AYUP 27 - Tanou Moonsoi Timugon

Ayup

¹ Indagu i Ayup,

² “Ralalom inggalan ri Aki Kapuuno' Ondo' Maayo Kaga' Kuasa', i Aki Kapuuno' ondo' maayag, ondo' marara' mangani' raki' ra katimpakan am ondo' nampakapait ra kaayagan kuno,

³ magibot aku: Buoi ri Aki Kapuuno' mangani' raki' ra paminawo, buoi ru painawo kuno soroi ra inan kuno,

⁴ bibil kuno kalo noyo igondo' manabit ra ragu magabau, am rila' kuno kalo mindagu ra ragu mamparuung.

⁵ Kalo mindagu aku ra motopot kau; saboi pana matoi magulayun aku mindagu ra kolondo' sala.

⁶ Kalo langgain ku mindagu ra motopot aku; guang kuno kalo mononsol raki'.

⁷ Polosoon pantula' kuno ukumin koson ra ulun malaat, am ulun ondo' manggal raki' ukumin koson ra ulun minanggal.

⁸ Atan kia kalansanan ru ulun malaat paat ri Aki Kapuuno' mangalap ra painawo nilo?

⁹ Paat ra masaboi kapupusan, masaga' kia i Aki Kapuuno' mangkirongog ra golok nilo?

¹⁰ Musiti' ilo gumogot ra katasuan intor ri Aki Kapuuno', am musiti' ilo masalok makiasi' Riso.

¹¹ Polosoo' aku mangila' ramuyun mapara' kinaayo ru kuasa' ri Aki Kapuuno', am sailon ku toojo ragu ra inatangan ri Aki Kapuuno' Ondo' Maayo Kaga' Kuasa'.

¹² Nakito min galama' ngaangai' no ra mato min galama'. Ginio ra, kua kia indagu kau ra jajajou ti?”

Jopar

¹³ “Ilai' ati kulaan i Aki Kapuuno' Ondo' Maayo Kaga' Kuasa' mangukum ra ulun ondo' malaat am mamatoi.

¹⁴ Amon ru anak ungkuyon nilo masuang, ngaangai' no matoi ralalom pangayawan; anak-anak nilo kalo igondo' kaukop ra akanon.

¹⁵ Ilo ondo' maayag matoi sabap ra maruol tumapik, am ruandu' napuor nilo kalo mantangi' risilo.

¹⁶ Pirok ru ulun malaat bubujuk, am bayang nilo pinatuntur,

¹⁷ kaa' ulun moonsoi mambayang raginio, am ulun mabanis guang makaalap ra pirok no.

¹⁸ Baloi ondo' binaal ru ulun malaat matapu koson ra tambaloi ru lawa', baloi sangkinolor ayuk koson ra pusangag ru ulun magalung ra umo.

¹⁹ Koson ra pamupusan toojo, lumangan ilo koson ra ulun langkaya', paat ra ilo sumukal, lumiot boo ngaangai' kalangkayaan nilo.

²⁰ Koson ra liur ondo' mamulali' matong, makalalaa' lumumpa' risilo; angin paat ra rondom ti manampui risilo.

²¹ Angin sirangon mangkayang risilo, am magalus risilo intor ra baloi.

²² Kalo makaulig ra makaasi', linumpa' ilo ru angin, am nagiru' ilo kalalaat naguyum ra sindungan.

²³ Babatut angin koson ra ragu-ragu magasab risilo, giu' ra ati pana asabin ilo.”