AYUP 29 - Tanou Moonsoi Timugon

Pambalaan ri Ayup ra pamupusan intor ra baal nano

¹ Tumalimpuun poyo i Ayup mindagu,

² “Amon ru kaayagan kuno makasaguli' koson ragili, paat ri Aki Kapuuno' manindung raki'.

³ Masalok Io mangani' raki' ra indangan, am mansilau Io raki' paat mansail ra kalandaman.

⁴ Ginio noyo paat ra aku makakaansayan, paat ri Aki Kapuuno' masauk ra rangan kuno am niayuk manindung ra baloi kuno.

⁵ Paat raginio i Aki Kapuuno' Ondo' Maayo Kaga' Kuasa' mabaya' raki', am linimpuan aku ru ngaangai' anak kuno.

⁶ Bibiag tinambiag kuno manangampos ra masuang gatas, am puun ru jaitun tumuu' kabalu' pana giu' ra tana' kabatuan.

⁷ Paat ra tingganai-tingganai ru bandar mansusunur, manturung aku mababaya' risilo.

⁸ Ulun mamulok mangani' ra ralan paat ilo makakito raki', am ulun matutuo migor mangurumat raki';

⁹ tingganai-tingganai ru mamagun lumonggo' mindagu;

¹⁰ ulun maatang pana maya' mongkoror.

¹¹ Moonong ulun ondo' makakito raki' kapoam mokorongog ra baal kuno, mindagu ra mongompor ra binaal moonsoi kuno.

¹² Ra ulun musikin, inindangan ku; ra lalaing nailusan ra matuo ondo' kolondo' intok lansanan, inindangan ku.

¹³ Inompor aku ru ulun ondo' mapagon kaga', am inindangan ku ruandu' napuor nakaalap ra sindungan.

¹⁴ Timbalos kutu mabanis ra kolondo' jamar; masalok ku paundukon katimpakan.

¹⁵ Ra ulun bolou, masauk aku ra mato; ra ulun kalo makaugar, masauk aku ra kalayam nilo.

¹⁶ Ra ulun musikin, masauk aku ra ama'; ra ulun bansa' ru bokon, masauk aku ra manaung.

¹⁷ Kuasa' ru ulun malaat pandakon ku, am ulun ra jinamaran nilo binayag ku.

¹⁸ Masalok aku malansan maa' raginio maawar umur kuno, am matoi ra kaansayan giu' ra baloi.

¹⁹ Aku koson ra puun tataun ondo' tumuu' ra malabung, bakat nano naukop ra timug am bolobou namasa' ra raan nano.

²⁰ Masalok aku omporon ru ulun, am kaikangan kuno kalo igondo' kairurui'.

²¹ Ulun mongkoror paat aku mambilin, ragu-ragu kuno rongogon nilo ra matalinaasan.

²² Kakai' ragu kuno, kolondo' boo ondo' paruangon. Ragu kuno sumosop koson ra posok ru rasam;

²³ moonong ulun mangapu ra ragu-ragu kuno ra maansukan, koson ra ulun magitanom mangapu ra rasam bulintok mambusak.

²⁴ Nampajingit aku risilo paat ra ilo nangkaus guang; bulos kuno ondo' matakau makabansuk risilo.

²⁵ Aku noyo nampaguut ra paningganayan am mamatas ra ngaangai'; maningganai aku risilo koson ra raja' manusub ra pulalai; manimayo aku risilo paat ra mangiluk guang.