AYUP 31 - Tanou Moonsoi Timugon

¹ Nabaya' ra ibot aku nabantu', kalo suminto ra ralaa mamulok.

² Atan kia baalon ri Aki Kapuuno' Ondo' Maayo Kaga' Kuasa' ritakau? Ati kulaan kia Io mambalos ra baalon ru ulun?

³ Mamparatong Io ra karaat am kapusaan risilo ondo' nambaal ra kasalaan.

⁴ Nakapandai i Aki Kapuuno' ra ngaangai' binaal kuno; Makakito Io ra moonong tumpang kuno.

⁵ Magibot aku ra kalo igondo' aku pambaal ra malaat, am kalo igondo' aku pamparuung ra ulun.

⁶ Polosoon noyo i Aki Kapuuno' manimbang raki' ra timbangan motopot, am makapandai Io ra kolondo' sala kuno.

⁷ Amon liminisang aku intor ra ralan ondo' motopot, kapoam guang kuno nabunduk ra baal ondo' malaat, amon ru kalindu' kuno majamol sabap ra tula,

⁸ polosoon ayuk pana ulun ra bokon mangakan ra atan ondo' tiniasan kuno, am polosoon titikop ru tinanom kuno matutuk.

⁹ Amon ru suminto aku ra andu' ru sambalayan kuno, am mangkuliman riso liliwa' mansibuni ra talikuron ru kulobon,

¹⁰ polosoon ayuk andu' kuno mangansak ra akanon ru ungkuyon ra bokon, am mombolong ra intok pambalangan ru ungkuyon ra bokon.

¹¹ Tula koson raginio malaat kaga', am ulun ondo' nambaal raginio musiti' ukumin ra matoi.

¹² Tula no mamuso koson ra apui ru naraka, monolob ra ngaangai' ondo' longgom kuno.

¹³ Paat ulipon kuno mampalaa sabap ra longgom nano ra kalo linio kuno, mangkirongog aku am pamakuan kuno riso matimpok.

¹⁴ Amon ru kalo, ati kulaan aku muma' ri Aki Kapuuno'? Atan kia ondo' maragu kuno paat ra aku akimin ri Aki Kapuuno'?

¹⁵ I Aki Kapuuno' namangun raki', am niayuk namangun ra ulipon-ulipon kuno.

¹⁶ Kalo igondo' aku marara' mangindangan ra ulun musikin, am kalo igondo' nompoloso ra ruandu' napuor maayag ra mangkaus.

¹⁷ Kalo igondo' aku pompoloso ra anak nailusan ra matuo no maitilan, alika aku galama' maukop akanon.

¹⁸ Aku koson pinangkaama' ra anak nailusan ra matuo, masalok aku manaung ra ruandu' napuor.

¹⁹ Paat ra aku makatuum ra ulun ondo' natutusan, ondo' musikin kaga' koson mambali ra bayang,

²⁰ aniin ku io ra bayang intor ra bulu ru domba kuno galama', am io pana totopot mongompor raki'.

²¹ Amon ru igondo' aku pamparuung ra anak nailusan ra matuo sabap ra nakapandai aku ra mamanang aku ra baal kuno,

²² polosoon longon kuno pandakon, saboi intor ra limbawo kuno pantuliaron.

²³ Sabap no ra malaa' aku ra ukuman ri Aki Kapuuno', totopot kalo baani aku mambaal raginio.

²⁴ Kalo igondo' aku malansan ra kalangkayaan kuno,

²⁵ kapoam lumimbau ra rapu' kuno.

²⁶ Kalo igondo' aku samba ra mato ru orou ondo' makasinda ra mapaang, kapoam sila' ondo' makasinda ra moonsoi.

²⁷ Kalo igondo' aku kalaai ra ngaangai' no, am kalo igondo' mangalok ra kalindu' kuno koson mangurumat ra ngaangai' no.

²⁸ Tula no musiti' ukumin ra matoi, sabap i Aki Kapuuno' Ondo' Maayo Kaga' Kuasa' inanggal.

²⁹ Kalo igondo' aku maansukan paat ra pantula' kuno maimbolo', am kalo igondo' maansayan paat ra ilo malumpa' ru karaat.

³⁰ Kalo igondo' aku pakiasi' ra patayan nilo; kalo igondo' aku makatula koson raginio.

³¹ Ngaangai' ulun ondo' mangandoi ra tayar kuno makapandai ra ulun ondo' kalo nauligan kuno, paakanon ku giu' ra baloi kuno.

³² Baloi kuno ukabin ra ulun tumanggau, am kalo igondo' aku mompoloso risilo mombolong giu' ra ralan maayo.

³³ Ulun ra bokon kuminam mampasibuni ra tula, kaa' kalo tumilu aku koson risilo.

³⁴ Ragu ru kasuangan kalo malaa' aku, am pagasaban ru ulun kalo lioon ku; kalo igondo' aku soroi ra baloi kapoam mongkoror ayuk, sabap malaa' ra ilo magasab.

³⁵ Kolondo' kia osoi pana ondo' masaga' mangkirongog ra ragu-ragu kuno? Magibot aku ra moonong ragu kuno motopot. Polosoon i Aki Kapuuno' Ondo' Maayo Kaga' Kuasa' tumaam raki'. Amon ngaangai' panguwan ru pantula' kuno tulisin maa' raginio makakito aku raginio,

³⁶ am aku pana pasulompoyon ginio ra limbawo, am pasampakon ginio ra ulu kuno koson ra karaun.

³⁷ Balain ku i Aki Kapuuno' ra ngaangai' ondo' baalon kuno, am muma' Riso ra mangintopot am ulu ra tumungar.

³⁸ Amon ru nantakou aku ra tana' ondo' raduon kuno, am ginaau ku ginio intor ra ulun tatangan toojo no,

³⁹ amon mangakan aku ra ampos ru tana' nano am mompoloso ra ulun magitanom ondo' mantanom no maitilan am tumukal,

⁴⁰ polosoon noyo ondo' tumuu' ra giu' no, alab am ruui, am sala' ka gandum kapoam barli.” Gini noyo ragu-ragu ri Ayup.