AYUP 30 - Tanou Moonsoi Timugon

¹ Kaa' raino ulun ondo' mamulok poyo intor raki' magasab raki'. Ragili ama' nilo totopot asabin ku koson magalung ra domba kuno mabaya' ra uku' ra magalung.

² Kolondo' onong nilo raki', sabap ra nakai' noyo ikang.

³ Musikin ilo am naitilan kaga', saboi mangakan ilo ra bakat mapua' giu' ra tana' kaagisan ondo' masiluk.

⁴ Namubul ilo ra bulungkut giu' ra tana' kaagisan, am mangakan ra raun am bakat nano.

⁵ Ngaangai' ulun nampagiru' risilo ra ginalakan, koson ra ulun mampagiru' ra ulun mantakou.

⁶ Minayan ilo kalalaat giu' ra ralalom ru luang batu, luang-luang giu' ra tobo ru gunung nasauk ra baloi nilo.

⁷ Giu' ra kataunan mompoloong ilo koson ra bibiag, am nampipisi' giu' ra ragana' ru bulungkut.

⁸ Ilo santimungan ulun ondo' totopot kolondo' onong! Pinagiru' ilo intor ra pagun ti.

⁹ Kaa' raino ilo matong am makakurit raki'; aku sinauk ra kukuritin nilo.

¹⁰ Masisang ilo am magasab raki', bulos kuno pana am tiniwagan nilo.

¹¹ Sabap no ra i Aki Kapuuno' nampalawo noyo raki' am kalo maikang, ginabu' nilo aku ra ngaangai' kalaatan.

¹² Ulun-ulun mangalaat no namulunsar raki' intor ra talupak; am naratuan kuno inatang nilo.

¹³ Inampangan nilo ralan kuno am namparatu' raki'; am kolondo' sangulun pana nanginggalar risilo.

¹⁴ Pinopol nilo timbok silian kuno; masuang ilo siminubol ra nampajanjang.

¹⁵ Malaa' nampalibung raki'; natatak kaurumatan kuli koson ra siob ru angin am kalansanan kuno koson mamanang, lumiot koson ra gaun.

¹⁶ Raino maar aku no matoi; kaimbalaan mamijak raki'.

¹⁷ Paat ra rondom ngaangai' ru bungul kuno maruol kaga', am kinaruol no ondo' sumusuk ra kalo lumonggo'.

¹⁸ Rinakop aku ri Aki Kapuuno' ra liog ru bayang kuno am nangumpol ra bayang kuno.

¹⁹ Pinampasan No aku ra ralalom ru losok, am nasauk aku koson ra jamol.

²⁰ Nampiau aku Rirun, iou Aki Kapuuno', kaa' kalo tumaam Kou; am paat aku makiasi', kalo lioon Mu.

²¹ Liminaat Kou raki', nangimbolo' Kou raki' ra ngaangai' ru ikang Muno.

²² Nompoloso Kou ra angin nangayat raki', am bagiu' nanguyog raki'.

²³ Nakapandai aku ra nagibit Kou raki' ra intok ru kapatayan, ra pamupusan ondo' musiti' umaan ru moonong ulun.

²⁴ Kua pamulunsar Kou ra ulun kolondo' kaikangan, ondo' kalo boo makapambaal ra atan ayuk ondo' ak am makimasi'?

²⁵ Kalo kia mababaya' aku mantangi' ra ulun ralalom kapaganan, am makaasi' ra ulun ondo' musikin?

²⁶ Malansan aku ra kaansukan am sinda, kaa' kapaganan am kalandaman ondo' matong.

²⁷ Inumok aku ru pagalabaan am marualan; orou-orou umaan kuno kaimbalaan.

²⁸ Ralalom kalandaman, ra kolondo' sinda magijawot aku; migor aku ra saang ru ulun masuang am makiindangan.

²⁹ Bolos kuno mangiluk am totopot makaasi'-asi', koson ra loong ru taani kapoam bolos ru susuit unta.

³⁰ Kungkung kuno lumitom; inan kuno mosolob ru salom.

³¹ Ragili mangkirongog aku ra miujik ru kaansukan, kaa' raino tangi' ra suloboyon ayuk boo.