon nilo, linuir No ilo paat ra rondom am namuso risilo.

²⁶ Mangukum Io ra ulun makatula giu' ra saang ru ulun masuang,

²⁷ sabap ra kalo boo maya' ilo Riso; am kalo linio nilo ngaangai' susuban Nano.

²⁸ Nangkinibit ilo ra ulun musikin mampalaa ri Aki Kapuuno', am morongog ri Aki Kapuuno' laa nilo.

²⁹ Amon ru mamatas i Aki Kapuuno' koson ra mongkoror ayuk, kolondo' osoi pana mokololob Riso. Amon ru pasibunion No bulos Nano, kolondo' osoi pana makatuum Riso.

³⁰ Bansa'-bansa' pana kalo maikang koson manginga' ra ulun mangimbolo' intor ra manguasa' risilo.

³¹ Ayup, nangiou kono kia ra kasalaan muno ri Aki Kapuuno'? Nabantu' kono kia kalo mambaal saguli' ra tula?

³² Nakitaak kono kia ri Aki Kapuuno' manulu' ra kasalaan ondo' kalo napandayan muno? Nangiou kono kia mopolonggo' ra kalaatan raginio?

³³ Ginio sabap ra kalo nangiou kou ra binaal ri Aki Kapuuno', Sabap ra kalo nangiou kou ra binaal ri Aki Kapuuno', Kalo makalansan kou Riso mangiou ra kasagaan muno. Okou no ondo' mamatas, sala' ka aku; balai' akai ra pampaguangan muno.

³⁴ Moonong ulun ondo' makautok maaru' mangiou; moonong ulun mapintar ondo' rumongog raki' no mindagu

³⁵ ra i Ayup mindagu ra kalo makarati', am ra ragu-ragu nano kolondo' arati'.

³⁶ Amon ru ragu ri Ayup talinaasin toojo, makito toojo ra io mindagu koson ra ulun malaat.

³⁷ Sala' ka ayuk makatula io, kaa' gumuor io; am magagasab io ri Aki Kapuuno' ra saang takau.