AYUP 32 - Tanou Moonsoi Timugon

Ragu ri Iligu

¹ Sabap ra mangintopot i Ayup ra kolondo' sala nano, talu ngaulun rangan nano kalo boo tumaam.

² Kaa' giu' no mokoondo' sangulun ondo' kalo nokoorot ra lasu' ru guang nano, sabap ra sinonsol ri Ayup i Aki Kapuuno' am migiangku ra kolondo' sala nano. Inggalan nano i Iligu anak ri Barakil, sangulun papag ri Bus, intor ra bansa' ru Ram.

³ Siminangit io niayuk ra talu ngaulun rangan ri Ayup no sabap kalo nakataam ilo ri Ayup, kabalu' pana sinonsol nilo io.

⁴ I Iligu mamulok poyo kaga' intor risilo. Ginio ra naginaa io ra ngaangai' ulun mopongo mindagu.

⁵ Kakito no talu ngaulun no kalo nakataam ri Ayup, sangit io

⁶ am indagu koon ragitio, “Aku ti lakat poyo mamulok, alika akau matutuo noyo, ginio ra malaa' aku am pagantangan mindagu ra pamaguangan kuno.

⁷ Pangkaraan kuno, polosoon noyo ondo' matuo umur mindagu, am ondo' matutuo poyo mantayar ra kapintaran.

⁸ Kaa' sotopot no Ambiluo ri Aki Kapuuno' Ondo' Maayo Kaga' kuasa' ondo' mangani' ra kapintaran ra ulun.

⁹ Ulun ondo' mapintar, sala' ka matuo umur nano; ulun makarati' ra ondo' motopot, sala' ka masawat umur nano.

¹⁰ Ginio ra rongog kano raki'; iowo' aku no mambala' ramuyun ra pampaguangan kuno.

¹¹ Tumaan guang kuno mangkirongog paat akau mindagu, am manginaa paat akau maguyum ra ragu-ragu mapintar.

¹² Ilain ku toojo am mangkirongog ra akau kalo nakasugut. Kasalaan ralalom ru ragu-ragu ri Ayup kalo maalap min katapatan nano.

¹³ Ati kulaan kau mindagu ra nokoowot kano ra kapintaran? Musiti' i Aki Kapuuno' tumaam ri Ayup, sabap ra kalo nakasugut kau.

¹⁴ Minindagu i Ayup ramuyun, sala' ka aku, kaa' totopot aku kalo tumaam koson ramuyun.

¹⁵ Ayup, naubong ilo am kalo makataam; kolondo' boo makaragu nilo.

¹⁶ Musiti' aku kia marayus maginaa, paat ra ilo mongkoror? Minigor ilo ra giu' no am kalo minindagu ra atan pana.

¹⁷ Kalo, raino masaga' aku mangani' ra pampaguangan kuno, am mambala' ramuyun ra pangkaraan kuno.

¹⁸ Kalo boo makapaginaa aku. Kalo moorot ku ragu-ragu kuno.

¹⁹ Amon ru kalo mindagu aku, lumaput aku, koson ra kantungan kungkung ondo' makasuang ra wain baguon.

²⁰ Musiti' aku mindagu maa' raginio matasu' guang kuno; musiti' aku mampagaal ra kabang am tumaam.

²¹ Kalo manaung aku ra osoi pana; kalo mongompor aku ra osoi pana.

²² Kalo makapandai aku ati kulaan mongompor. Amon ru baalon ku koson raginio, mataki' i Aki Kapuuno' mangukum raki'.