AYUP 28 - Tanou Moonsoi Timugon

Ompor ra tayar ru kapintaran

¹ Mokoondo' lombong-lombong intok natuuman ra pirok, mokoondo' intok-intok pamasawan ra mas.

² Basi' kalion intor ra ralalom ru tana', am batu tunangon koson mokoowot ra tambaga'.

³ Molondom kaga' subolon, intok ondo' malandom kaga' imumuyin. Giu' no, giu' ra ralalom ru kalandaman, maguyum ulun ra masuang batu.

⁴ Maalur giu' ra intok ondo' kolondo' namagun, ondo' kalo igondo' kininjangan am nansailan, ulun mangandoi liliwa' tumayung ra tali, giu' ra ralalom ru luang tana' ondo' masiluk kaga'.

⁵ Tana' manangampos ra akanon tayar ru ulun, kaa' giu' ra ragana' ru tana' no, ngaangai' no nopopol-popol.

⁶ Batu-batu ru tana' mokoondo' ra nilam, am kaau ru tana' ti mokoondo' ra mas.

⁷ Kalo makito ru susuit kanui ralan mongoi ra lombong no, susuit nasar kalo igondo' ongoi ra giu' no.

⁸ Bibiag masigo kalo igondo' baya' ra ralan no. Singa' pana kalo igondo' pansail ra ralan masiluk no.

⁹ Ulun mangkali ra masuang batu ondo' mokotog kaga', lonor ru gunung pana kalion.

¹⁰ Tatanga' ilo sumubol ra gunung batu, nakatuum ilo ra intan ondo' mologo kaga'.

¹¹ Saboi ra puun ru sungoi kalion nilo, am mambala' ra atan ondo' nakasibuni.

¹² Kaa' ati kia kauyuman ra kapintaran? Ati kia intok takau makaigigila' maa' raginio makarati'?

¹³ Kapintaran kalo matuum ra gino ngai' ru ulun; kolondo' osoi pana nakapandai ra logo ra sotopot no.

¹⁴ Raat mamaar am raat ondo' malandom am malangka' mindagu ra kapintaran kolondo' ra giu'.

¹⁵ Kapintaran kalo maaligan ra mas kopoyo, am kalo niayuk mabali ra pirok pana.

¹⁶ Mas am intan ondo' mologo kaga' kalo mokogondo' ra logo nano.

¹⁷ Io no mologo poyo intor ra mas, am intor ra pasu' mas kapoam kristal.

¹⁸ Kapintaran masawat poyo logo no intor ra batu karang, hablur kapoam mutiara.

¹⁹ Batu topaj am mas kopoyo kalo mokogondo' ra logo ru kapintaran.

²⁰ Ati kia puun ru kapintaran? Ati kia kaalapan takau ra karatian?

²¹ Kolondo' ondo' maayag igondo' pakakito raginio, susuit giu' ra rasawat pana kalo igondo' pakakito raginio.

²² Kapatayan am kapusaan pana mindagu ra ondo' norongog tanou kalo naaruan ayuk.

²³ I Aki Kapuuno' ayuk ondo' nakapandai ra ralan mongoi ra giu', ra intok ru kapintaran soroi,

²⁴ sabap ra makakito Io saboi ra pompor ru tana' ti, makakito ra ngaangai' ondo' soroi giu' ra ragana' ru limbowon.

²⁵ Paat ra Io mangani' ra angin ru kaikangan, am langka' ru raat inaru' Nano;

²⁶ paat ri Aki Kapuuno' mangaru' ra intok ratuan ru rasam, am ralan ondo' sailan ru timpalak tingkalur;

²⁷ paat raginio noyo kakitanan Nano ra kapintaran am logo ru kapintaran kinamin No, am mangani' Io ra barakat Nano.

²⁸ Indagu i Aki Kapuuno' ra ulun, “Koson makaalap ra kapintaran, musiti' kau malaa' am mangurumat ra Tuhan. Koson makaalap ra karatian, musiti' kau mangiruan ra kalaatan.”